ജനങ്ങളെ ആക്രമിക്കുന്ന തെരുവ് നായ്ക്കളെ വെടിവെച്ചുകൊല്ലണമെന്ന് വ്യവസായി കൊച്ചൗസേപ്പ് ചിറ്റിലപ്പള്ളി. തിരുവനന്തപുരത്ത് വീട്ടമ്മയെ തെരുവ് നായ്ക്കള്‍ കടിച്ചുകൊന്ന സംഭവത്തിലാണ് കൊച്ചൗസേപ്പ് ചിറ്റിലപ്പള്ളി രംഗത്തെത്തിയത്. തന്റെ ഫേസ്ബുക്ക് പോസ്റ്റിലൂടെയാണ് ചിറ്റിലപ്പള്ളി പ്രതികരിച്ചത്.

കഴിഞ്ഞ ദിവസം വൈകുന്നേരമാണ് വീടിനു പുറത്തിറങ്ങിയ പുല്ലുവിള സ്വദേശി സിലുവമ്മയെ നായ്ക്കള്‍ ആക്രമിച്ചത്. ഇവരുടെ കൈകാലുകള്‍ നായ്ക്കള്‍ കടിച്ചുതിന്ന നിലയിലായിരുന്നു.

50ല്‍ പരം വരുന്ന നായകൂട്ടമാണ് ആക്രമിച്ചത്. പുറത്തേക്കിറങ്ങിയ സിലുവമ്മയെ കാണാതായതിനെ തുടര്‍ന്ന് അമ്മയെ അന്വേഷിച്ചു കടപ്പുറത്ത് എത്തിയ സെല്‍വരാജ് കടപ്പുറത്ത് നായകൂട്ടം സിലുവമ്മയേ കടിച്ചു വലിക്കുന്നതു കണ്ടു.

അവരെ രക്ഷിക്കാന്‍ ശ്രമിക്കുന്നതിന്റെ ഇടയില്‍ സെല്‍വരാജിനും കടിയേറ്റു. സിലുവമ്മയെ ഉടന്‍ ആശുപത്രിയിലേക്കു കൊണ്ടുപോകാന്‍ ശ്രമിച്ചെങ്കിലും അപ്പോഴേക്കും മരിച്ചിരുന്നു. പുല്ലുവിള സ്വദേശി ഡെയ്‌സിക്കും നായയുടെ ആക്രമണത്തില്‍ ഗുരുതര പരുക്കേറ്റു. ഇവരെ തിരുവനന്തപുരം മെഡിക്കല്‍ കോളജ് ആശുപത്രിയിലേക്കു മാറ്റിയിരിക്കുകയാണ്.