സ്വാശ്രയ മെഡിക്കല് ഫീസ് വര്ധനയ്ക്കെതിരായ പ്രതിഷേധത്തിനും പ്രവേശനം സംബന്ധിച്ച ആശയക്കുഴപ്പങ്ങള്ക്കുമിടെ ഇന്ന് സ്പോട്ട് അഡ്മിഷന്
സ്വാശ്രയ മെഡിക്കല് ഫീസ് വര്ധനയ്ക്കെതിരായ പ്രതിഷേധത്തിനും പ്രവേശനം സംബന്ധിച്ച ആശയക്കുഴപ്പങ്ങള്ക്കുമിടെ 23 കോളജുകളിലേക്കുള്ള സ്പോട്ട് അഡ്മിഷന് ഇന്ന്. അഞ്ച് ലക്ഷം രൂപ ഫീസും ആറ് ലക്ഷം രൂപ ബാങ്ക് ഗ്യാരന്റിയും ഉള്പ്പടെ 11 ലക്ഷമാണ് വിദ്യാര്ഥികള്ക്ക് പ്രവേശനത്തിനു വേണ്ടത്. ബാങ്ക് ഗ്യാരന്റിയുമായി ബന്ധപ്പെട്ട കാര്യത്തിലെ കടുത്ത ആശങ്കകള്ക്കിടെയാണ് പ്രവേശന നടപടികള്.
അതേസമയം, ബാങ്ക് ഗ്യാരന്റി സംബന്ധിച്ച പ്രതിസന്ധി പരിഹരിക്കാന് സര്ക്കാര് ഇന്ന് ബാങ്കുകളുമായി ചര്ച്ച നടത്തും. ബാങ്ക് ഗ്യാരന്റിയുടെ പേരില് ആരുടെയും പ്രവേശനം മുടങ്ങുന്നില്ലെന്ന് ഉറപ്പാക്കാനാണു സര്ക്കാരിന്റെ ശ്രമം. സ്വാശ്രയ മെഡിക്കല് കോളജുകളിലെ ബാക്കിയുള്ള സീറ്റുകളിലേക്കുള്ള സ്പോട്ട് പ്രവേശനമാണ് ഇന്നും നാളെയുമായി തിരുവനന്തപുരം മെഡിക്കല്കോളജില് നടക്കുന്നത്. ഡിഎം വയനാട്, അല് അസര്, മൗണ്ട് സിയോണ് എന്നീ കോളജുകളിലേക്കുള്ള അലോട്ട്മെന്റും പ്രവേശനവും ഇതിനൊപ്പം നടക്കും. കണ്ണൂര് അഞ്ചരക്കണ്ടി, പാലക്കാട് കരുണ എന്നീ കോളജുകള് ബാങ്ക് ഗ്യാരണ്ടി വേണ്ട, ബോണ്ട് മതി എന്ന് അറിയിച്ചിട്ടുണ്ട്.
ബാങ്ക് ഗ്യാരന്റി നല്കാന് സാധിക്കാത്ത കുട്ടികളുടെ പ്രവേശനം മുടങ്ങുമെന്ന സാഹചര്യത്തിലാണു സര്ക്കാര് ബാങ്കുകളുമായി ചര്ച്ച നടത്തുന്നത്. സ്റ്റേറ്റ് ലെവല് ബാങ്കേഴ്സ് കമ്മറ്റിയില് അംഗങ്ങളായ ബാങ്കുകളുടെ പ്രതിനിധികള് പങ്കെടുക്കും. ധനവകുപ്പ് അഡിഷനല് ചീഫ് സെക്രട്ടറി കെ.എം.ഏബ്രഹാമാണ് ബാങ്കുകളുമായി ചര്ച്ച നടത്തുന്നത്. കുട്ടികള്ക്ക് ആവശ്യമായ ബാങ്ക് ഗ്യാരന്റി നല്കാനുള്ള നിര്ദേശം നല്കിയിട്ടുണ്ടെന്ന് മുഖ്യമന്ത്രി പിണറായി വിജയന് അറിയിച്ചു.
അതേസമയം, എന്ജിനീയറിങ് കോളജില്നിന്നു വിടുതല് സര്ട്ടിഫിക്കറ്റ് നേടുകയും ഉയര്ന്ന ഫീസ് മൂലം മെഡിക്കല് പ്രവേശനം അസാധ്യമാകുകയും ചെയ്ത കുട്ടികള്ക്കു കോഴ്സില് പുനഃപ്രവേശനം നല്കാന് വിദ്യാഭ്യാസവകുപ്പ് ഉത്തരവിട്ടതാണ് ആശ്വാസകരമാണ്.
https://www.facebook.com/Malayalivartha
