കഴിഞ്ഞ ദിവസം മുത്തൂറ്റ് ഗ്രൂപ്പുകളില്‍ റെയ്ഡ് നടത്തിയതിന്മേല്‍ കണ്ടെത്തിയ വിവരങ്ങളനുസരിച്ച് മുത്തൂറ്റ് മേധാവികളെ കസ്റ്റഡിയിലെടുത്തേക്കുമെന്ന് റിപ്പോര്‍ട്ടുകള്‍. ആദായനികുതി വകുപ്പ് മുത്തൂറ്റ് ഗ്രൂപ്പുകളുടെ 60 പ്രധാന കേന്ദ്രങ്ങളിലാണ് റെയ്ഡ് നടത്തിയത്. പരിശോധനയുടെ ആദ്യ ഘട്ടത്തില്‍ തന്നെ കോടിക്കണക്കിനു രൂപയുടെ ആദായനികുതി വെട്ടിപ്പിന്റെ തെളിവുകള്‍ കണ്ടെത്തിയിരുന്നു.

മുത്തൂറ്റ് കുടുംബത്തിലെ സഹോദരന്മാരുടെ പേരുകളില്‍ വിവിധ ഗ്രൂപ്പുകളായി മാറിയ മുത്തൂറ്റ് ജോര്‍ജ്ജ്, മുത്തൂറ്റ് പാപ്പച്ചന്‍, മിനി മുത്തൂറ്റ്, മുത്തൂറ്റ് മെര്‍ക്കന്റയില്‍ എന്നിവിടങ്ങളിലാണ് റെയ്ഡ് നടന്നത്. ഒപ്പം ഇവരുടെ വീടുകളിലും റെയ്ഡ് നടത്തി. സംസ്ഥാനത്തിന് പുറത്തുള്ള ചില ഓഫീസുകളിലും റെയ്ഡ് നടന്നിരുന്നു. ആര്‍ ബി ഐ അംഗീകാരം നേടി മുത്തൂറ്റ് ഫിനാന്‍സിനെ സ്വകാര്യ ബാങ്കായി പരിവര്‍ത്തനം ചെയ്യാനുള്ള ശ്രമത്തിനിടയിലാണ് കേന്ദ്ര ധനമന്ത്രാലയത്തിന്റെ ശക്തമായ തിരിച്ചടി. ഈ സാഹചര്യത്തില്‍ അത്തരം വലിയ സ്വപ്നങ്ങളൊക്കെ മുത്തൂറ്റിന് താല്‍ക്കാലികമായെങ്കിലും മാറ്റി വയ്‌ക്കേണ്ടി വരും.

