സമൂഹത്തിനു മാതൃക ഈ അധ്യാപകര്‍
അധ്യാപനം എന്നാല്‍ കുട്ടികളെ സ്‌കൂളില്‍ വന്നു പഠിപ്പിക്കുക മാത്രമാണെന്നും അത് കഴിഞ്ഞാല്‍ സ്വന്തം കാര്യം നോക്കി തിരികെ പോകാമെന്നും കരുതിയെങ്കില്‍ അത് തെറ്റിയെന്ന് കാണിച്ചുതരുകയാണ് ഒരു കൂട്ടം അധ്യാപകര്‍. സീതത്തോട് അട്ടത്തോട് ഗവ. ഡ്രൈടബല്‍ സ്‌കൂളിലെ അധ്യാപകരാണ് വേറിട്ട രീതിയില്‍ മറ്റുള്ളവര്‍ക്ക് മാതൃകയാകുന്നത്.സാധാരണയായി പഠിപ്പിക്കാനായി കൈയില്‍ പുസ്തകങ്ങളുമായി വരുന്ന അധ്യാപകര്‍ കഴിഞ്ഞ ദിവസം കൈയില്‍ ട്രിമ്മറുമായാണ് എത്തിയത്. എന്താണ് ട്രിമ്മര്‍ എന്ന് കുട്ടികള്‍ക്ക് കാണിച്ചുകൊടുക്കാനല്ല . മറിച്ച് കുട്ടികളുടെ മുടിവെട്ടാനായിരുന്നു അവര്‍ എത്തിയത്.
രണ്ടാം ക്ലാസുകാരായ അനന്തു(ആറ്), അഭിഷേക്(ആറ്), ഒന്നാം ക്ലാസുകാരന്‍ ഉണ്ണിക്കുട്ടന്‍(അഞ്ച്) എന്നിവരുടെ നീട്ടിവളര്‍ത്തിയ തലമുടിയാണ് വെട്ടിയൊതുക്കിയത്. തലയില്‍ നിന്നു വലിയൊരു ഭാരം മാറിയതിന്റെ സന്തോഷമായിരുന്നു മൂവര്‍ക്കും. രക്ഷിതാക്കളുടെ പ്രതികരണം അറിഞ്ഞ ശേഷം ആവശ്യമുള്ള എല്ലാവരുടെയും മുടി മുറിച്ചുനല്‍കാനുള്ള തയാറെടുപ്പിലാണ് അധ്യാപകര്‍. മാസങ്ങള്‍ കൂടുമ്പോഴാണ് മിക്ക ആദിവാസി കുട്ടികളും മുടി മുറിക്കാറ്. ബാര്‍ബര്‍ ഷോപ്പില്‍ നല്‍കുന്നതിനുള്ള പണം ഇല്ലാത്തതാണ് മിക്കവരും മുടി നീട്ടിവളര്‍ത്തുന്നതിനുള്ള കാരണം.
അട്ടത്തോട്ടില്‍ ബാര്‍ബര്‍ ഷോപ്പ് ഇല്ല. കിലോമീറ്റര്‍ താണ്ടി പെരുനാട്ടിലോ, പമ്പാവാലിയിലോ എത്തി മടങ്ങണമെങ്കില്‍ നൂറില്‍ കുറയാതെ രൂപ വേണം ഒരാള്‍ക്ക്. കുവൈത്ത് കേന്ദ്രമാക്കി പ്രവര്‍ത്തിക്കുന്ന 'ബ്ലെഡ് ഡൊണേറ്റ് കേരളയാണ്' 'ട്രിമ്മര്‍' സൗജന്യമായി നല്‍കിയത്. ട്രിമ്മര്‍ ആര് ഉപയോഗിക്കുമെന്നുള്ള ആശങ്കയ്ക്കിടയിലാണ് അധ്യാപകര്‍ തന്നെ ഈ ദൗത്യവും ഏറ്റെടുത്തത്. പിഎസ്‌സിയില്‍ നിന്നുള്ള അധ്യാപകരായ വി.എസ്.അരുണും രാകേഷ് തമ്പിയും സ്‌കൂളിന്റെ ആരംഭം മുതല്‍ക്കേ ഉണ്ട്. എന്ത് ത്യാഗം സഹിച്ചും ആദിവാസി കുട്ടികളെ സമൂഹത്തില്‍ ഉയര്‍ത്തികൊണ്ടുവരുകയാണ് ലക്ഷ്യമെന്ന് അധ്യാപര്‍ പറയുന്നു.
https://www.facebook.com/Malayalivartha
