പാകിസ്താന്റെ സ്വാതന്ത്ര്യദിനാഘോഷ വിവാദം; മലബാര് ഗോള്ഡിനെ വിമര്ശിച്ചും തിരുത്തിയും കെ.സുരേന്ദ്രന്റെ ഫേസ്ബുക്ക് പോസ്റ്റ്
പ്രമുഖ ജ്വല്ലറി ബ്രാന്ഡായ മലബാര് ഗോള്ഡ് ആന്ഡ് ഡയമണ്ട്സിനെ വിമര്ശിച്ച് പോസ്റ്റ് ചെയ്ത ഫേസ്ബുക്ക് കുറിപ്പ് ബിജെപി നേതാവ് കെ സുരേന്ദ്രന് പിന്വലിച്ചതിനു പിന്നില് അദ്ദേഹത്തിന്റെ ഇരട്ടത്താപ്പാണെന്ന് വിമര്ശനം. മോഡിയുടെ ഇഷ്ടക്കാരന് വിവാദത്തില് ഉള്പ്പെടാതിരിക്കാനാണ് പോസ്റ്റ് പിന്വലിച്ചതെന്നാണ് വ്യക്തമാകുന്നത്.
നേരത്തെ പാകിസ്താന് സ്വാതന്ത്ര്യദിനാഘോഷങ്ങളുടെ ഭാഗമായി മലബാര് ഗോള്ഡ് പ്രഖ്യാപിച്ച ഓഫറുകളെ വിമര്ശിച്ചുകൊണ്ട് കെ സുരേന്ദ്രന് പോസ്റ്റ് ചെയ്തത് ഏറെ വാര്ത്താ പ്രാധാന്യം നേടിയിരുന്നു. പോസ്റ്റ് പ്രത്യക്ഷപ്പെട്ടതോടെ ജ്വല്ലറിക്കെതിരെ സോഷ്യല് മീഡിയകളില് കടുത്ത വിമര്ശനങ്ങളാണ് ഉയര്ന്നിരുന്നത്. തെറ്റു പറ്റിയിട്ടുണ്ടെങ്കില് കമ്പനി പുനഃപരിശോധിക്കണമെന്നു ആവശ്യപ്പെട്ട് സുരേന്ദ്രന് പോസ്റ്റ് ചെയ്ത കുറിപ്പിനു താഴെ ചിലര് മലബാര് ഗോള്ഡിനെ രാജ്യദ്രോഹികളെന്നു വരെ മുദ്രകുത്തി കുറ്റപ്പെടുത്തുകയും ചെയ്തിരുന്നു. ഇന്ത്യയുടെ സ്വാതന്ത്യദിനത്തിനു മുമ്പ് പാകിസ്താന്റെ സ്വാതന്ത്ര്യദിനാഘോഷങ്ങള്ക്ക് മലബാര് ഗോള്ഡ് തുടക്കം കുറിച്ചതിനെ മറ്റു ബിജെപി നേതാക്കളും വിമര്ശിച്ചിരുന്നു.
എന്നാല് വിവാദം കത്തി നില്ക്കുന്നതിനിടെയാണ് കെ സുരേന്ദ്രന് പോസ്റ്റ് പിന്വലിച്ചത്. ജ്വല്ലറിയുടെ പ്രമോഷനു വേണ്ടിയാണ് ഇത്തരത്തിലൊരു ഓഫര് മലബാര് ഗോള്ഡ് മുന്നോട്ട് വച്ചതെന്നും. രാജ്യാന്തര തലത്തില് വേരുകളുള്ള സ്ഥാപനത്തിന്റെ പാകിസ്താന് ഉപയോക്താക്കള്ക്കായി മാത്രമാണ് പാകിസ്താന് സ്വാതന്ത്ര്യദിന ക്വിസും പ്രത്യേക ആനുകൂല്യങ്ങളുമൊക്കെ ഏര്പ്പെടുത്തിയിരിക്കുന്നതെന്നുമുള്ള ജ്വല്ലറിയുടെ വിശദീകരണത്തില് തൃപ്തിയുണ്ടെന്നറിയിച്ചായിരുന്നു സുരേന്ദ്രന്റെ പിന്മാറ്റം. ചില സുഹൃത്തുക്കളുടെ നിര്ദ്ദേശത്തെ തുടര്ന്നാണ് പോസ്റ്റു പിന്വലിക്കുന്നതെന്നും അന്ന് സുരേന്ദ്രന് വിശദീകരിച്ചിരുന്നു.
എന്നാല് അദ്ദേഹത്തിന്റെ വിശദീകരണം പച്ചക്കള്ളമാണെന്നും പോസ്റ്റ് പിന്വലിക്കാനുള്ള യഥാര്ത്ഥ കാരണം യുഎഇ എക്സ്ചേഞ്ചിന്റെ പാകിസ്താന് സ്വാതന്ത്ര്യദിനാഘോഷ ചിത്രങ്ങള് പുറത്തുവന്നതാണെന്നാണ് ഇപ്പോള് വ്യക്തമായിരിക്കുന്നത്.
പ്രധാനമന്ത്രി നരേന്ദ്ര മോഡിയുടെ ഇഷ്ടക്കാരനായ യുഎഇ എക്സ്ചേഞ്ച് മേധാവി സുധീര് ഷെട്ടിയും അദ്ദേഹത്തിന്റെ ജീവനക്കാരും പാകിസ്താന്റെ സ്വാതന്ത്ര്യദിനം ആഘോഷിക്കുന്ന ചിത്രങ്ങളാണ് പുറത്തുവന്നത്.
