മെട്രോ റെയിലിന്റെ ഉദ്ഘാടനത്തിനായെത്തുന്ന പ്രധാനമന്ത്രിക്ക് കനത്ത സുരക്ഷയുള്ള നഗരത്തില്‍ നാളെ പിഎസ്‌സി പരീക്ഷാര്‍ത്ഥികള്‍ വലയും. വാഹനങ്ങള്‍ക്ക് അടക്കം നിയന്ത്രണമേര്‍പ്പെടുത്തുമ്പോള്‍ മുന്‍കൂട്ടി എത്തേണ്ട അവസ്ഥയാണ് പിഎസ്‌സി പരീക്ഷാര്‍ത്ഥികള്‍ക്കുള്ളത്.

എല്‍ഡി ക്ലര്‍ക്ക് പരീക്ഷയാണ് 17ന് നടക്കുന്നത്. തിരുവനന്തപുരം മലപ്പുറം ജില്ലകളിലെ പിഎസ്‌സി ഉദ്യോഗാര്‍ത്ഥികളുടെ പരീക്ഷാ സെന്ററാണ് കൊച്ചി. ഇവിടെ പരീക്ഷ എഴുതേണ്ടവര്‍ നേരത്തെ തന്നെ എത്തിച്ചേരണമെന്ന് പരീക്ഷാ കേന്ദ്രങ്ങളില്‍ നിര്‍ദ്ദേശിച്ചിട്ടുണ്ട്.

ഉച്ചതിരിഞ്ഞു നടക്കുന്ന പരീക്ഷയ്ക്കായി ഇവര്‍ നേരത്തെ മുന്‍കൂട്ടി എത്തിച്ചേരേണ്ട അവസ്ഥയാണുള്ളത്. നിയന്ത്രണമേര്‍പ്പെടുത്തിയ പാതകള്‍ ഒഴിവാക്കി പോക്കറ്റ് റോഡുകളെ ആശ്രയിച്ചാല്‍ മാത്രമാണ് ഇവര്‍ക്ക് യാത്ര ചെയ്യുവാന്‍ സാധിക്കു.

നേവല്‍ ബേസ്, തേവര, പള്ളിമുക്ക്, ജോസ് ജംഗ്ഷന്‍, ബിടിഎച്ച് ജംഗ്ഷന്‍, സുഭാഷ് പാര്‍ക്ക്, മേനക, ഹൈക്കോടതി ജംഗ്ഷന്‍, കച്ചേരിപ്പടി, കലൂര്‍, പാലാരിവട്ടം എന്നിങ്ങനെ നഗരത്തിലെ പ്രധാനകേന്ദ്രങ്ങളിലെല്ലാം വാഹനങ്ങള്‍ക്ക് നിയന്ത്രണം ഏര്‍പ്പെടുത്തിയിരിക്കുകയാണ്. ഇവിടങ്ങളിലെല്ലാം പാര്‍ക്കിങ്ങും നിരോധിച്ചിട്ടുണ്ട്. ഇതിന് പുറമെ കാല്‍നടയാത്ര പോലും അനുവദിക്കില്ല.

സുരക്ഷയ്ക്കായി 18 എസ്പിമാരും, 40 എസിപി/ഡിവൈഎസ്പി, 50 സിഐ, 350 എസ്‌ഐ, 1500 പൊലീസുകാര്‍, 109 വനിത പൊലീസ് എന്നിവരെ സുരക്ഷയ്ക്കായി നിയോഗിച്ചിട്ടുണ്ട്. 150 മഫ്തി പോലീസുകാരും 360 വനിത കേഡറ്റുകളുടെ സേവനങ്ങളും ഇവിടെ ഉണ്ടാകും.