ആത്മഹത്യാശ്രമത്തിനിടെ ഗുരുതര പരുക്കേറ്റു തൃശൂര്‍ മെഡിക്കല്‍ കോളജ് ആശുപത്രിയില്‍ ചികിത്സയിലായിരുന്ന പൊന്നാനി സ്വദേശിയായ പത്താംക്ലാസ് വിദ്യാര്‍ഥിനി മരിച്ചു. ഞായറാഴ്ച രാത്രി അതീവ ഗുരുതരാവസ്ഥയില്‍ മെഡിക്കല്‍ കോളജ് അത്യാഹിതവിഭാഗത്തില്‍ പ്രവേശിപ്പിച്ച പെണ്‍കുട്ടി ഇന്നലെ രാവിലെ പത്തുമണിയോടെയാണ് മരിച്ചത്. പെണ്‍കുട്ടി ലൈംഗിക പീഡനത്തിന് ഇരയായതായി ഡോക്ടര്‍മാര്‍ സ്ഥിരീകരിച്ചതിനെത്തുടര്‍ന്ന് പൊന്നാനി പോലീസ് പോക്‌സോ നിയമപ്രകാരം കേസെടുത്തു. മെഡിക്കല്‍ കോളജിലെ ഫ്രീസര്‍ തകരാറിലായതിനെത്തുടര്‍ന്ന് മൃതദേഹം ജില്ലാ ജനറല്‍ ആശുപത്രിലെത്തിച്ചാണ് ഇന്‍ക്വസ്റ്റ് നടത്തിയത്.

തിരൂര്‍ സര്‍ക്കിള്‍ ഇന്‍സ്‌പെക്ടര്‍ ജോസഫ്, പൊന്നാനി എസ്.ഐ. സന്തോഷ് എന്നിവരുടെ നേതൃത്വത്തിലാണ് ഇന്‍ക്വസ്റ്റ് രേഖപ്പെടുത്തിയത്. മലപ്പുറം ജില്ലയില്‍ നിന്നുള്ള ഫോറന്‍സിക് സംഘവും പരിശോധന നടത്തി. കുട്ടിയെ പൊന്നാനിയിലെ സ്വകാര്യ ആശുപത്രിയിലാണ് ആദ്യം പ്രവേശിപ്പിച്ചത്. എസ്.എസ്.എല്‍.സി. പരീക്ഷയെഴുതുന്ന കുട്ടി പഠിക്കാതിരുന്നപ്പോള്‍ അമ്മ വഴക്കു പറഞ്ഞതിനെത്തുടര്‍ന്നു തൂങ്ങിമരിക്കാന്‍ ശ്രമിക്കുകയായിരുന്നുവെന്നാണു ബന്ധുക്കള്‍ അറിയിച്ചത്. എന്നാല്‍ കുട്ടിയെ പരിശോധിച്ച ഡോക്ടര്‍ കുട്ടിയുടെ രഹസ്യഭാഗത്ത് പരുക്കു കണ്ടതില്‍ സംശയം തോന്നി പോലീസില്‍ അറിയിച്ചു. കുട്ടിയുടെ നില ഗുരുതരമായതിനെത്തുടര്‍ന്നാണ് ലോക്കല്‍ പോലീസ് എത്തുന്നതിനു മുമ്പ് ബന്ധുക്കള്‍ കുട്ടിയെ തൃശൂര്‍ മെഡിക്കല്‍ കോളജിലേക്കെത്തിച്ചത്. 

മെഡിക്കല്‍ കോളജിലെ ഗൈനക്കോളജി വിഭാഗം മേധാവി ഡോ.കെ.ജെ. ജേക്കബ് ഉള്‍പ്പെടുന്ന സംഘം പ്രാഥമിക പരിശോധന നടത്തിയപ്പോഴേക്കും കുട്ടി അബോധാവസ്ഥയിലായിരുന്നു. അതേത്തുടര്‍ന്നാണ് കുട്ടിയെ വെന്റിലേറ്ററില്‍ പ്രവേശിപ്പിച്ചത്. വടക്കാഞ്ചേരി മജിസ്‌ട്രേറ്റ് ആശുപത്രിയിലെത്തി കുട്ടിയുടെ മൊഴി രേഖപ്പെടുത്താന്‍ ശ്രമിച്ചെങ്കിലും സാധിച്ചില്ല. ഡോക്ടര്‍മാരുടെ പ്രാഥമിക പരിശോധനയില്‍ തന്നെ പീഡനം സ്ഥിരീകരിച്ചിരുന്നു. ഗള്‍ഫിലുള്ള പെണ്‍കുട്ടിയുടെ പിതാവ് മരണവാര്‍ത്തയറിഞ്ഞ് ഹൃദയാഘാതമുണ്ടായി ചികിത്സയിലാണ്. പോസ്റ്റ്‌മോര്‍ട്ടത്തിനുശേഷം ഇന്നലെ വൈകിട്ട് മൃതദേഹം ബന്ധുക്കള്‍ക്ക് വിട്ടുകൊടുത്തു.