കൊച്ചിയില്‍ പുറങ്കടലില്‍ മത്സ്യബന്ധനത്തിനു പോയ ബോട്ടിലിടിച്ച് രണ്ടുപേരുടെ മരണത്തിനിടയാക്കിയ അംബര്‍ വിദേശ ചരക്കു കപ്പലിന്റെ വോയേജ് ഡേറ്റ റെക്കോഡറടക്കമുള്ള രേഖകള്‍ പിടിച്ചെടുക്കാന്‍ ഹൈക്കോടതിയുടെ ഉത്തരവ് നല്‍കി.

അപകടത്തില്‍ കൊല്ലപ്പെട്ട മല്‍സ്യത്തൊഴിലാളികളുടെ ബന്തുക്കള്‍ നല്‍കിയ ഹര്‍ജിയിലാണ് രേഖകള്‍ പിടിച്ചെടുക്കാന്‍ ഷിപ്പിങ് ഡയറക്ടര്‍ ജനറലിനു കോടതി നിര്‍ദേശം നല്‍കിയത്. മരണപ്പെട്ട കുളച്ചല്‍ സ്വദേശി ആന്റണി ജോണിന്റെ ഭാര്യ സുജാത, പരുക്കേറ്റ ഏണസ്റ്റ് എന്നിവരാണ് ഹര്‍ജി നല്‍കിയത്. സംഭവത്തെക്കുറിച്ച് അന്വേഷിക്കാന്‍ കേന്ദ്രസര്‍ക്കാരിനും ഷിപ്പിങ് ഡയറക്ടര്‍ ജനറലിനും നിര്‍ദേശം നല്‍കണമെന്നാവശ്യപ്പെട്ടാണ് ഹര്‍ജിക്കാര്‍ കോടതിയെ സമീപിച്ചത്.

ഫലപ്രദമായ അന്വേഷണത്തിനു കപ്പലിലെ വോയേജ് ഡേറ്റ റെക്കോര്‍ഡര്‍ അടക്കമുള്ള ഇലക്‌ട്രോണിക്‌സ് രേഖകള്‍ പിടിച്ചെടുക്കണമെന്നും ഇവ നശിപ്പിക്കാന്‍ ഇടയുണ്ടെന്നും ഹര്‍ജിക്കാര്‍ വ്യക്തമാക്കിയിരുന്നു. അപകടമുണ്ടായ ജൂണ്‍ 11 ലെ യാത്രാ വിവരങ്ങള്‍ രേഖപ്പെടുത്തിയ ഒഫീഷ്യല്‍ ലോഗ് ബുക്ക്, നൈറ്റ് ഓഡര്‍ ബുക്ക്, ബെല്‍ ബുക്ക്, ജി.പി.എസ്. ചാര്‍ട്ട്, ജി.പി.എസ്. ലോഗ് ബുക്ക്, നാവിഗേഷന്‍ ചാര്‍ട്ട് തുടങ്ങിയവ എത്രയും വേഗം പിടിച്ചെടുത്ത് സംരക്ഷിക്കണമെന്നാണു ഹര്‍ജികളിലെ ആവശ്യം. രേഖകള്‍ പിടിച്ചെടുക്കാന്‍ വൈകുന്തോറും ഇവ നശിപ്പിക്കപ്പെടാനും തെളിവുകള്‍ ഇല്ലാതാകാനുമുള്ള സാധ്യതയുണ്ടെന്നും ഹര്‍ജിക്കാര്‍ ചൂണ്ടിക്കാട്ടിയിരുന്നു.

കൊച്ചി അഴിമുഖത്തുനിന്ന് 14 നോട്ടിക്കല്‍ മൈല്‍ അകലെ ഞായറാഴ്ച പുലര്‍ച്ചെ രണ്ടരയോടെയാണ് കപ്പലിടിച്ച് കാര്‍മല്‍ മാത എന്ന മല്‍സ്യബന്ധന ബോട്ട് തകര്‍ന്നത്. ആന്റണി ജോണിനെ കൂടാതെ അസം സ്വദേശി രാഹുല്‍ ദാസും ദുരന്തത്തില്‍ മരിച്ചു. ഒപ്പം അസം സ്വദേശി മോത്തി ദാസിനെ കാണാതായി. 14 പേരാണ് ബോട്ടില്‍ ഉണ്ടായിരുന്നത്. 11 പേരെ രക്ഷപെടുത്തി. ഇവര്‍ ആശുപത്രിയില്‍ ചികിത്സയിലാണ്.