കെഎസ്ആര്ടിസി ബസും കാറും കൂട്ടിയിടിച്ച് അമ്മയും മകനും മരിച്ചു
പാലാ-പൊന്കുന്നം റോഡില് ഇളങ്ങുളം ചന്തക്കവലയ്ക്കു സമീപം കെഎസ്ആര്ടിസി ബസും കാറും കൂട്ടിയിടിച്ചു കാര് യാത്രക്കാരായ അമ്മയും മകനും മരിച്ചു.
തലയോലപ്പറമ്പ് ഇറുമ്പയം വേലംപറമ്പില് അപ്പുക്കുട്ടന് നായരുടെ ഭാര്യ സരസ്വതിയമ്മ (70), മകന് ബാലചന്ദ്രന് (45) എന്നിവരാണു മരിച്ചത്. കൂടെയുണ്ടായിരുന്ന ബാലചന്ദ്രന്റെ ഭാര്യ അംബിക (40), മകന് അന്ജിത് ബാല് (16) എന്നിവര്ക്കു സാരമായി പരിക്കേറ്റു. ഇന്നലെ ഉച്ചകഴിഞ്ഞു മൂന്നോടെയായിരുന്നു അപകടം.
എറണാകുളത്തുനിന്നു മുണ്ടക്കയം വഴി കോരുത്തോടിനു പോകുകയായിരുന്ന എരുമേലി ഡിപ്പോയിലെ കെഎസ്ആര്ടിസി ഫാസ്റ്റ് പാസഞ്ചര് ബസുമായാണ് എതിരേ വന്ന കാര് കൂട്ടിയിടിച്ചത്. വെച്ചൂച്ചിറ കുന്നത്ത് ബന്ധുവീട്ടില് വിവാഹനിശ്ചയച്ചടങ്ങു കഴിഞ്ഞു തിരികെ പിപി റോഡ് വഴി തലയോലപ്പറമ്പിനു പോകുകയായിരുന്നു കാര് യാത്രികര്. മരിച്ച ബാലചന്ദ്രന് ദുബായില് ഫോര്മാനായിരുന്നു. അവധിക്കു നാട്ടിലെത്തിയ ഇദ്ദേഹം അടുത്ത മാസം മടങ്ങാനിരിക്കെയായിരുന്നു ദുരന്തം.
മുന്ഭാഗം പൂര്ണമായി തകര്ന്ന കാറില്നിന്നു പരിക്കേറ്റവരെ ഓടിക്കൂടിയ പരിസരവാസികളാണു പുറത്തെടുത്തത്. കാഞ്ഞിരപ്പള്ളി ജനറല് ആശുപത്രിയില് എത്തിച്ചെങ്കിലും സരസ്വതിയമ്മയുടെ ജീവന് രക്ഷിക്കാനായില്ല. മറ്റുള്ളവരെ കോട്ടയം മെഡിക്കല് കോളജ് ആശുപത്രിയിലേക്കു കൊണ്ടുപോയി. ബാലചന്ദ്രന് മെഡിക്കല് കോളജ് ആശുപത്രിയിലാണു മരിച്ചത്. ഇരുവരുടെയും മൃതദേഹങ്ങള് കോട്ടയം മെഡിക്കല് കോളജ് ആശുപത്രി മോര്ച്ചറിയില്.
പൊന്കുന്നം എസ്ഐ കെ. അഭിലാഷ് കുമാറിന്റെ നേതൃത്വത്തിലുള്ള പോലീസ് സംഘം സ്ഥലത്തെത്തി മേല്നടപടികള് സ്വീകരിച്ചു.
https://www.facebook.com/Malayalivartha
