മലയിറങ്ങും മുമ്പ് മൂന്നാറിനെ വീണ്ടും ബുള്ളറില്‍ വിറപ്പിച്ച് ശ്രീറാം. തെക്കിന്റെ കശ്മീരിലെ മഞ്ഞുകണങ്ങള്‍ക്കു വിവാദങ്ങളുടെ തീച്ചൂടു പകര്‍ന്ന ദേവികുളം സബ് കലക്ടര്‍ വി.ശ്രീറാം ഇന്നലെ പടിയിറങ്ങി. അടൂരില്‍നിന്ന് 20 ബുള്ളറ്റുകളിലായി എത്തിയ യുവാക്കളുടെ ബുള്ളറ്റ് റൈഡിലും പങ്കെടുത്ത ശ്രീറാം സ്ഥാനമൊഴിയുന്ന ദിനത്തിലും മൂന്നാറിലെ 'താര'മായി. 

ശ്രീറാമിന് ഐക്യദാര്‍ഢ്യം അര്‍പ്പിച്ച് അടൂരില്‍നിന്ന് 20 ബുള്ളറ്റുകളിലായി 36 യുവാക്കളാണ് 220 കിലോമീറ്റര്‍ സഞ്ചരിച്ചു ദേവികുളത്ത് എത്തിയത്. നെഹ്‌റു സ്റ്റഡി സര്‍ക്കിള്‍ എന്ന സംഘടനയുടെ നേതൃത്വത്തിലായിരുന്നു ബുള്ളറ്റ് റൈഡ്. ദേവികുളത്തുനിന്നു ശ്രീറാം വെങ്കിട്ടരാമന്‍ റൈഡില്‍ പങ്കാളിയായി. ഇന്നലെ രാവിലെ കോഴഞ്ചേരിയില്‍നിന്നു ഡോ. ഫിലിപ്പോസ് മാര്‍ ക്രിസോസ്റ്റം വലിയ മെത്രാപ്പൊലീത്തയാണു ബുള്ളറ്റ് റൈഡ് ഫ്‌ലാഗ് ഓഫ് ചെയ്തത്.കെഎസ്യു സംസ്ഥാന ജനറല്‍ സെക്രട്ടറി രാഹുല്‍ മാങ്കൂട്ടത്തില്‍, ഡിസിസി ജനറല്‍ സെക്രട്ടറി എന്‍.സി.മനോജ്, റിനോ പി.രാജന്‍, രതീഷ് സദാനന്ദന്‍, സുബിന്‍ പണപടിക്കല്‍, ജോസ് പെരിങ്ങനാട്, ജിതിന്‍ നൈനാന്‍, റോബി ബേബി സൈമണ്‍ അലക്‌സാണ്ടര്‍ എന്നിവര്‍ നേതൃത്വം നല്‍കി.

ഇന്നലെ ഉച്ചയോടെ ഓഫിസിലെത്തിയ ശ്രീറാം ചില കേസുകളില്‍ ഹിയറിങ് നടത്തിയശേഷമാണ് ജീവനക്കാര്‍ ഒരുക്കിയ യാത്രയയപ്പു യോഗത്തില്‍ പങ്കെടുക്കാനെത്തിയത്. രാവിലെമുതല്‍ ഓഫിസിനു പുറത്തു കാത്തുനിന്ന മാധ്യമപ്രവര്‍ത്തകര്‍ക്കു യോഗത്തിലേക്കു പ്രവേശനം ഉണ്ടായില്ല. ഉറച്ച തീരുമാനങ്ങളെടുക്കാന്‍ കഴിഞ്ഞതു സഹപ്രവര്‍ത്തകരുടെ കൂട്ടായ്മകൊണ്ടാണെന്നു യോഗത്തില്‍ അദ്ദേഹം പറഞ്ഞു.

അരമണിക്കൂര്‍കൊണ്ട് അവസാനിച്ച യാത്രയയപ്പു യോഗത്തിനൊടുവില്‍ പുറത്തെ പുല്‍ത്തകിടിയില്‍ ജീവനക്കാര്‍ക്കൊപ്പം ഗ്രൂപ്പ് ഫോട്ടോയും എടുത്തു. ഇടുക്കി കലക്ടര്‍ ജി.ആര്‍.ഗോകുലും യോഗത്തിന് എത്തിയിരുന്നു. ഫോട്ടോയെടുപ്പു കഴിഞ്ഞതോടെ ശ്രീറാം ഓഫിസ് വിട്ടു. വി.ആര്‍.പ്രേംകുമാര്‍ സബ് കലക്ടറായി ഇന്നു ചുമതലയേല്‍ക്കും. ശ്രീറാം ഇന്ന് ഇടുക്കിവിടും.

2016 ജൂലൈ 22നാണ് ഇടുക്കി ജില്ലയിലെ ദേവികുളത്ത് സബ് കലക്ടറായി വി.ശ്രീറാം ചുമതലയേറ്റത്. മൂന്നാറിലെ കയ്യേറ്റക്കാര്‍ക്കെതിരെ വി.ശ്രീറാം ശക്തമായ നടപടികള്‍ സ്വീകരിച്ചപ്പോള്‍ സിപിഎം രംഗത്തു വന്നു. സബ് കലക്ടര്‍ക്കെതിരെ പ്രവര്‍ത്തകരെ അണിനിരത്തി 20 ദിവസം സമരം നടത്തി. പാപ്പാത്തിച്ചോലയിലെ കയ്യേറ്റഭൂമിയിലെ കുരിശു പൊളിച്ചു മാറ്റിയതോടെയാണു വിവാദം കത്തിപ്പടര്‍ന്നത്. മൂന്നാര്‍ വിഷയത്തില്‍ വിളിച്ച സര്‍വകക്ഷി യോഗത്തിനിടെ മുഖ്യമന്ത്രി പിണറായി വിജയന്‍ രൂക്ഷമായി വിമര്‍ശിച്ചിരുന്നു.