സംസ്ഥാന സര്‍ക്കാരിന് കനത്ത തിരിച്ചടി... പിണറായി സര്‍ക്കാര്‍ ആദ്യം ഒഴിവാക്കിയ ഡിജിപി സെന്‍കുമാര്‍ രാജകീയമായി തീരിച്ചു വരുന്നു; വഴിമുട്ടി സിപിഎമ്മും ലോക്‌നാഥ് ബഹ്‌റയും
ക്രമസമാധാന ചുമതലയുള്ള ഡിജിപി സ്ഥാനത്തുനിന്ന നീക്കിയതിനെതിരെ ടിപി സെന്‍കുമാര്‍ സമര്‍പ്പിച്ച ഹര്‍ജിയില്‍ സംസ്ഥാന സര്‍ക്കാരിന് കടുത്ത തിരിച്ചടി. സെന്‍കുമാറിനെ പൊലീസ് മേധാവിയാക്കാന്‍ സുപ്രീംകോടതി നിര്‍ദ്ദേശിച്ചു. മതിയായ കാരണമില്ലാതെയാണ് സെന്‍കുമാറിനെ സ്ഥലം മാറ്റിയത്. പുറ്റിങ്ങല്‍ കേസും ജിഷാ വധക്കേസും പുറത്താക്കാന്‍ മതിയായ ന്യായീകരണമില്ലെന്ന് സുപ്രീംകോടതി നിരീക്ഷിച്ചു. ജസ്റ്റിസ് മദന്‍ ബി ലോക്കൂര്‍, ദീപക് ഗുപ്ത എന്നിവരടങ്ങിയ ബെഞ്ചാണ് കേസ് പരിഗണിച്ചത്. അധ്യക്ഷനായ മദന്‍ ബി ലോക്കൂര്‍ ആണ് വിധി പ്രസ്താവിച്ചത്. കേസില്‍ കഴിഞ്ഞയാഴ്ച വാദം പൂര്‍ത്തിയായിരുന്നു.
ഈ കേസില്‍ വാദത്തിന് മുതിര്‍ന്ന അഭിഭാഷകന്‍ ഹരീഷ് സാല്‍വെയാണു സര്‍ക്കാരിനു വേണ്ടി സുപ്രീംകോടതിയില്‍ ഹാജരായത്. പൊലീസ് ഉദ്യോഗസ്ഥന്റെ പ്രവര്‍ത്തികളില്‍ ജനത്തിനു അതൃപ്തിയുണ്ടായാല്‍ പൊലീസ് നിയമത്തിലെ 97 പ്രകാരം മാറ്റാന്‍ സര്‍ക്കാരിനു അധികാരമുണ്ട്. ജിഷാകേസില്‍ എഫ്‌ഐആര്‍ രജിസ്റ്റര്‍ ചെയ്യാന്‍പോലും കാലതാമസം വരുത്തിയ പൊലീസ് ഉദ്യോഗസ്ഥരെ സെന്‍കുമാര്‍ സംരക്ഷിക്കാന്‍ ശ്രമിച്ചു.
പുറ്റിങ്ങല്‍ അപകടത്തില്‍ പൊലീസിന്റെ ഭാഗത്ത് ഗുരുതരവീഴ്ചയുണ്ടായി. കുറ്റക്കാരായ ഉദ്യോഗസ്ഥര്‍ക്കെതിരെ നടപടിയെടുക്കുന്നതിനു പകരം കൊല്ലം ജിലാഭരണക്കൂടത്തെ പഴിചാരാനാണു സെന്‍കുമാര്‍ ശ്രമിച്ചതെന്നും സര്‍ക്കാര്‍ വാദിച്ചു. നിയമനം നല്‍കി രണ്ടുവര്‍ഷത്തേക്ക് സ്ഥലംമാറ്റരുതെന്ന പ്രകാശ് സിങ് കേസിലെ നിര്‍ദ്ദേശം സെന്‍കുമാറിന്റെ കാര്യത്തില്‍ ബാധകമല്ലെന്നും സര്‍ക്കാര്‍ കോടതിയെ അറിയിച്ചിരുന്നു. ഈ നിരീക്ഷണമാണ് കോടതി തള്ളിയത്.
സ്ഥലംമാറ്റിയ നടപടി നിലവിലുള്ള സുപ്രീംകോടതി വിധികളുടെ ലംഘനമാണെന്നാണു സെന്‍കുമാറിന്റെ വാദം കോടതി അംഗീകരിച്ചു. ജിഷ, പുറ്റിങ്ങല്‍ കേസുകളില്‍ വീഴ്ച വരുത്തിയിട്ടില്ല. സ്ഥലംമാറ്റുന്നതുമായി ബന്ധപ്പെട്ട പൊലീസ് നിയമത്തിലെ വകുപ്പുകള്‍ ഭരണഘടനാവിരുദ്ധമാണെന്നും റദ്ദുചെയ്യണമെന്നും സെന്‍കുമാറിന്റെ അഭിഭാഷകന്‍ ദുഷ്യന്ത് ദവെ ആവശ്യപ്പെട്ടു.
https://www.facebook.com/Malayalivartha
