മയക്കുമരുന്ന് കേസില്‍ ചോദ്യം ചെയ്യലിന് ഹാജരാകാന്‍ 15 നടീനടന്‍മാര്‍ക്ക് തെലങ്കാന എക്‌സൈസ് വകുപ്പിന്റെ നോട്ടീസ്. സൂപ്പര്‍ താരം രവി തേജ, ഹിറ്റ് സിനിമകളുടെ സംവിധായകനായ പുരി ജഗന്നാഥ്, സുബ്രം രാജു, ദിലീപിന്റെ ആഗതന്‍ സിനിമയിലെ നായിക ചാര്‍മി കൗര്‍, ഗായിക ഗീതാ, ആനന്ദ കൃഷ്ണ നന്ദു, തനീഷ്, നവദീപ്, ശ്യാം.കെ.നായിഡു, മുമൈദ് ഖാന്‍ തുടങ്ങിയ താരങ്ങള്‍ക്കാണ് നോട്ടസ്. ജൂലൈ 19നും 27നും ഇടയില്‍ ഹാജരാകണമെന്നാണ് എക്‌സൈസ് വകുപ്പിന്റെ നിര്‍ദേശം.
കഴിഞ്ഞദിവസം പിടിയിലായ മയക്കുമരുന്ന് മാഫിയയുമായി ബന്ധമുണ്ടെന്ന സംശയത്തെ തുടര്‍ന്നാണ് നടപടി. സംഘത്തില്‍പ്പെട്ട ഒരാളുടെ മൊബൈലില്‍ നിന്നും ലഭിച്ച വിവരങ്ങളുടെ അടിസ്ഥാനത്തിലാണ് നോട്ടീസ്.
കേസില്‍ താരങ്ങള്‍ക്കെതിരെ വ്യക്തമായ തെളിവുകളുണ്ടെന്ന് എക്‌സൈസ് ഉദ്യോഗസ്ഥര്‍ പറഞ്ഞു. സിസി ടിവി ദൃശ്യങ്ങളും പണം കൈമാറ്റം ചെയ്തതിന്റെ തെളിവുകളും ലഭിച്ചിട്ടുണ്ട്. മയക്കുമരുന്ന് വില്‍ക്കുന്നയാളില്‍ നിന്ന് അത് കൈപ്പറ്റുന്ന താരങ്ങളുടെ െ്രെഡവര്‍മാരുള്‍പ്പെടെയുള്ളവരുടെ ദൃശ്യങ്ങളും കൈവശമുണ്ടെന്ന് ഉദ്യോഗസ്ഥര്‍ അറിയിച്ചു.
2008 മുതലാണ് ലഹരി തെലുങ്ക് സിനിമാ മേഖലയില്‍ പിടിമുറുക്കുന്നത്. സിനിമാ താരസംഘടനയായ മാ (മൂവി ആര്‍ട്ടിസ്റ്റ് അസോസിയേഷന്‍) അംഗങ്ങള്‍ ലഹരിവസ്തുക്കളുടെ ഉപയോഗത്തില്‍ നിന്നും ഒഴിഞ്ഞു നില്‍ക്കണമെന്ന് ആവശ്യപ്പെട്ട് നാട്ടീസ് നല്‍കിയിരുന്നു. ലഹരി ഉപയോഗം സ്വന്തം ജീവിതം മാത്രമല്ല, സിനിമമേഖലയ്ക്ക് ചീത്തപ്പേര് ഉണ്ടാക്കുമെന്നും പ്രസിഡന്റ് ശിവാജി രാജ പറഞ്ഞിരുന്നു.