മുത്തൂറ്റ് സ്ഥാപനങ്ങള്‍ക്കെതിരെ കഴിഞ്ഞ നിരവധി വര്‍ഷങ്ങളായി ഉയര്‍ന്നുവന്ന പരാതികളാണ് ഇപ്പോള്‍ പൊടിതട്ടിയെടുത്തിരിക്കുന്നതെന്നാണ് സൂചന. സ്വര്‍ണ്ണ വായ്പ, ഭവന വായ്പ, മൈക്രോ ഫിനാന്‍സ് ഉള്‍പ്പെടെയുള്ള മേഖലകളില്‍ കേരളത്തിലെ കുത്തക ഫിനാന്‍സ് ഗ്രൂപ്പായിരുന്നു മുത്തൂറ്റ്. അതിനെ റിസര്‍വ് ബാങ്ക് അംഗീകാരമുള്ള ബാങ്കായി മാറ്റുന്നതിനുള്ള പരിശ്രമമാണ് ഇപ്പോള്‍ ആദായ നികുതി വകുപ്പ് പൊളിച്ചടുക്കിയിരിക്കുന്നത്.നികുതി വെട്ടിപ്പ്, കുഴല്‍പ്പണം, കള്ളപ്പണ നിക്ഷേപം, വരുമാനത്തില്‍ കവിഞ്ഞ സ്വത്ത് സമ്പാദനം, സ്വത്ത് തട്ടിയെടുക്കല്‍ തുടങ്ങി സാമ്പത്തിക കുറ്റകൃത്യങ്ങളുടെ ഗണത്തിലെ പ്രധാന പരാതികളെല്ലാം മുത്തൂറ്റിനെതിരെയുണ്ട്. ഈ പരാതികളുടെ ആധികാരികതയാണ് ഇപ്പോള്‍ പരിശോധിച്ചുകൊണ്ടിരിക്കുന്നത്. എന്നാല്‍ പരാതികള്‍ ശരിവയ്ക്കുന്ന വിധം ഗുരുതരമായ ക്രമക്കേടുകളുടെ രേഖകളാണ് മുത്തൂറ്റ് ഷെല്‍ഫുകളില്‍ നിന്നും ആദായ നികുതി വകുപ്പ് ഉദ്യോഗസ്ഥര്‍ ചികഞ്ഞെടുത്തത്.കഴിഞ്ഞ മൂന്നു മാസം നടത്തിയ നിരന്തര നിരീക്ഷണങ്ങളെ തുടര്‍ന്നായിരുന്നു സ്ഥാപനത്തിനുള്ളില്‍ കടന്നുള്ള പരിശോധനയ്ക്ക് വകുപ്പ് മുതിര്‍ന്നത്. 3 മാസത്തെ നിരീക്ഷണത്തില്‍ തന്നെ ഗുരുതരമായ സൂചനകളാണ് ആദായ നികുതി വകുപ്പിന് ലഭിച്ചിരുന്നത്. 10 ലക്ഷം വനിതാ സംരംഭകരുമായി രാജ്യത്തെ മൈക്രോ ഫിനാന്‍സ് കമ്പനികളില്‍ ഏഴാം സ്ഥാനത്താണ് മുത്തൂറ്റ്. 

അടുത്ത രണ്ടു വര്‍ഷത്തിനുള്ളില്‍ ഇത് 50 ലക്ഷം സംരംഭകരാക്കി ഉയര്‍ത്തി രാജ്യത്തെ രണ്ടാമത് മൈക്രോ ഫിനാന്‍സ് സംരംഭമായി മാറാനുള്ള നീക്കത്തിലായിരുന്നു മുത്തൂറ്റ്. 2011 ല്‍ പ്രവര്‍ത്തനം തുടങ്ങിയ മുത്തൂറ്റ് ഹൗസിംഗ് ഫിനാന്‍സിനെതിരെയും ആര്‍ ബി ഐ നിയമങ്ങള്‍ പാലിക്കുന്നില്ല, ഫണ്ടുകളില്‍ തിരിമറി തുടങ്ങിയ പരാതികള്‍ ഉണ്ടായിരുന്നു. 67000 പേര്‍ക്ക് വായ്പ നല്‍കിയതിലായിരുന്നു ക്രമക്കേട് ആരോപണം. ഇത് സംബന്ധിച്ച രേഖകളും പരിശോധനയില്‍ ഉള്‍പ്പെടും.

വരും ദിവസങ്ങളില്‍ മുത്തൂറ്റ് മേധാവികളെയും ചോദ്യം ചെയ്യും. ഇവരെ കസ്റ്റഡിയിലെടുത്ത് തന്നെ ചോദ്യം ചെയ്യുന്നതിനുള്ള ആലോചനയിലാണ് ആദായനികുതി വകുപ്പ് മേധാവികള്‍. എന്നാല്‍ നിലവില്‍ നടന്നുവരുന്ന പരിശോധനകള്‍ ആദായനികുതി വകുപ്പുമായി ബന്ധപ്പെട്ട സാധാരണ നടപടിക്രമങ്ങളുടെ ഭാഗം മാത്രമാണെന്ന് മുത്തൂറ്റ് ഗ്രൂപ്പ് അസിസ്റ്റന്റ്‌റ് അക്കൌണ്ട് മാനേജര്‍ ഡിമ്പിള്‍ മൊമായ അറിയിച്ചു.