ഒരു വശത്ത് വിഴിഞ്ഞം സി എ ജി റിപ്പോര്‍ട്ടും മറുവശത്ത് മുന്‍ മന്ത്രിയുടെ ശ്രീവത്സം തട്ടിപ്പ് ബന്ധവും ചേര്‍ന്ന് ചൊവ്വാഴ്ച ചേരുന്ന യു പി എഫ് രാഷ്ട്രീയ കാര്യ സമിതി സംഭവ ബഹുലമാകും.

വിഴിഞ്ഞം സി എ ജി റിപ്പോര്‍ട്ടില്‍ ഉമ്മന്‍ ചാണ്ടി സര്‍ക്കാരിനെതിരെ വ്യക്തമായ പരാമര്‍ശമുണ്ട്. വിഴിഞ്ഞം തുറമുഖം ഒരു സ്വകാര്യ കമ്പനിക്ക് പാട്ടത്തിനു നല്‍കി എന്നതാണ് പ്രധാന ആരോപണം. ഇതില്‍ സര്‍ക്കാരിന് നഷ്ടമുണ്ടായെന്ന വ്യക്തമായ സൂചനയും റിപ്പോര്‍ട്ട് നല്‍കുന്നു. ഇക്കാര്യം രാഷ്ട്ര കാര്യസമിതി ചര്‍ച്ച ചെയ്യണമെന്നാവശ്യപ്പെട്ട് വി ഡി സതീശന്‍ കത്ത് നല്‍കിയിരുന്നു. അതിനെ പരസ്യമായി വിമര്‍ശിച്ച് ഹസന്‍ അപ്പോള്‍ തന്നെ രംഗത്തെത്തി. എന്നാല്‍ സതീശന്‍ ആരോപണത്തില്‍ ഉറച്ചു നിന്നു. അതോടെ വിഷയം ചര്‍ച്ച ചെയ്യാമെന്നായി.

വിഴിഞ്ഞം കരാര്‍ തനിക്കെതിരെ പുതിയ ആരോപണമായി മാറുന്നു എന്നു കണ്ടപ്പോഴാണ് ഉമ്മന്‍ ചാണ്ടി സി എ ജിക്ക് കത്തെഴുതിയത്. സി എ ജി, എ.ജിയെ വിളിപ്പിക്കാന്‍ തീരുമാനിച്ചു. ഇത് ഒരളവുവരെ ഉമ്മന്‍ ചാണ്ടിക്ക് ആശ്വാസമായി. എന്നാല്‍ അഴിമതി നടന്നു എന്ന വിശ്വാസത്തിലാണ് ഐ ഗ്രൂപ്പ്.

കെ.ബാബുവും ഉമ്മന്‍ ചാണ്ടിയും ചേര്‍ന്ന് വിഴിഞ്ഞത്തില്‍ അഴിമതി നടത്തി എന്നാണ് ഐ ഗ്രൂപ്പ് വിശ്വസിക്കുന്നത്. അപ്പോഴാണ് ദൈവാനുഗ്രഹം പോലെ ഒരു അഴിമതി ആരോപണം ഉമ്മന്‍ ചാണ്ടിക്കും എ ഗ്രൂപ്പിനും വീണു കിട്ടിയത്. അത് നാഗാലന്റിലെ പോലീസുകാരനായിരുന്ന എം.കെ.ആര്‍.പിള്ളയുടെ അഴിമതിയാണ്. വിവാദമായ ഹരിപ്പാട് മെഡിക്കല്‍ കോളേജുമായി ബന്ധപ്പെടുത്തി രമേശിനെതിരെ ആരോപണം ഉയര്‍ന്നു കഴിഞ്ഞു. ടി.ജെ. ആഞ്ചലോസാണ് ആരോപണം ഉന്നയിച്ചത്. ആഞ്ചലോസ് ആളിന്റെ പേര് പറഞ്ഞില്ലെങ്കിലും ആരോപണം രമേശ് ചെന്നിത്തലക്ക് നേരെയാണെന്ന് വ്യക്തമായി കഴിഞ്ഞു. 

വിഴിഞ്ഞം മൂപ്പിച്ചാല്‍ എ ഗ്രൂപ്പ് നേതാക്കള്‍ ശ്രീവത്സത്തിലുള്ള ചെന്നിത്തലയുടെ ബന്ധത്തെ കുറിച്ച് അന്വേഷണം ആവശ്യപ്പെടും. അങ്ങനെ നടക്കുകയാണെങ്കില്‍ ചെന്നിത്തലയുടെ ഭാവി പ്രതിസന്ധിയിലാകും. പിള്ളക്ക് മറ്റ് പല രാഷ്ട്രീയ നേതാക്കളുമായി ബന്ധമുണ്ടെങ്കിലും ചെന്നിത്തലയുമായി ദൃഢബന്ധമുണ്ടെന്നാണ് റിപ്പോര്‍ട്ടുകള്‍. ഹരിപ്പാട് മെഡിക്കല്‍ കോളേജ് പിള്ളയുടെ സ്വകാര്യ സ്ഥാപനമാക്കാനായിരുന്നു നീക്കം. എന്നാല്‍ മന്ത്രി സുധാകരന്റെ ഇടപെടല്‍ കാരണമാണ് അത് നടക്കാതെ പോയത്.

സി പി എം ഇക്കാര്യത്തില്‍ വലിയ ഇടപെടലുകള്‍ നടത്തില്ല. പ്രതിപക്ഷ നേതാവിനെ വെറുപ്പിക്കാന്‍ അവര്‍ തയ്യാറല്ല. അതു കൊണ്ടു തന്നെ വിവാദങ്ങള്‍ യുഡിഎഫിനെ പുകയ്ക്കും. വിഴിഞ്ഞം ചെന്നിത്തല വിട്ടാല്‍ ഉമ്മന്‍ ചാണ്ടി ശ്രീവല്‍സം വിടും.