മന്ത്രി എ.കെ ശശീന്ദ്രന്റെ രാജിക്ക് ഇടയാക്കിയ മംഗളം ടിവിയുടെ ഫോണ്‍കെണിക്കേസില്‍ ചാനല്‍ മേധാവിയടക്കമുളള ജീവനക്കാരെ പൊലീസ് അറസ്റ്റ് ചെയ്തതില്‍ പ്രതിഷേധിച്ച് ഒന്നാം പേജ്ില്‍ കറുപ്പടിച്ച് മംഗളം ദിനപത്രം. ഇന്നിറങ്ങിയ ദിനപത്രത്തിന്റെ ഒന്നാംപേജിലെ എഡിറ്റോറിയല്‍ കോളമാണ് മംഗളം കറുപ്പില്‍ മുക്കി തങ്ങളുടെ പ്രതിഷേധം അറിയിച്ചിരിക്കുന്നത്. കറുപ്പടിച്ചിരിക്കുന്നതിന്റെ മുന്നോടിയായി മംഗളം എന്താണ് തങ്ങള്‍ക്ക് പറയാനുളളതെന്നും കുറിച്ചിട്ടുണ്ട്. അതിങ്ങനെയാണ്...
വര്‍ത്തമാനകാലത്തെ കാര്യങ്ങളാണ് വാര്‍ത്ത. എന്നിരിക്കെ സ്ത്രീകള്‍ക്കും കുഞ്ഞുങ്ങള്‍ക്കും എതിരെയുളള അതിക്രമങ്ങളുടെ ആസുരകാലത്ത് ഒരു ഭരണാധികാരിയുടെ മനോഭാവം, പെരുമാറ്റം എന്നിവ പച്ചയ്ക്ക് പുറത്തുകൊണ്ടുവന്ന മംഗളം ടെലിവിഷന്‍, പത്രം എന്നിവയോട് ഭരണകൂടം പുലര്‍ത്തുന്ന നീതികരിക്കാനാകാത്ത ഇരട്ടത്താപ്പു നിറഞ്ഞ സമീപനത്തില്‍ പ്രതിഷേധിക്കുന്നു.
ഹണി ട്രാപ്പ് സംഭവത്തില്‍ മംഗളം സിഇഓ അജിത്കുമാര്‍ അടക്കം അഞ്ച് പേരെയും 14 ദിവസത്തേക്ക് ഇന്നലെയാണ് റിമാന്റ് ചെയ്തത്.സിഇഓ അജിത് കുമാര്‍, എംബി സന്തോഷ്, ഫിറോസ് സാലി മുഹമ്മദ്, എസ് വി പ്രദീപ്,കെ ജയചന്ദ്രന്‍ എന്നിവരാണ് റിമാന്‍ഡില്‍ കഴിയുന്നത്.മന്ത്രി എ.കെ ശശീന്ദ്രന്റെ രാജിക്കിടയാക്കിയ വിവാദ ഫോണ്‍ സംഭാഷണത്തില്‍ മാധ്യമപ്രവര്‍ത്തകര്‍ അറസ്റ്റിലായ സംഭവത്തില്‍ സര്‍ക്കാരിനും മറ്റു മാധ്യമങ്ങള്‍ക്കുമെതിരെ ഇന്നലെയും മംഗളം രംഗത്തെത്തിയിരുന്നു.
മന്ത്രിക്കെതിരായ ടെലിഫോണ്‍ സംഭാഷണം പുറത്തുവിട്ടതില്‍ സര്‍ക്കാര്‍ പകവീട്ടിയതാണെന്നാണ് മംഗളം പത്രത്തിന്റെ ആരോപണം. ഇതിന് പിന്നില്‍ ഗൂഢാലോചന നടത്തിയത് മറ്റ് മാധ്യമങ്ങളാണെന്നും മംഗളം പറയുന്നു. മുമ്പ് നടത്തിയ പല സ്റ്റിങ് ഓപ്പറേഷനുകളും മാധ്യമസ്വാതന്ത്ര്യമായി അംഗീകരിച്ച ഇടതുമുന്നണി ഇപ്പോള്‍ മാധ്യമപ്രവര്‍ത്തകരുടെ അറസ്റ്റിനാണ് നേതൃത്വം നല്‍കിയതെന്നും കുറ്റപ്പെടുത്തുണ്ട്. കൂടാതെ മുഖ്യമന്ത്രിയുടെ വിയോജിപ്പും മറികടന്നായിരുന്നു പൊലീസിന്റെ നീക്കമെന്നും മംഗളം പറയുന്നു. തങ്ങളെ കുരിശിലേറ്റാന്‍ ശ്രമിച്ചതിന് പിന്നില്‍ മാധ്യമ സിന്‍ഡിക്കേറ്റാണെന്ന ആരോപണവും മംഗളം ഉയര്‍ത്തിയിരുന്നു.
മംഗളം ചാനല്‍ ലോഞ്ചിനോട് അനുബന്ധിച്ച് പുറത്തുവിട്ട വാര്‍ത്തയെത്തുടര്‍ന്ന് ഗതാഗതമന്ത്രിയായിരുന്ന എകെ ശശീന്ദ്രന്‍ രാജി വെച്ചിരുന്നു. മന്ത്രിയുടെ അടുക്കല്‍ സഹായം അഭ്യര്‍ത്ഥിച്ചെത്തിയ വീട്ടമ്മയോട് ലൈംഗികച്ചുവയോടെ സംസാരിക്കുന്നതിന്റെ റെക്കോഡിങ് എന്ന് അവകാശപ്പെട്ടായിരുന്നു ചാനല്‍ വാര്‍ത്ത പുറത്തുവിട്ടത്. വാര്‍ത്ത ഹണി ട്രാപ്പിലൂടെ സൃഷ്ടിച്ചെടുത്തതാണെന്ന് ആരോപണമുയര്‍ന്നിരുന്നു. ഇതിനെത്തുടര്‍ന്ന് ചനലിനെതിരെ രൂക്ഷമായ വിമര്‍ശനങ്ങളുയര്‍ന്നിരുന്നു. ഫോണ്‍ സംഭാഷണം ഹണി ട്രാപ്പിലൂടെ സൃഷ്ടിച്ചതല്ലെന്നാണ് ചാനല്‍ സിഇഒ അജിത്ത് കുമാര്‍ ആവര്‍ത്തിച്ചിരുന്നത്. പരാതിക്കാരി സമയമാകുമ്പോള്‍ പുറത്തുവരും. ഏത് അന്വേഷണത്തെയും നേരിടാന്‍ തയ്യാറാണെന്നും സിഇഒ പറഞ്ഞിരുന്നു. മാര്‍ച്ച് 30ാം തീയതി രാത്രിയോടെ മംഗളത്തിലെ മാധ്യമപ്രവര്‍ത്തകയെ ഉപയോഗിച്ചാണ് ഫോണ്‍ സംഭാഷണം ശേഖരിച്ചതെന്ന് അജിത്ത് കുമാര്‍ കുറ്റസമ്മതം നടത്തിയിരുന്നു.