കഴിഞ്ഞ ആഴ്ച കാണാതായ വ്യോമസേനാ വിമാനം എഎന്‍ 32 നെ കുറിച്ചുള്ള നിഗൂഢതകള്‍ തുടരുന്നു. ഒരാഴ്ചയായി രാപകല്‍ തിരച്ചില്‍ നടത്തിയിട്ടും ഒന്നും കണ്ടെത്താനായില്ല. സാങ്കേതിക സംവിധാനങ്ങളുടെ സഹായത്തോടെ തിരച്ചില്‍ നടത്തിട്ടും വിമാനത്തിന് എന്തു സംഭവിച്ചുവെന്നത് നിഗുഢതയായി തുടരുന്നു
കാണാതായ മലേഷ്യന്‍ വിമാനത്തിന്റെ ദുരൂഹതകള്‍ നിലനില്‍ക്കെത്തന്നെ പുതിയൊരു വിവാദത്തിനും കൂടെ സംഭവം തുടക്കമിടുമോ എന്നും സംശയിക്കുന്നുണ്ട്.
എന്നാല്‍ കാണാതായ വിമാനത്തെ കുറിച്ചുള്ള പ്രതീക്ഷകള്‍ ഇപ്പോഴും അവസാനിച്ചിട്ടില്ല. എഎന്‍ 32 വിമാനത്തില്‍ ഉണ്ടായിരുന്നവരുടെ മൊബൈല്‍ ഫോണ്‍ ഇപ്പോഴും റിങ് ചെയ്യുന്നുണ്ടെന്നാണ് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്. ഫോണ്‍ റിങ് ചെയ്യുന്നുണ്ടെന്ന് ഇവരുടെ ബന്ധുക്കളാണ് അറിയിച്ചത്.
എന്റെ മകന്‍ തിരിച്ചുവരുമെന്നാണ് ഇപ്പോഴും കരുതുന്നതെന്ന് കാണാതായ രഘുവീര്‍ വര്‍മ്മയുടെ അമ്മ സുനിത വര്‍മ പറഞ്ഞു. മകന്റെ ഫോണ്‍ റിങ് ചെയ്യുന്നുണ്ട്. ഇത് പ്രതീക്ഷകള്‍ നല്‍കുന്നുണ്ടെന്നും അവര്‍ പറഞ്ഞു.
എയര്‍ടെല്‍ കണക്ഷനാണ് രഘുവീര്‍ ഉപയോഗിക്കുന്നത്. ഈ സെല്‍ഫോണ്‍ ഇപ്പോഴും ആക്ടീവ് ആണെന്നാണ് റിപ്പോര്‍ട്ട്. കഴിഞ്ഞ ദിവസങ്ങളിലാണ് രഘ്‌വീറിന്റെ മൊബൈല്‍ ആക്ടീവ് ആണെന്ന് മനസ്സിലാക്കിയത്. മൊബൈലിലെ വാട്‌സാപ്പും ആക്ടീവ് ആണ്. വാട്‌സാപ്പ് അവസാനം സന്ദര്‍ശിച്ച ജൂലൈ 26 ആണെന്ന് കാണിക്കുന്നുണ്ട്. ജൂലൈ 22 നാണ് വിമാനം കാണാതായത്. വിമാനം കാണാതായതിന് ശേഷം നാല് ദിവസത്തോളം വാട്‌സാപ്പ് ഉപയോഗിച്ചതായി കാണാം.
എന്നാല്‍ റിങ് ചെയ്യുന്ന മൊബൈല്‍ എവിടെയാണെന്ന് കണ്ടെത്താന്‍ കഴിഞ്ഞിട്ടില്ല. തുടര്‍ന്നുള്ള ദിവസങ്ങളില്‍ ഈ മൊബൈല്‍ പിന്തുടര്‍ന്ന് വിമാനം കണ്ടെത്താനാകുമെന്ന പ്രതീക്ഷയിലാണ് ബന്ധുക്കള്‍. വാട്‌സാപ്പ്, മൊബൈല്‍ ആക്ടീവ് ആണെന്നത് സംബന്ധിച്ച് ബന്ധുക്കള്‍ അധികൃതരെ അറിയിച്ചിട്ടുണ്ട്.
സംഭവത്തില്‍ അന്വേഷണം ആരംഭിച്ചതായി അധികാരികള്‍ അറിയിച്ചു. അട്ടിമറി ശ്രമവും തള്ളിക്കളഞ്ഞിട്ടില്ല.