ഉത്തരവിട്ട് മാസങ്ങളായിട്ടും യാതൊരുവിധ നിര്‍മാണ പ്രവര്‍ത്തനങ്ങളും പുരോഗമിച്ചിട്ടില്ല. അതിര്‍ത്തി വേര്‍തിരിച്ചിട്ടില്ലാത്തിനാല്‍ വഴിയോരക്കച്ചവടക്കാരുടെ പ്രധാന ച്ചവട കേന്ദ്രം സ്റ്റാന്‍ഡിനകമാണ് . കൂടാതെ ബസ് കാത്തു നില്‍ക്കുന്ന യാത്രക്കാര്‍ക്കിടയിലേക്ക് പുറത്തുനിന്നുള്ള വാഹനങ്ങള്‍ ഓടിച്ചുകയറുന്നുണ്ട്. സമീപത്തെ വ്യാപാര സ്ഥാപനങ്ങളിലേക്ക് എത്തുന്ന വാഹനങ്ങള്‍ ബസ് സ്റ്റാന്‍ഡില്‍ നിര്‍ത്തിയിടുന്നു. ഇതെല്ലാം പരിഗണിച്ചാണ് മതില്‍കെട്ടാന്‍ ഹൈക്കോടതി ഉത്തരവിട്ടത്.

കോഫി ഹൗസിനോട് ചേര്‍ന്ന ഭാഗത്ത് 200 മീറ്റര്‍ നീളത്തിലാണ് ചുറ്റുമതില്‍ കെട്ടാനുള്ളത്. ഇതുകൂടി പൂര്‍ത്തിയായാല്‍ സ്റ്റാന്‍ഡിന് നാലുവശവും അതിര്‍ത്തി വേര്‍തിരിവുണ്ടാകുകയും ബസ് സ്റ്റാന്‍ഡ് പരിസരം സുരക്ഷിതമാകുകയും ചെയ്യും. 2014 ഫെബ്രുവരിയിലാണ് സ്റ്റാന്‍ഡ് നിര്‍മാണം പൂര്‍ത്തിയായത്. അന്ന് മുതല്‍ ചുറ്റുമതില്‍ കെട്ടുന്നത് പരിഗണനയിലുണ്ട്. പക്ഷേ നിര്‍മ്മാണം തടസ്സപ്പെടുത്താന്‍ പലവിധ സമ്മര്‍ദ്ദങ്ങളാണ് കെ.എസ്.ആര്‍.ടി.സിക്കു മേലുള്ളത്. ഇതിനിടെ മതില്‍കെട്ടരുതെന്നാവശ്യപ്പെട്ട് കേസ് കോടതിയിലുമെത്തി.

സ്റ്റാന്റിനുള്ളിലെ കടമുറികള്‍ ഏറ്റെടുക്കാന്‍ വ്യാപാരികള്‍ മടിക്കുകയാണ്. കെ.ടി.ഡി.എഫ്.സി. നിര്‍മിച്ച വ്യാപാരസമുച്ചയം സെന്‍ട്രല്‍ സ്‌റ്റേഷനിലുള്ളിലാണ്. ബസ് സ്റ്റാന്‍ഡിലെ വാടക നല്‍കിയാല്‍ തങ്ങള്‍ക്ക് മുതലാകില്ലെന്നാണ് കച്ചവടക്കാര്‍ പറയുന്നത്. സ്റ്റാന്റിനുള്ളിലെ സ്ഥാപനങ്ങളില്‍ കച്ചവടവും കുറവാണ്.

വളരെയധികം യാത്രക്കാര്‍ വന്നുപോകുന്ന സ്റ്റാന്‍ഡിലെ തിരക്ക് പരിഗണിച്ചാണ് കെ.ടി.ഡി.എഫ്.സി. ഇവിടെ 35 കോടി രൂപ മുടക്കി വ്യാപാരസമുച്ചയം നിര്‍മിച്ചത്. 250 കാറുകളും ആയിരത്തിലധികം ഇരുചക്രവാഹനങ്ങളും പാര്‍ക്ക് ചെയ്യാനുള്ള സൗകര്യമുണ്ടെങ്കിലും ഷോപ്പിംഗ് കോംപ്ലക്‌സ് എന്ന സംരംഭം വിജയത്തിലെത്തിക്കാനായില്ല. നാമമാത്രമായ കടമുറികള്‍ മാത്രമാണ് ഇപ്പോള്‍ പ്രവര്‍ത്തിക്കുന്നത്. വ്യാപാരസമുച്ചയത്തിലേക്ക് യാത്രക്കാരെ എത്തിക്കാന്‍ കഴിയുന്നവിധത്തിലല്ല സ്റ്റാന്‍ഡിലെ ക്രമീകരണം. ഈ പാളിച്ച കെ.ടി.ഡി.എഫ്.സി. നിരവധി തവണ ചൂണ്ടിക്കാണിച്ചിട്ടും പരിഹരിക്കാന്‍ കെ.എസ്.ആര്‍.ടി.സി. തയാറായിട്ടില്ല.

കെ.എസ്.ആര്‍.ടി.സി.യുടെ സ്വത്ത് വകകള്‍ സംരക്ഷിക്കേണ്ടത് ചീഫ് ഓഫീസിലെ എസ്‌റ്റേറ്റ് വിഭാഗത്തിന്റെ ചുമതലയാണ്. ഹ്രസ്വദൂര ബസുകള്‍ക്കായി സ്റ്റാന്റിന്റെ അതിര്‍ത്തിയോട് ചേര്‍ന്നാണ് അടുത്തിടെ കാത്തിരിപ്പു കേന്ദ്രങ്ങള്‍ നിര്‍മിച്ചത്. ഈ പ്രദേശമാണ് ചുറ്റുമതില്‍ കെട്ടാനുള്ളത്. സ്വകാര്യ വാണിജ്യസമുച്ചയത്തിന് സാമ്പത്തിക നേട്ടമുണ്ടാക്കാന്‍ കെ.എസ്.ആര്‍.ടി.സി. കൂട്ടുനില്‍ക്കുന്നുവെന്ന് ആരോപണം ഉയരുന്നുണ്ട്