പെരുമ്പാവൂരിലെ ജിഷയുടെ പേരില്‍ അധികാരത്തിലെത്തിയിട്ടും എന്തേ ഇടതുപക്ഷ സര്‍ക്കാരിന് നമ്മുടെ കുഞ്ഞുങ്ങളെ സംരക്ഷിക്കാനാകുന്നില്ല. വാളയാര്‍ കഞ്ചിക്കോട് ഭാഗ്യവതിയുടെ മക്കള്‍ ശരണ്യ(9)യും സഹോദരി കൃതിക(14)യും കേരളത്തിന്റെ വേദനയാണ്.

പിണറായി വിജയന്‍ ഭരിക്കുന്ന ആഭ്യന്തരവകുപ്പില്‍ പോലീസിന്റെ തികഞ്ഞ അനാസ്ഥ. മകളെ അടുത്തബന്ധു പലതവണ ലൈംഗിക പീഡനത്തിനിരയാക്കിയെന്ന് പോലീസിനോട് വാളയാറിലെ പെണ്‍കുട്ടിയുടെ അമ്മ പറഞ്ഞിട്ടും മരണത്തെ ആത്മഹത്യയാക്കി. പതിനാലു വയസ്സുള്ള പെണ്‍കുട്ടിയുടേതും, ഒന്‍പതുവയസുകാരിയായ സഹോദരിയുടേതും ലൈംഗിക പീഡനത്തിനിരയായ മരണമെന്ന് പോസ്റ്റ്‌മോര്‍ട്ടം റിപ്പോര്‍ട്ട്. ഇളയകുട്ടിയുടേത് കൊലപാതകം തന്നെ.

മൂത്ത കുട്ടിയുടെ പോസ്റ്റ്‌മോര്‍ട്ടം റിപ്പോര്‍ട്ട് പോലീസ് അവഗണിച്ചില്ലായിരുന്നുവെങ്കില്‍ ഒന്‍പതു വയസ്സുള്ള രണ്ടാമത്തെ കുരുന്നിനെ ആ ദരിദ്ര അമ്മയ്ക്ക് നഷ്ടപ്പെടില്ലായിരുന്നു.

വളരെ നിര്‍ധനകുടുംബം. പരാതിയൊന്നും പോലീസ് ഏമാന്മാര്‍ മൈന്‍ഡുചെയ്തില്ല. പട്ടികജാതിക്കാര്‍ക്ക് നേരെ നടക്കുന്ന കുറ്റകൃത്യങ്ങള്‍ ഗൗരവമായെടുക്കണമെന്ന നിയമമൊക്കെ കാറ്റില്‍ പറത്തി. പതിന്നാലുകാരിയെ ക്രൂരമായി പീഡിപ്പിക്കുന്നതു കണ്ട ആ ഇളയകുരുന്നും പിന്നീടു പീഡനത്തിനിരയായി മൃഗീയമായി കൊല്ലപ്പെട്ടു.

മൂത്തകുട്ടിയുടെ മരണം നടന്നിട്ട് രണ്ടുമാസമായിട്ടും ഒരാളെപ്പോലും പോലീസ് കസ്റ്റഡിയിലെടുത്തില്ല. കേസന്വേഷിച്ചില്ല. തികഞ്ഞ അനാസ്ഥ.

നാലാം ക്ലാസുകാരിയുടേതും ആത്മഹത്യയെന്നു പറഞ്ഞ് അസ്തമിക്കുമായിരുന്ന കേസ് മാധ്യമശ്രദ്ധ പതിഞ്ഞതോടെ പുറംലോകമറിഞ്ഞു. ഇവര്‍ക്കുവേണ്ടി മെഴുകുതിരി കത്തിക്കാനോ, വാദിക്കാനോ രാഷ്ട്രീയക്കാരോ, സൂപ്പര്‍താരങ്ങളോ ഇല്ല.

ചാനലുകളില്‍ ഹൃദയം പൊട്ടിക്കരയുന്ന ആ അമ്മയെ കണ്ടിട്ട് കേരളം വിങ്ങുകയാണ്. എന്തേ കേരളത്തിലെ പോലീസ് ഇങ്ങനെ? ഇരട്ട ചങ്കുള്ള പിണറായിവിജയന് പോലീസിനെ നിലയ്ക്കു നിര്‍ത്താനാകുന്നില്ലേ. പണിയറിയാത്തവരെ പറഞ്ഞുവിടണം.

മരിച്ചവരില്‍ മൂത്ത പെണ്‍കുട്ടിയെ അടുത്തബന്ധു പലതവണ പീഡിപ്പിച്ചിരുന്നുവെന്ന് ഭാഗ്യവതി പോലീസിന് മൊഴി നല്കിയിരുന്നു. ഇക്കാര്യം മാധ്യമങ്ങളോട് ആ അമ്മ പറഞ്ഞപ്പോള്‍ മാത്രമാണ് പുറംലോകമറിയുന്നത്. സഹോദരിയുടെ മരണസമയത്ത് മുഖംമൂടി ധരിച്ച രണ്ടുപേര്‍ വീട്ടില്‍ നിന്നിറങ്ങിപ്പോകുന്നതായി ഇളയ സഹോദരി ശരണ്യ പോലീസിനു മൊഴി നല്കിയിരുന്നു. കൃതികയുടെ മരണത്തിലെ ഏകസാക്ഷിയും ശരണ്യതന്നെ.

ആ കുഞ്ഞിനെക്കൂടി ഇല്ലായ്മ ചെയ്യുവോളം പോലീസ് കാത്തിരുന്നു.