നിരോധിച്ച നോട്ടുകള്‍ വാങ്ങി ചോറ്റാനിക്കര ഭഗവതിയുടെ ചിത്രം ആലേഖനം ചെയ്ത സ്വര്‍ണ ലോക്കറ്റുകള്‍ വിറ്റതായി കാണിച്ച് പണം മാറിയെന്ന പരാതിയില്‍ അന്വേഷണം ആവശ്യപ്പെട്ട് മൂവാറ്റുപുഴ വിജിലന്‍സ് കോടതിയില്‍ ഹര്‍ജി.

ലോക്കറ്റ് വിറ്റതായി കാണിച്ച് നേടിയ നിരോധിച്ച നോട്ടുകള്‍ വിജയ ബാങ്കിന്റെ ചോറ്റാനിക്കര ബ്രാഞ്ചില്‍ നിന്ന് മാറിയെടുത്തതും ക്ഷേത്രത്തിലേക്ക് ശര്‍ക്കര വാങ്ങിയതും അന്വേഷിക്കണമെന്നാവശ്യപ്പെട്ട് തൃപ്പൂണിത്തുറ പൂര്‍ണത്രയീശ ക്ഷേത്രത്തിലെ കൗണ്ടര്‍ അസിസ്റ്റന്റ് എസ്. അഭിലാഷ് ആണ് ഹര്‍ജി നല്‍കിയിരിക്കുന്നത്.

കൊച്ചിന്‍ ദേവസ്വം ബോര്‍ഡ് സ്‌പെഷ്യല്‍ കമ്മിഷണര്‍ ഹരിദാസ്, ചോറ്റാനിക്കാര ദേവസ്വം ബോര്‍ഡ് സ്‌പെഷ്യല്‍ കമ്മിഷണര്‍ ഇ.കെ. മനോജ്, ദേവസ്വം മാനേജര്‍ ബിജുകുമാര്‍, ഹോട്ടല്‍ ഗണേഷ് ഭവന്‍ പ്രൊെ്രെപറ്റര്‍ ഗോപി, വിജയ ബാങ്ക് ചോറ്റാനിക്കര ബ്രാഞ്ച് മാനേജര്‍, കൊച്ചിന്‍ ദേവസ്വം ബോര്‍ഡ് സെക്രട്ടറി, മുന്‍ ദേവസ്വം ബോര്‍ഡ് അംഗങ്ങള്‍ എന്നിവരെ എതിര്‍കക്ഷികളാക്കിയാണ് ഹര്‍ജി ഫയല്‍ ചെയ്തിരിക്കുന്നത്. മേയ് 19ലേക്ക് ഹര്‍ജി മാറ്റി.

കഴിഞ്ഞ നവംബര്‍ 8നാണ് നോട്ട് നിരോധനം നിലവില്‍ വന്നത്. നവംബര്‍ 9 ന് 10 ഗ്രാമിന്റെ 32 സ്വര്‍ണ ലോക്കറ്റുകള്‍ 9.762 ലക്ഷം രൂപയ്ക്കും 10ാം തീയതി 10 ഗ്രാമിന്റെ 80 ലോക്കറ്റുകള്‍ 24.48 ലക്ഷത്തിനും 5 ഗ്രാമിന്റെ 20 ലോക്കറ്റുകള്‍ 3.08 ലക്ഷത്തിനും വിറ്റതായി രേഖകളുണ്ടാക്കി നിരോധിത നോട്ടുകള്‍ മാറിയെന്നാണ് പരാതി. ഒന്നും രണ്ടും പ്രതികള്‍ ചേര്‍ന്ന് 9ാം തീയതി പകലും 10ാം തീയതി രാവിലെയുമാണ് ലോക്കറ്റുകള്‍ കൈവശപ്പെടുത്തിയതെന്നും പരാതിയില്‍ പറയുന്നു.

1, 2, 3 പ്രതികളുടെ സ്വത്ത് സംബന്ധിച്ച് അന്വേഷണം നടത്തണമെന്നും നോട്ട് നിരോധന സമയത്ത് 56,04,200 രൂപയുടെ നിരോധിത നോട്ടുകള്‍ മാറ്റിയെടുത്തതായും ആരോപണമുന്നയിച്ചിട്ടുണ്ട്. ബാങ്ക് മാനേജര്‍ക്കെതിരെയും പരാതി ഉന്നയിച്ചിട്ടുണ്ട്. കൊച്ചിന്‍ ദേവസ്വം ബോര്‍ഡിനെ നിരോധിച്ച പണം വാങ്ങാവുന്നവരുടെ പട്ടികയില്‍ റിസര്‍വ് ബാങ്ക് ഉള്‍പ്പെടുത്തിയിരുന്നില്ലെന്നും പരാതിയില്‍ പറയുന്നു.

ഒരു വര്‍ഷം 25 ലക്ഷത്തോളം രൂപയുടെ ശര്‍ക്കര വാങ്ങുന്നുണ്ടെന്നും ഇതു സംബന്ധിച്ച രേഖകളൊന്നും സൂക്ഷിക്കുന്നില്ലെന്നുമാണ് മറ്റൊരാരോപണം. പരസ്യ ബോര്‍ഡുകള്‍ സ്ഥാപിച്ചതിലും വഴിപാട് കൗണ്ടറുകള്‍ സ്ഥാപിച്ചതിലും ക്രമക്കേടുണ്ടെന്നും വ്യാജ രസീതുകള്‍ വഴി ദേവസ്വത്തിനു നഷ്ടം വരുത്തിയെന്നും ഹര്‍ജിയില്‍ പറയുന്നു.