പഠാന്‍കോട്ട് ഭീകരാക്രമണത്തില്‍ വീരമൃത്യു വരിച്ച ലഫ്. കേണല്‍ ഇ.കെ. നിരഞ്ജനു മരണാനന്തര ബഹുമതിയായി ശൗര്യചക്ര ലഭിച്ചതറിഞ്ഞു ഭാര്യ ഡോ. കെ.ജി. രാധിക പ്രതികരിച്ചതിങ്ങനെ ''രാജ്യമാണ് എല്ലാറ്റിനെക്കാളും വലുത്. രാജ്യത്തിന്റെയും ജനങ്ങളുടെയും സുരക്ഷയ്ക്കു വേണ്ടിയായിരുന്നു നിരഞ്ജന്റെ ജീവത്യാഗം''.
പെരിന്തല്‍മണ്ണ ജില്ലാ ആശുപത്രിയില്‍ ഡെന്റല്‍ സര്‍ജനാണു രാധിക ഇപ്പോള്‍. മകനു ലഭിച്ച ആദരത്തില്‍ അഭിമാനമുണ്ടെന്നു പാലക്കാട്ടുള്ള പിതാവ് ഇ.കെ. ശിവരാജന്‍ പ്രതികരിച്ചു. നിരഞ്ജന്റെ പേരിലുള്ള സ്മാരകത്തിന്റെ പ്രവര്‍ത്തനങ്ങളുമായി ബന്ധപ്പെട്ടാണു ശിവരാജന്‍ ബെംഗളൂരുവില്‍നിന്നു പാലക്കാട്ടെത്തിയത്.
നിരഞ്ജന്റെ ഓര്‍മകള്‍ നിറഞ്ഞുനില്‍ക്കുന്ന ബെംഗളൂരുവിലെ വീട്ടിലേക്ക് ഇന്നലെ ഉച്ചകഴിഞ്ഞാണു ശൗര്യചക്ര പുരസ്‌കാര വാര്‍ത്തയെത്തിയത്. കയ്യേറ്റമൊഴിപ്പിക്കലിന്റെ ഭാഗമായി ദൊഡ്ഡബൊമ്മസന്ദ്രയിലെ വീടിന്റെ ഒരു ഭാഗം പൊളിച്ചുമാറ്റാന്‍ ബെംഗളൂരു മഹാനഗരസഭ നിര്‍ദേശം നല്‍കിയതിന്റെ വിഷമത്തിലിരിക്കെ എത്തിയ പുരസ്‌കാരം അഭിമാനവും സന്തോഷവും പകരുന്നുവെന്നു സഹോദരന്‍ ഇ.കെ. ശശാങ്ക് പറഞ്ഞു.
തടാകങ്ങളും മഴവെള്ളച്ചാലുകളും നികത്തിയെടുത്തതാണെന്നറിയാതെ റിയല്‍ എസ്‌റ്റേറ്റ് കമ്പനികളില്‍നിന്നു വീട് വയ്ക്കാന്‍ സൈറ്റ് വാങ്ങിയ ആയിരക്കണക്കിനു പേര്‍ ബെംഗളൂരുവില്‍ ഇപ്പോള്‍ വീട് നഷ്ടപ്പെടുമെന്ന ഭീഷണിയിലാണ്. വീടിന്റെ കയ്യേറ്റമെന്നു കണ്ടെത്തിയ ഭാഗം സ്വന്തമായി പൊളിച്ചുനീക്കുകയാണു നിരഞ്ജന്റെ കുടുംബം ഇപ്പോള്‍.