ഗബ്രിയേലിനു പറ്റിയത് രണ്ടബദ്ധം, എടിഎംല്‍ വച്ച കാമറ എടുക്കാന്‍ മറന്നു, കേരളാ പോലീസും ഹൈടെക് ആണെന്ന് അറിഞ്ഞിരുന്നില്ല, രണ്ടു ദിവസം മുംബൈയില്‍ തങ്ങിയത് അബദ്ധമായി
തിരുവനന്തപുരം ആല്‍ത്തറയിലെ എടിഎം മോഷണക്കേസില്‍ പ്രതി ഗബ്രിയേലിനെ പിടികൂടാന്‍ സഹായിച്ചത് എടിഎം ല്‍ മോഷ്ടാക്കള്‍ തന്നെ സ്ഥാപിച്ച കാമറ. എടിഎം കവര്‍ച്ചയ്ക്കിടെ സംഭവിച്ച രണ്ട് അബദ്ധങ്ങളാണു തട്ടിപ്പു നടന്ന എടിഎം പൊലീസ് കണ്ടെത്താനും താന്‍ അറസ്റ്റിലാകാനും കാരണമെന്നു ചോദ്യംചെയ്യലിനിടെ മരിയന്‍ ഗബ്രിയേല്‍ പോലീസിനോട് പറഞ്ഞു.
ആല്‍ത്തറയിലെ എടിഎം മുറിയില്‍ സ്ഥാപിച്ച ക്യാമറയും റൗട്ടറും തിരികെയെടുകാത്തിരുന്നതും പൊലീസ് ഇത്ര വേഗം പിന്തുടരുമെന്നു പ്രതീക്ഷിക്കാത്തതിനാല്‍ രണ്ടു ദിവസം കൂടി മുംബൈയില്‍ താമസിച്ചതും പിടിക്കപ്പെടാന്‍ കാരണമായതായി ഗബ്രിയേല്‍.
റുമേനിയയില്‍ നിന്ന് ഒരുമിച്ചു പദ്ധതിയിട്ടാണു സംഘം വിവിധ ദിവസങ്ങളിലായി മുംബൈയില്‍ എത്തിയത്. മുംബൈയില്‍ തട്ടിപ്പു നടത്തി പണം സമ്പാദിച്ചശേഷം മടങ്ങാനായിരുന്നു ആദ്യ പദ്ധതി.സമീപ രാജ്യമായ ബള്‍ഗേറിയയില്‍ നിന്നാണു ക്യാമറയും റൗട്ടറും വ്യാജ കാര്‍ഡുകളും വാങ്ങിയതെന്നും ഗബ്രിയേല്‍ പൊലീസിനോടു പറഞ്ഞു. മുംബൈയില്‍ ഉപയോഗിക്കാത്ത കാര്‍ഡുകള്‍ കൊണ്ടു നാട്ടില്‍ തിരിച്ചെത്തിയശേഷം ഇടപാടു നടത്താനായിരുന്നു പദ്ധതി.
എന്നാല്‍, അവിടത്തെ എടിഎമ്മുകളിലെ തിരക്കു കാരണം കേരളത്തിലേക്ക് എത്തുകയായിരുന്നു. തലസ്ഥാനത്തു നാലു ഹോട്ടലുകളിലായി തങ്ങി നഗരത്തിലെ അന്‍പതിലേറെ എടിഎമ്മുകള്‍ പരിശോധിച്ചു. ഇതില്‍ റൗട്ടര്‍ ഘടിപ്പിക്കാന്‍ ഏറ്റവും സൗകര്യം ആല്‍ത്തറയിലെ എടിഎമ്മില്‍ മാത്രമായിരുന്നു. ആദ്യം ഒരു ക്യാമറ സ്ഥാപിക്കുകയും പിറ്റേന്ന് ഇത് ഇളക്കിമാറ്റി മറ്റൊന്നു വയ്ക്കുകയും ചെയ്തു. ബാറ്ററിയുടെ ചാര്‍ജ് തീരുന്നതിനാല്‍ ഇങ്ങനെ ഒരാഴ്ചയ്ക്കിടെ മൂന്നുവട്ടം ക്യാമറ മാറ്റി വക്കുകയും ചെയ്തു.
