ദൃശ്യങ്ങള് കൂട്ടുപ്രതികളെക്കൂടാതെ കോയമ്പത്തൂരിലെ ചിലരെയും സുനി കാണിച്ചതായി സംശയം; ദൃശ്യങ്ങളുടെ കോപ്പിയുണ്ടെന്ന് സൂചന
നടിയെ ആക്രമിച്ച കേസില് അറസ്റ്റിലായ പള്സര് സുനിയും വിജീഷും ഒളിവില് താമസിച്ചിരുന്ന വീട് കണ്ടെത്തി. കോയമ്പത്തൂര് ശ്രീറാം നഗറിലെ വീട്ടിലാണ് ഇരുവരും ഒളിവില് കഴിഞ്ഞിരുന്നത്. ആലുവ ഡിവൈഎസ്പിയുടെ നേതൃത്വത്തിലുള്ള സംഘം ഇവിടെയെത്തി തെളിവെടുപ്പ് നടത്തുകയാണ്. ഇതിനിടെ കോയമ്പത്തൂരില് സുനിയെ സഹായിച്ച ചാര്ളി എന്നയാള് ഒളിവില് പോയി. ഇയാള്ക്ക് വേണ്ടിയുള്ള തിരച്ചിലും തുടരുകയാണ്. നടിയുടെ ദൃശ്യങ്ങള് പകര്ത്തിയ മൊബൈല് പീളമേട്ടിലെ ടവറിന് കീഴിലാണ് അവസാനമായി ഉപയോഗിച്ചതെന്നും അന്വേഷണസംഘം കണ്ടെത്തി. സുനി കോടതിയില് എത്താന് ഉപയോഗിച്ച പള്സര് ബൈക്കിന്റെ ഉടമയെയും പൊലീസ് പിടികൂടി. പീളമേട് സ്വദേശി സെല്വന്റെ ഉടമസ്ഥതയിലുള്ള ബൈക്കാണ് സുനി ഉപയോഗിച്ചത്.
അതേസമയം, ദൃശ്യങ്ങള് കൂട്ടുപ്രതികളെക്കൂടാതെ കോയമ്പത്തൂരിലെ ചിലരെയും സുനി കാണിച്ചതായി പൊലീസ് സംശയിക്കുന്നു. ഒരുമിച്ചിരുന്നു മദ്യപിക്കുമ്പോള് സുനി തന്നെ ദൃശ്യങ്ങള് കാണിച്ചെന്ന് കൂട്ടുപ്രതിയായ മണികണ്ഠന് നേരത്തെ സമ്മതിച്ചിരുന്നു. എന്നാല്, ഇത് മറ്റെവിടേക്കെങ്കിലും പകര്ത്തിയോ എന്നതില് ഇതുവരെ വ്യക്തത വന്നിട്ടില്ല. ഇക്കാര്യം ചോദിച്ചെങ്കിലും സുനി കൃത്യമായ മറുപടി നല്കിയിട്ടില്ലെന്നും ഉദ്യോഗസ്ഥര് പറയുന്നു. ഒളിവില് പോയ ചാര്ളിയെ പിടികൂടിയാല് മാത്രമേ, ഇക്കാര്യത്തില് വ്യക്തത വരൂയെന്നാണ് പൊലീസ് പറയുന്നത്.
ഇതിനിടെ നടിയെ ആക്രമിച്ചതിനു പിന്നില് ഗൂഢാലോചനയില്ലെന്ന് പ്രതികള് ആവര്ത്തിക്കുമ്പോഴും അക്കാര്യം പൊലീസ് മുഖവിലയ്ക്കെടുത്തിട്ടില്ല. ഗൂഢാലോചനയെക്കുറിച്ച് കൂടുതല് വ്യക്തത വരുത്തേണ്ടതുണ്ട്. നടിയെ ആക്രമിക്കുന്ന രംഗം ചിത്രീകരിച്ച മൊബൈല് ഫോണ്, മെമ്മറി കാര്ഡ് എന്നിവ കണ്ടെടുക്കണം. വിളിച്ചയാളുകളുടെ കൂടുതല് വിവരങ്ങള്, അവരുമായി പ്രതികള്ക്കുള്ള ബന്ധം, കോയമ്പത്തൂരിലേക്ക് കടക്കാനും അവിടെ ഒളിവില് കഴിയാനും ഒത്താശചെയ്തവരുടെ വിശദാംശങ്ങള് എന്നിവയും അറിയേണ്ടതുണ്ട്. പ്രതികള്ക്കുവേണ്ടി വക്കാലത്തെടുത്ത അങ്കമാലിയിലെ അഡ്വ. ഇസി പൗലോസ് കോടതിയില് ഹാജരാക്കിയ മൊബൈല് ഫോണിന്റെ കാര്യത്തിലും അവ്യക്തത നിലനില്ക്കുന്നു.
https://www.facebook.com/Malayalivartha
