നടി ആക്രമിക്കപ്പെട്ട കേസില് അന്വേഷണം എത്രയും വേഗം പൂര്ത്തിയാക്കാന് പ്രത്യേക അന്വേഷണസംഘത്തിന് നിര്ദേശം
നടി ആക്രമിക്കപ്പെട്ട കേസില് അന്വേഷണം എത്രയും വേഗം പൂര്ത്തിയാക്കാന് പ്രത്യേക അന്വേഷണസംഘത്തിന് നിര്ദേശം. വ്യാഴാഴ്ച തിരുവനന്തപുരത്ത് ചേര്ന്ന പൊലീസ് ഉന്നതതലയോഗം അന്വേഷണപുരോഗതി വിലയിരുത്തിയ ശേഷമാണ് നിര്ദേശം നല്കിയത്. സുഖമില്ലാത്തതിനാല് സംസ്ഥാന പൊലീസ് മേധാവി ലോക്നാഥ് ബെഹ്റക്ക് പകരം ഡി.ജി.പി ശങ്കര് റെഡ്ഡിയുടെ സാന്നിധ്യത്തിലായിരുന്നു യോഗം.
ഡി.ജി.പി, മേഖല എ.ഡി.ജി.പിമാര്, റേഞ്ച് ഐ.ജിമാര്, നടി ആക്രമിക്കപ്പെട്ട കേസ് അന്വേഷിക്കുന്ന പ്രത്യേക സംഘത്തലവന് ഐ.ജി ദിനേന്ദ്ര കശ്യപ്, എറണാകുളം റൂറല്സിറ്റി പൊലീസ് മേധാവികള് എന്നിവരും പങ്കെടുത്തു. പ്രതിമാസ അവലോകന യോഗമായിരുന്നെങ്കിലും നടി കേസ് പ്രത്യേകം ചര്ച്ച ചെയ്യുകയായിരുന്നത്രേ. അന്വേഷണപുരോഗതിയില് പൂര്ണ തൃപ്തി രേഖപ്പെടുത്തിയ ഉന്നത ഉദ്യോഗസ്ഥര് പ്രത്യേക അന്വേഷണ സംഘത്തെ അഭിനന്ദിച്ചു.
അതേസമയം, തെളിവുകള് കൂട്ടിയോജിപ്പിക്കുന്നതില് ജാഗ്രത വേണമെന്നും നിര്ദേശിച്ചു. സര്ക്കാര് നിയോഗിച്ച പബ്ലിക് പ്രോസിക്യൂട്ടറുടെ സാന്നിധ്യത്തിലാകും തെളിവുകളുടെ ക്രോഡീകരണം. ലഭിച്ച മുഴുവന് തെളിവുകളും ശാസ്ത്രീയ പരിശോധനക്കു ശേഷമാകും കുറ്റപത്രത്തില് ഉള്പ്പെടുത്തുക. കേസിന്റെ ഇതുവരെയുള്ള പുരോഗതിയും തുടര്നടപടികളും പ്രത്യേക അന്വേഷണസംഘം മേധാവി വിശദീകരിച്ചു. ദിലീപിന്റെ ഭാര്യയും നടിയുമായ കാവ്യ മാധവന്, മാതാവ് ശ്യാമള എന്നിവരില്നിന്നും പരമാവധി വിവരങ്ങള് ശേഖരിക്കാനും തീരുമാനിച്ചിട്ടുണ്ട്.
എം.എല്.എമാരായ മുകേഷ്, അന്വര് സാദത്ത് എന്നിവരെയും ഏതാനും രാഷ്ട്രീയ നേതാക്കളെയും സിനിമ മേഖലയിലെ ചിലരെയും ഉടന് ചോദ്യംചെയ്യും. ദിലീപിന്റെ സാമ്പത്തിക ഇടപാടുകളും പരിശോധിക്കുന്നുണ്ട്. എന്നാല്, അന്വേഷണം അനിശ്ചിതമായി നീട്ടരുതെന്ന കര്ശന നിര്ദേശവും സംഘത്തിന് ലഭിച്ചു.
അതിനിടെ, ദിലീപിനെ വീണ്ടും പൊലീസ് കസ്റ്റഡിയില് വിട്ടുനല്കണമെന്ന് ആവശ്യപ്പെട്ട് അങ്കമാലി കോടതിയില് വെള്ളിയാഴ്ച അപേക്ഷ നല്കാന് പ്രത്യേക അന്വേഷണസംഘം തീരുമാനിച്ചു. ആലുവ സബ് ജയിലില് റിമന്ഡിലായിരുന്ന ദിലീപിന്റെ രണ്ടുദിവസത്തെ പൊലീസ് കസ്റ്റഡി വെള്ളിയാഴ്ച അവസാനിക്കുന്നതിനാല് വിശദ ചോദ്യംചെയ്യലിനും അവസാനവട്ട തെളിവെടുപ്പിനുമായി തുടര്ന്നും കസ്റ്റഡിയില് വിട്ടുതരണമെന്നാകും ആവശ്യപ്പെടുക.
https://www.facebook.com/Malayalivartha
