കനകക്കുന്നിന് സമീപം ജവഹര്‍ ബാലഭവന് മുന്നിലെ കുഞ്ഞന്‍ വിമാനത്തിന് ഇനി പുതിയആകാശം! മുപ്പത് വര്‍ഷത്തിലേറെയായി മഴയും വെയിലുമേറ്റിരുന്ന സീഹോക്ക് എന്ന ചെറുവിമാനത്തിനാണ് അറ്റകുറ്റപ്പണിക്കുശേഷം പുതിയ മേല്ക്കൂര സ്ഥാപിച്ചത്.

ജവഹര്‍ ബാലഭവനില്‍ എത്തുന്നവരെ സ്വീകരിക്കുന്നത് ഈ ചെറിയവിമാനമാണ്. കാണുന്നവര്‍ക്ക് ഇത് ഒരുകളി വിമാനം മാത്രമാണ്. എന്നാല്‍ അത്ര നിസാരക്കാരനല്ല ഈ ചെറുവിമാനം. ചരിത്രം പേറുന്ന യഥാര്‍ത്ഥ ഒരു പോര്‍ വിമാനമാണ് ഇത്.

പതിനൊന്നു വര്‍ഷത്തെ കാത്തിരിപ്പ്

സീ ഹോക്ക് വിമാനങ്ങളും ഐ. എന്‍. എസ് വിക്രാന്തും ഭാ വിതലമുറയുടെ ചരിത്രപഠനവിഷയമാകുമ്പോള്‍ ചരിത്രപ്രാധാന്യമുള്ള ഈ ചെറുവിമാനം സംരക്ഷണം ലഭിക്കാതെ നശിക്കുന്നതായി വിവിധ കോണില്‍ നിന്നുയര്‍ന്ന പരാതികളാണ് ഇതിന്റെ പുനരുദ്ധാരണത്തിന് വഴിവച്ചത്.

ജവഹര്‍ ബാലഭവന് മുന്നില് കഴിഞ്ഞ മുപ്പത് വര്‍ഷമായി തുടര്‍ച്ചയായ മഴയും വെയിലുമേറ്റ് ഈ വിമാനത്തിന്റെ ചിലഭാഗങ്ങള്‍ ദ്രവിക്കാനും തുരുമ്പെടുത്ത് നശിക്കാനും തുടങ്ങിയിരുന്നു.

2006ല്‍ തിരുവല്ല സ്വദേശി ബ്ലസന്‍ സിബി, അന്നത്തെ രാഷ്ട്രപതി എ.പി.ജെ.അബ്ദുല്‍കലാമിന്വിമാനത്തിന്റെ ദുര്‍ഗതിയെക്കുറിച്ച് എഴുതിയ കത്താണ് വിമാനത്തിന്റെ പുനരുദ്ധാരണത്തിന് വഴിവച്ചത്. ഉടന്‍ വിമാനത്തിന്റെ അറ്റകുറ്റപ്പണി പൂര്‍ത്തിയാക്കണമെന്ന് രാഷ്ട്രപതി, കേരള ചീഫ് സെക്രട്ടറിക്ക് നിര്‍ദ്ദേശം നല്കിയെങ്കിലും പതിനൊന്നു വര്‍ഷം ആ ഉത്തരവ് ഫയലില്‍ കുരുങ്ങി കിടന്നു.

പിന്നീട് വിമാനത്തിന്റെ തുരുമ്പെടുത്ത ഭാഗങ്ങള്‍ അറ്റകുറ്റപ്പണിക്ക് ശേഷം പെയിന്റ് ചെയത് ശരിക്കായിട്ടുണ്ട്. വിമാനത്തിന് മേല്‍ക്കൂരയും പണികഴിപ്പിച്ചു. ഇരുപത്തഞ്ച് ലക്ഷം രൂപയാണ്‌സീ ഹോക്കി ന്റെ നവീകരണത്തിനായി സംസ്ഥാന സര്‍ക്കാര്‍ അനുവദിച്ചത്. ഇരുപത് ദിവസം കൊണ്ടാണ് പണി പൂര്‍ത്തിയാക്കിയത്.സംസ്ഥാന ഇന്‍ഡസ്ട്രിയല്‍ എന്റര്‍പ്രൈസസിനായിരുന്നു കെ.എസ്.ഐ.ഇ)അറ്റകുറ്റപ്പണിയുടെ ചുമതല.

ഇംഗ്ലണ്ടില്‍ നിര്‍മ്മിച്ച് 1960ല്‍ ഇന്ത്യന്‍ നേവിക്ക് കൈമാറിയ ഒറ്റ സീറ്റുള്ള ഫൈറ്റര്‍ വിമാനമാണ് ഇത്. വിമാനവാഹിനികപ്പലായ ഐ.എന്‍.എസ്.വിക്രാന്തിലെ 30സീഹോക്ക് വിമാനങ്ങളില് ഒന്ന്.
1971 ഇന്ത്യാ പാക് യുദ്ധത്തില്‍ ബംഗ്ലാദേശ് മോചനത്തിനായി വൈസ് അഡ്മിറല്‍ കൃഷ്ണന്റെ നേതൃത്വത്തില്‍ ചിറ്റഗോംഗ് തുറമുഖത്തും വിമാനത്താവളത്തിലും ഇന്ത്യ നടത്തിയ കനത്ത ബോംബിംഗില്‍ പങ്കെടുത്ത നിരവധി സീ ഹോക്ക് വിമാനങ്ങളില്‍ ഒന്നാണ് ഇവിടെ പ്രദര്‍ശിപ്പിച്ചിരിക്കുന്നത്.

40,000അടി ഉയരത്തില്‍ പറക്കാന്‍ ശേഷിയുള്ള ഈ സീ ഹോക്ക് വിമാനത്തിന് 40എം.എമ്മി ന്റെ നാല് തോക്കുകള്‍ , 1000 പൗണ്ടിന്റെ രണ്ട് ബോംബുകള്‍, രണ്ട് 500പൗണ്ട് ബോംബ്, 24 റോക്കറ്റുകള്‍ എന്നിവ വഹിക്കാനുള്ള ശേഷിയുണ്ട്. ഇന്ത്യന് നേവി എല്ലാ സീ ഹോക്ക് വിമാനങ്ങളും ഡീകമ്മീഷന് ചെയ്തതിനെത്തുടര്‍ന്നാണ് 1980ല്‍ തിരുവനന്തപുരത്ത് ബാലഭവന് തുടങ്ങിയപ്പോള്‍ ഇന്ത്യന്‍ നേവിയുടെ സതേണ്‍ കമാന്‍ഡന്റ് ഈ ചെറുപോര്‍ വിമാനം സംഭാവന ചെയ്തത്.

അന്ന് എയ്‌റോ മോഡലിംഗില് കോഴ്‌സുള്ള ഒരേ ഒരുബാലഭവന് എന്ന നിലയ്ക്കായിരുന്നു നേവി ഈ വിമാനം സമ്മാനിച്ചത്. ഈവിമാനത്തെ വ്യക്തമാ യി കാണുന്നതിന് വേണ്ടിയാണ് സംസ്ഥാന സര്‍ക്കാരും ബാലഭവന് അധികൃതരും ചേര്‍ന്ന് മ്യൂസിയം റോഡിലെ സ്ഥാപനത്തിന് മുന്നില്‍ വിമാനം പ്രദര്ശിക്കാന്‍ തീരുമാനിച്ചത്.