ഒരിക്കലും പിടിക്കപ്പെടില്ലെന്ന് ഉറപ്പുള്ളതിനാലാണു മുഖം മറയ്ക്കാതെ എടിഎമ്മില്‍ പ്രവേശിച്ചത്. മടങ്ങാനുള്ള തിടുക്കത്തില്‍ ക്യാമറയും റൗട്ടറും തിരികെ എടുത്തിരുന്നെങ്കില്‍ ആല്‍ത്തറ എടിഎമ്മിലേക്കു മാത്രമായി പൊലീസിന്റെ ശ്രദ്ധ പതിയില്ലായിരുന്നു. പണം പിന്‍വലിച്ചതു മുംബൈയിലായതിനാല്‍ എസ്ബിഐയുടെ സെര്‍വര്‍ ഹാക്ക് ചെയ്തു പണം കവര്‍ന്നതാണെന്നും പതിവു പരാതികളുടെ കൂട്ടത്തില്‍ ഈ തട്ടിപ്പും മുങ്ങിപ്പോകുമായിരുന്നു.
ചോര്‍ത്തിയ വിവരങ്ങളുമായി ഫ്‌ലോറിന്‍ ഇയോണും ഗബ്രിയേലുമാണു മുംബൈയിലെത്തിയത്. മറ്റു രണ്ടുപേരില്‍ ഒരാള്‍ ചെന്നൈ വഴിയും രണ്ടാമന്‍ തിരുവനന്തപുരം വിമാനത്താവളം വഴിയും രാജ്യം വിട്ടു. മുംബൈയില്‍ വച്ചു 300 വ്യാജ കാര്‍ഡുകളുണ്ടാക്കി. ഇവ ഫ്‌ലോറിന്‍ ഇയോണും ഗബ്രിയേലും ചേര്‍ന്നു പങ്കിട്ടെടുത്തു. ഗബ്രിയേല്‍ പിടിയിലാകുന്നതിന്റെ തലേന്നു ഫ്‌ലോറിന്‍ വിദേശത്തേക്കു കടന്നു. ഫ്‌ലോറിന്‍ ഇയോണിന് ഈയിടെ ചെന്നൈയില്‍ നടന്ന എടിഎം തട്ടിപ്പില്‍ പങ്കുണ്ടോ എന്നു പൊലീസ് അന്വേഷിക്കുന്നുണ്ട്. അവിടെ മൂന്നുപേര്‍ ഉള്‍പ്പെട്ട സംഘമായിരുന്നു സമാന രീതിയില്‍ റൗട്ടര്‍ സ്ഥാപിച്ചു തട്ടിപ്പിനു ശ്രമിച്ചത്. മുങ്ങിയ മൂന്നു പ്രതികള്‍ക്കായി ഇന്റര്‍പോള്‍ വഴി റെഡ് കോര്‍ണര്‍ നോട്ടിസ് പുറപ്പെടുവിച്ചിട്ടുണ്ട്.
രണ്ടു നാള്‍ കൂടി തങ്ങിയിട്ടു പോകാമെന്ന ഗബ്രിയേലിന്റെ തീരുമാനമാണു വന്‍ തട്ടിപ്പുസംഘത്തിലെ ഒരാളെയെങ്കിലും അറസ്റ്റ് ചെയ്യാന്‍ കേരള പൊലീസിനു വഴിയൊരുക്കിയത്. മറ്റു രാജ്യങ്ങളില്‍ സംഘം തട്ടിപ്പു നടത്തിയതായി സംശയമുണ്ടെങ്കിലും ഇതു സ്ഥിരീകരിക്കുന്ന വിവരങ്ങള്‍ ഇന്റര്‍പോളില്‍ നിന്നോ ഗബ്രിയേലില്‍ നിന്നോ പൊലീസിനു ലഭിച്ചിട്ടില്ല.
https://www.facebook.com/Malayalivartha
