'ഇരുപതു രൂപയ്ക്കാണ് അവന്‍ എന്റെ മകളെ കൊലയ്ക്ക് കൊടുത്തത്' പൊള്ളലേറ്റ് അതീവ ഗുരുതര നിലയില്‍ മരണത്തോട് മല്ലടിച്ചു മകള്‍ കഴിയുന്ന മെഡിക്കല്‍ കോളജ് ആശുപത്രിയിലെ 15–ാം വാ!ര്‍ഡ് സര്‍ജറി തീവ്രപരിചരണ വിഭാഗത്തിനു മുന്നിലിരുന്ന് തേങ്ങലോടെയാണ് ആ അമ്മ ഇതു പറ!!ഞ്ഞത്. പത്തനംതിട്ട, കടമ്മനിട്ട സ്വദേശിനിയായ 17 വയസുകാരിയെ 80% പൊള്ളലേറ്റ നിലയില്‍ വെള്ളിയാഴ്ച രാത്രിയാണു മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചത്. വീടിന് പുറത്തേക്ക് വിളിച്ചിറക്കിയ അകന്ന ബന്ധുവായ തെക്കേച്ചരുവില്‍ സജില്‍ (23) കൈയില്‍ കരുതിയിരുന്ന പെട്രോള്‍ ദേഹത്ത് ഒഴിച്ച് തീ കൊളുത്തുകയായിരുന്നെന്നാണ് പെണ്‍കുട്ടി ഏറ്റുമാനൂര്‍ മജിസ്‌ട്രേട്ടിന് മൊഴി കൊടുത്തിരിക്കുന്നത്.

ആരോഗ്യ സ്ഥിതി അതീവ ഗുരുതരമായതോടെ വാര്‍ഡില്‍ നിന്ന് സര്‍ജറി തീവ്രപരിചരണ വിഭാഗത്തിലേക്ക് മാറ്റി. മകളുമായി സജില്‍ അടുപ്പത്തിലായിരുന്നെന്ന് അമ്മ പറയുന്നു. വെള്ളിയാഴ്ച വൈകിട്ട് ഓട്ടോ റിക്ഷയില്‍ വീടിന് സമീപം എത്തിയ ഇയാള്‍ മകളെ വീടിനു പുറത്തേക്ക് വിളിക്കുകയും ഓട്ടോറിക്ഷയ്ക്ക് കൂലി നല്‍കാന്‍ 20 രൂപ ആവശ്യപ്പെടുകയും ചെയ്തുവത്രെ. പണം നല്‍കാഞ്ഞതിനെ തുടര്‍ന്ന് കയ്യില്‍ കരുതിയിരുന്ന കുപ്പിയിലെ പെട്രോള്‍ ദേഹത്ത് ഒഴിച്ച് തീകൊളുത്തുകയായിരുന്നെന്ന് തന്നോടും പൊലീസിനോടും മകള്‍ ആവര്‍ത്തിച്ചു പറഞ്ഞതായും അമ്മ പറയുന്നു. അച്ഛന്‍ തെങ്ങുകയറ്റ തൊഴിലാളിയാണ്.

അമ്മ അടുത്തുള്ള വീടുകളില്‍ വീട്ടുജോലിക്ക് പോയിരുന്നു. മൂന്നു മക്കളില്‍ ഏറ്റവും ഇളയവളാണ് പൊള്ളലേറ്റ പെണ്‍കുട്ടി. പത്താം ക്ലാസില്‍ തോറ്റ ശേഷം തുടര്‍ന്നു പഠിക്കാന്‍ താല്‍പര്യമില്ലെന്നു പറഞ്ഞ് വീട്ടിലിരിക്കുകയായിരുന്നു. കടയില്‍ സെയില്‍സ് വിഭാഗത്തില്‍ ജോലിക്കു പോകാനും ശ്രമിക്കുന്നുണ്ടായിരുന്നു. ഇതിനിടയില്‍ രണ്ടു മാസം മുന്‍പാണ് മകനോടൊപ്പം അകന്ന ബന്ധുവായ സജില്‍ വീട്ടില്‍ വരാന്‍ തുടങ്ങിയത്. കാടുവെട്ടല്‍ തൊഴിലാളിയായിരുന്ന സജിലും മകളും തമ്മില്‍ ഇതിനിടെ പ്രണയത്തിലായി. ഈ ബന്ധത്തോട് പെണ്‍കുട്ടിയുടെ സഹോദരന് എതിര്‍പ്പായിരുന്നു. മകളെ വിവാഹം കഴിച്ച് നല്‍കണമെന്ന് സജില്‍ ആവശ്യപ്പെട്ടിരുന്നെങ്കിലും സമ്മതിച്ചില്ല.

തുടര്‍ന്നും മകളും സജിലും ഫോണില്‍ സംസാരിക്കാറുണ്ടായിരുന്നു. വെള്ളിയാഴ്ച വൈകിട്ട് കടയില്‍ പോയി അരി വാങ്ങിയ ശേഷം ആറു മണിയോടെയാണ് മകള്‍ വീട്ടിലെത്തിയത്. വീട്ടിലെത്തിയ ഉടന്‍ അരിസഞ്ചി വീട്ടില്‍ വച്ച ശേഷം പെട്ടെന്നു വീടിനു പുറത്തേക്ക് പോയി. ഏതാനും മിനിറ്റ് കഴിഞ്ഞ് തൊട്ടടുത്തുള്ള ഇവരുടെ കുടുംബ വീടിന് സമീപത്തു നിന്നു തീ ഉയരുന്നതു കണ്ടു. പിന്നാലെ അലറിക്കരച്ചിലും കേട്ടു. പെണ്‍കുട്ടിയുടെ സഹോദരന്‍, സഹോദരി, അമ്മ എന്നിവര്‍ ഈ സമയം വീട്ടിലുണ്ടായിരുന്നു. ഇവര്‍ ഓടി എത്തിയപ്പോഴേക്ക് മകള്‍ പൊള്ളലേറ്റ് പിടയുന്നതാണ് കണ്ടത്. സജില്‍ ഓടി രക്ഷപ്പെടുന്നത് കണ്ടുവെന്നും പറയുന്നു. ആദ്യം പത്തനംതിട്ട ജനറല്‍ ആശുപത്രിയിലും തുടര്‍ന്ന് മെഡിക്കല്‍ കോളജ് ആശുപത്രിയിലും പ്രവേശിപ്പിക്കുകയായിരുന്നു.