സുധീര് ഷെട്ടി ബിജെപിക്കും കേന്ദ്രസര്ക്കാറിനും ഏറെ പ്രിയങ്കരനാണെന്നതു മാത്രമല്ല നരേന്ദ്ര മോഡി യുഎഇയില് എത്തിയപ്പോള് അദ്ദേഹത്തിന് ആവശ്യമായ എല്ലാ സഹായവും ഒരുക്കി സ്വീകരിക്കാന് മുന്കൈ എടുത്തതും ഷെട്ടിയുടെ യുഎഇ എക്സ്ചേഞ്ചായിരുന്നു. അതുകൊണ്ടു തന്നെ സുരേന്ദ്രന്റെ പോസ്റ്റിനെ പിന്പറ്റി പാകിസ്താന് സ്വാതന്ത്ര്യദിനാഘോഷങ്ങളെ ആക്രമിക്കുമ്പോള് അതിന്റെ കുന്തമുന സുധീര് ഷെട്ടിയിലേക്കും നീണ്ടേക്കാം എന്ന മുന്കാഴ്ചയാണ് പോസ്റ്റ് അപ്രത്യക്ഷമായതിനു പിന്നിലെന്ന് വ്യക്തം. മോഡിയുടെ അടുപ്പക്കാരനെ വിമര്ശനത്തിന് വിട്ടുകൊടുക്കാന് താന് കാരണമായേക്കും എന്ന് ബോധ്യമായതോടെയാണ് സുരേന്ദ്രന് പോസ്റ്റ് പിന്വലിച്ചത്.
ഇതിനിടെ, പാകിസ്താന്റെ സ്വാതന്ത്ര്യദിനവുമായി ബന്ധപ്പെട്ട ഓഫറുകള് പ്രഖ്യാപിച്ചുള്ള ഫേസ്ബുക്ക് പോസ്റ്റും ഫോട്ടോയും ഇന്ത്യയില് കാണാത്ത വിധം നീക്കം ചെയ്തു മലബാര് ഗോള്ഡ് തടിതപ്പുകയും ചെയ്തു. എട്ടുലക്ഷത്തിലേറെപ്പേര് ലൈക്ക് ചെയ്തിട്ടുള്ള ഫേസ്ബുക്ക് പേജിലാണ് ഓഫറിന്റെ കാര്യം പറഞ്ഞിരുന്നത്. ഇന്ത്യയുടെ സ്വാതന്ത്ര്യദിനത്തെക്കുറിച്ചു പരാമര്ശമൊന്നും കാണാതിരിക്കുകയും ഇന്ത്യയില് നിന്നുള്ള കമ്പനിയായിട്ടു പോലും പാകിസ്താന്റെ സ്വാതന്ത്ര്യദിനത്തിനു മാത്രമായി ആനുകൂല്യങ്ങള് പ്രഖ്യാപിച്ചതിനെ സോഷ്യല്മീഡിയയില് വിചാരണക്ക് വിധേയമാക്കിയിരുന്നു. കൂടാതെ ഇക്കാര്യത്തില് പ്രതിഷേധിച്ച് മലബാര് ഗോള്ഡിന്റെ കസ്റ്റമര് കെയറിലേക്ക് വിളിച്ച് ഇടപാടുകാര് പരാതിപ്പെടുകയും ചെയ്തിരുന്നു. പല ഉപയോക്താക്കളും മലബാര് ഗോള്ഡ് കസ്റ്റമര്കെയര് ജീവനക്കാരുമായി നടത്തിയ സംഭാഷണങ്ങള് സോഷ്യല് മീഡിയയില് വൈറലാകുകയും ചെയ്തു.
മലബാര് ഗോള്ഡു പോലെ ഗള്ഫ് രാജ്യങ്ങളില് പ്രവര്ത്തിക്കുന്ന പല ഇന്ത്യന് കമ്പനികളും പാകിസ്താന്റെ സ്വാതന്ത്ര്യദിനം ആഘോഷിക്കാറുണ്ട്. ഇവിടങ്ങളില് പാകിസ്താന് സ്വദേശികള്ഡ ധാരാളമുള്ളതുകൊണ്ടാണ് ഇത്തരത്തില് ആഘോഷങ്ങള് നടത്തുന്നതും. എന്നാല്, ഇത്തരം ആഘോഷങ്ങളുടെ പ്രചാരണം അതാതു രാജ്യങ്ങളില് മാത്രം ഒതുക്കി നിര്ത്താറാണു പതിവ്. എന്നാല് സെറ്റിങ്സ് രൂപപ്പെടുത്തിയതില് വന്ന പിഴവാണ് മലബാര് ഗോള്ഡിനെ വിവാദത്തിലേക്ക് വലിച്ചിഴച്ചത്. സംഭവം വിവാദമായതോടെ ആനുകൂല്യങ്ങള് യുഎഇയില് മാത്രം കാണത്തക്കവിധം മലബാര് ഗോള്ഡ് പരിഷ്കരിക്കുകയും ചെയ്തിട്ടുണ്ട്.
https://www.facebook.com/Malayalivartha
