നടിയുടെ രണ്ടു ഡ്രൈവര്മാരും ചേര്ന്ന് തട്ടികൊണ്ടുപോയ് ബ്ലാക് മെയിലിംഗ് ചെയ്യാന് പദ്ധതി ഇട്ടതായി പോലീസ്
കൊച്ചിയില് നടിയെ തട്ടിക്കൊണ്ടുപോയ് പീഡിപ്പിയ്ക്കാന് ശ്രമിച്ച കേസില് നടിയുടെ മുന് ഡ്രൈവറായിരുന്ന പെരുമ്പാവൂര് സ്വദേശി പള്സര് സുനിലാണ് സംഭവത്തിന് പിന്നില് പ്രവര്ത്തിച്ചതെന്ന് പൊലീസ് പറയുന്നു. നടിയുടെ ഡ്രൈവര് കൊരട്ടി സ്വദേശി മാര്ട്ടിനെ പോലീസ് അറസ്റ്റ് ചെയ്തു. മാര്ട്ടിനും നടിയുടെ മുന് ഡ്രൈവര് കൂടിയായ പള്സര് സുനിയെന്ന സുനില് കുമാറും തമ്മിലുള്ള ഗൂഢാലോചനയാണ് സംഭവത്തിന് പിന്നിലെന്നാണ് പോലീസ് പറയുന്നത്.
സുനിലിനെ ഡ്രൈവര് സ്ഥാനത്തുനിന്ന് മാറ്റിയതിലെ മുന് വൈരാഗ്യമാണ് ആക്രമണത്തിന് കാരണമെന്നാണ് പ്രാഥമിക നിഗമനം. കൊലക്കേസിലടക്കം പ്രതിയാണ് സുനില് എന്നാണ് പോലീസ് പറയുന്നത്. ഇത് മനസിലാക്കിയതോടെയാണ് സുനിലിനെ നടി ഡ്രൈവര് സ്ഥാനത്തുനിന്ന് നീക്കിയത്. ഇതിനെച്ചൊല്ലി ഇരുവരും തമ്മില് വാക്കുതര്ക്കമുണ്ടാവുകയും ചെയ്തിരുന്നു. ഇതിലുള്ള വൈരാഗ്യമാണ് ആക്രമണത്തിന് കാരണം.
സുനിലിന്റെ നിദേശപ്രകാരം കഴിഞ്ഞദിവസമാണ് മാര്ട്ടിന് നടിയുടെ കാര് ഓടിക്കാന് എത്തിയത്. മാര്ട്ടിനും സുനിലും മുന്കൂട്ടി തയ്യാറാക്കിയ പദ്ധതിയായിരുന്നു ഇത്. ചലച്ചിത്ര താരങ്ങള്ക്ക് ഡ്രൈവര്മാര് ഏര്പ്പാടാക്കി കൊടുക്കുന്ന ആളാണ് സുനില്. ഇയാളുടെ പേരില് നിരവധി കേസുകളുണ്ടെന്നും പൊലീസ് പറയുന്നു.
നടി സഞ്ചരിച്ച വാഹനത്തില് പ്രതികള് സഞ്ചരിച്ചിരുന്ന വാഹനം ഇടിപ്പിച്ച് അപകടത്തിന്റെ പ്രതീതി ഉണ്ടാക്കിയ ശേഷമായിരുന്നു അഞ്ചംഗ സംഘം നടിയെ തട്ടിക്കൊണ്ടുപോയത്. മാര്ട്ടിനും ഗൂഢാലോചനയില് പങ്കാളിയാണ്. തൃശൂരില് നിന്ന് ഷൂട്ടിംഗ് കഴിഞ്ഞ മടങ്ങുകയായിരുന്ന നടിയുടെ വാഹനത്തില് വാഹനം ഇടിച്ചത് ചോദ്യം ചെയ്യാനായി പുറത്തിറങ്ങിയ മാര്ട്ടിനെ സുനിലിന്റെ നേതൃത്വത്തിലുള്ള സംഘം മര്ദ്ദിക്കുകയും നടിയുടെ വാഹനം തട്ടിയെടുക്കുമായിരുന്നു.
ഇത് ഗൂഢാലോചനയുടെ ഭാഗമായിരുന്നു. ബ്ലാക് മെയിലിംഗ് ആയിരുന്നു പ്രതികളുടെ ലക്ഷ്യമെന്ന് പോലീസ് പറഞ്ഞു. രാത്രി ഒമ്പതരയോടെയായിരുന്നു സംഭവം. രണ്ടു മണിക്കൂറിലേറെ എറണാകുളം നഗരത്തില് ചുറ്റിക്കറങ്ങിയ വാഹനം പുലര്ച്ചെയോടെ കാക്കനാട് ഭാഗത്ത് ഒരു സംവിധായകന്റെ വീടിനു സമീപം നിര്ത്തിയശേഷം രാത്രി പന്ത്രണ്ട് മണിയോടെ പ്രതികള് കടന്നു കളയുകയായിരുന്നു.
പിന്നീട് സംവിധായകന്റെ സഹായത്തോടെയാണ് നടി നെടുമ്പാശേരി പോലീസിലെത്തി പരാതി നല്കിയത്. അക്രമിസംഘം കാറില്വെച്ച് പലവട്ടം ശാരീരികമായി ഉപദ്രവിക്കാന് ശ്രമിച്ചതായി നടി മൊഴി നല്കിയിട്ടുണ്ട്. അപകീര്ത്തികരമായ രീതിയില് ചിത്രങ്ങളെടുത്തെന്നും പരാതിയിലുണ്ട്.
https://www.facebook.com/Malayalivartha
