ചീഫ് സെക്രട്ടറിയായിരിക്കെ ഒരു കോടിയില്‍പ്പരം രൂപമുടക്കി ഔദ്യോഗിക വസതി മോടിപിടിപ്പിച്ചെന്ന ആരോപണത്തില്‍ ജിജി തോംസണെതിരെ വിജിലന്‍സ് അന്വേഷണം. ഔദ്യോഗിക വസതി നവീകരിക്കാന്‍ ഒരുകോടിയില്‍പ്പരം രൂപ ചെലവിട്ടെന്ന ആരോപണത്തില്‍ വീട്ടില്‍ പരിശോധന നടത്തിയ ശേഷമാണ് ത്വരിതപരിശോധന നടത്താന്‍ വിജിലന്‍സ് തീരുമാനിച്ചത്.
മറ്റു സംസ്ഥാനങ്ങളുടെ മാതൃകയില്‍ കേരളത്തിലും ചീഫ് സെക്രട്ടറിക്കായി ഔദ്യോഗിക വസതി വേണമെന്ന ആഗ്രഹത്തോടെയാണ് കഴിഞ്ഞവര്‍ഷം ആദ്യം ജിജി തോംസണ്‍ ചീഫ് സെക്രട്ടറിയായിരിക്കെ മന്മോഹന്‍ ബംഗല്‍വിന് സമീപത്തെ സ്ഥലത്ത് വസതി സജ്ജീകരിച്ചത്. ഇതിനായി സ്വകാര്യ ആര്‍ക്കിടെക്ടിന് നിര്‍മ്മാണാനുമതി നല്‍കിയതുമുതല്‍ വന്‍ ആരോപണങ്ങള്‍ ഉയര്‍ന്നിരുന്നു. സര്‍ക്കാര്‍ വക പൊതുമരാമത്ത് പണികള്‍ക്ക് ടെന്‍ഡര്‍ ക്ഷണിച്ചുവേണം നിര്‍മ്മാണാനുമതി നല്‍കാനെന്ന കേന്ദ്ര വിജിലന്‍സ് കമ്മിഷന്റെ കര്‍ശന നിര്‍ദ്ദേശം മാനിക്കാതെയാണ് നിര്‍മ്മാണം നടക്കുന്നതെന്ന് അന്ന് ആരോപണം ഉയര്‍ന്നിരുന്നു.
ഔദ്യോഗിക വസതി സജ്ജീകരിക്കാന്‍ ഒരു കോടി ആറുലക്ഷത്തില്‍പ്പരം രൂപയുടെ നിര്‍മ്മാണ പ്രവൃത്തികള്‍ക്ക് അനുമതി നല്‍കിയതിനെ തുടര്‍ന്നാണ് ആരോപണം ഉയര്‍ന്നത്. മന്ത്രിമന്ദിരങ്ങളേക്കാള്‍ സുഖസൗകര്യങ്ങളും ആര്‍ഭാടങ്ങളും ഉള്‍പ്പെടുത്തിയുള്ള വസതി നിര്‍മ്മാണം ചീഫ് സെക്രട്ടറിയുടെ അഴിമതിയാണെന്ന് കേരള ഗവ. കോണ്‍ട്രാക്ടേഴ്‌സ് സംഘടനകള്‍ ആരോപിക്കുകയും ചെയ്തു.
വീടിന്റെ മുന്നില്‍ പുല്‍ത്തകിടിക്ക് എട്ടുലക്ഷം, ടൈല്‍സ് പാകാന്‍ പത്തുലക്ഷം, അടുക്കളയ്ക്ക് 15 ലക്ഷം എന്നിങ്ങനെ ഒരുകോടി ആറുലക്ഷത്തില്‍പ്പരം രൂപയ്ക്ക് അടങ്കല്‍ സമര്‍പ്പിക്കുകയും 85 ലക്ഷത്തിന് ഭരണാനുമതി ലഭിക്കുകയും ചെയ്തിരുന്നു. മന്മോഹന്‍ ബംഗല്‍വിന് സമീപത്തെ നാലുകോടി വിലവരുന്ന മന്ദിരമാണ് ചീഫ് സെക്രട്ടറിയുടെ ഔദ്യോഗിക വസതിയാക്കി മാറ്റിയത്.
ഈ മോടിപിടിപ്പിക്കലുകൊണ്ട് പക്ഷേ, ഗുണമുണ്ടായത് ജിജി തോംസണ് മാത്രമായിരുന്നെന്നും പിന്നീട് ആക്ഷേപമുയര്‍ന്നു. തുടര്‍ന്ന് ചീഫ് സെക്രട്ടറിമാര്‍ ആയവര്‍ ഇങ്ങോട്ട് താമസം മാറാതിരുന്നതോടെ ഇക്കുറി ഇത് മന്ദ്രിമന്ദിരമായി മാറി. ഇതോടെ ഇനിയങ്ങോട്ട് ചീഫ് സെക്രട്ടറിക്ക് ഔദ്യോഗിക വസതിയുണ്ടാകില്ലേ എന്ന ആശങ്കയിലാണ് മുതിര്‍ന്ന ഐഎഎസ് ഉദ്യോഗസ്ഥര്‍.ജിജി തോംസണ്‍ ഏറ്റെടുത്ത് നവീകരിച്ച 'സുമാനുഷം' എന്ന പേരിലുള്ള ഈ വീട് പൊതുഭരണ വകുപ്പ് അനുവദിച്ചത് ഇപ്പോള്‍ മന്ത്രി കടകംപള്ളി സുരേന്ദ്രനാണ്.