സര്ക്കാര് ഓഫീസുകളില് ജോലി സമയത്ത് പൂക്കളം ഒരുക്കേണ്ടെന്ന് മുഖ്യമന്ത്രി
സര്ക്കാര് ഓഫിസുകളില് ജോലി സമയത്ത് പൂക്കളം ഒരുക്കേണ്ടെന്ന് മുഖ്യമന്ത്രി പിണറായി വിജയന്. ഓണക്കാലത്ത് സര്ക്കാര് ഓഫീസുകള് കച്ചവടക്കാരുടെ കേന്ദ്രങ്ങളാക്കാന് അനുവദിക്കില്ലെന്നും മുഖ്യമന്ത്രി പറഞ്ഞു. സാധനങ്ങള് വാങ്ങേണ്ടവര് പുറത്തുപോയി വാങ്ങണമെന്നും അദ്ദേഹം കൂട്ടിച്ചേര്ത്തു.
ഓണാഘോഷം എല്ലാ സര്ക്കാര് ഓഫീസുകളിലും നടക്കാറുണ്ട്. അത്തരം ആഘോഷങ്ങളും പൂക്കളമത്സരം പോലുള്ളവയും ഓഫീസ് സമയത്തു നടത്തുന്നത് ഉചിതമല്ല. അവധി ദിവസങ്ങളിലോ ഓഫീസ് സമയം അല്ലാത്തപ്പോഴോ ആഘോഷം നടത്തിയാല് പ്രവൃത്തി സമയത്തെ ബാധിക്കില്ല. ഏത് ആഘോഷവും ഔദ്യോഗിക കൃത്യ നിര്വഹണത്തെ ബാധിക്കാത്ത നിലയിലാണ് സര്ക്കാര് ഓഫീസുകളില് നടക്കേണ്ടത്. ഇക്കാര്യത്തില് സര്ക്കാറിന്റെ ഇടപെടല് ഉറപ്പാക്കുമെന്നും ഫേസ്ബുക്കില് പിണറായി വിശദീകരിച്ചു.
സര്ക്കാര് ഓഫീസുകളുടെ പ്രവര്ത്തനം കൃത്യമായി നടക്കുക എന്നാല് ജനങ്ങളെ ബാധിക്കുന്ന വിഷയങ്ങളില് യഥാസമയം തീര്പ്പുണ്ടാക്കുക എന്നാണര്ത്ഥം. അതിനു നാനാ തരത്തിലുള്ള ഇടപെടലും ജാഗ്രതയും വേണ്ടതുണ്ട്. ജോലി സമയത്ത് എല്ലാ ജീവനക്കാരും സീറ്റില് ഉണ്ടാവുക പ്രധാനമാണെന്നും മുഖ്യമന്ത്രി പറഞ്ഞു.
എന്നാല് മുഖ്യമന്ത്രിയുടെ ഉത്തരവിനെതിരെ പ്രതിപക്ഷ നേതാവ് രമേശ് ചെന്നിത്തല രൂക്ഷ വിമര്ശനവുമായി രംഗത്തെത്തി. ജോലിസമയം നഷ്ടപ്പെടുത്താതെ സര്ക്കാര് ഓഫീസുകളില് പൂക്കളമൊരുക്കുന്നതില് എന്ത് തെറ്റാണുള്ളതെന്നും അദ്ദേഹം ചോദിച്ചു.
https://www.facebook.com/Malayalivartha
