ജയിലുകളില്‍ ഉദ്യോഗസ്ഥ തേര്‍വാഴ്‌ചയെന്ന്‌ ജയില്‍ മേധാവി
സംസ്ഥാനത്തെ ജയിലുകളില്‍ ഉദ്യോഗസ്ഥ തേര്‍വാഴ്‌ചയെന്ന്‌ ജയില്‍ ഡി ജി പിയുടെ രഹസ്യ റിപ്പോര്‍ട്ട്‌. ഇടതുപക്ഷ അനുഭാവികളായ ഉദ്യോഗസ്ഥര്‍ ഇടതു പക്ഷത്ത്‌ നിന്നുള്ള പ്രതികളെ വഴിവിട്ട്‌ സഹായിക്കുകയാണെന്നും ഇത്തരം ഉദ്യോഗസ്ഥരെ കര്‍ശനമായി വിലക്കിയില്ലെങ്കില്‍ ജയില്‍ നടത്തിപ്പ്‌ ബുദ്ധിമുട്ടിലാകുമെന്നും സെന്‍കുമാര്‍ സര്‍ക്കാരിനെ അറിയിച്ചു. സെന്‍കുമാറിന്റെ റിപ്പോര്‍ട്ടിന്റെ പശ്ചാത്തലത്തില്‍ ആഭ്യന്തര മന്ത്രാലയത്തിലെ ഉയര്‍ന്ന ഉദ്യോഗസ്ഥര്‍ യോഗം ചേര്‍ന്ന്‌ കര്‍ശന നടപടികള്‍ സ്വീകരിക്കാന്‍ രമേശ്‌ ചെന്നിത്തല ആഭ്യന്തര സെക്രട്ടറിക്ക്‌ നിര്‍ദ്ദേശം നല്‍കി. സെന്‍കുമാര്‍ റിപ്പോര്‍ട്ട്‌ അതീവ ഗുരുതരമാണെന്നും രമേശ്‌ ഉദ്യോഗസ്ഥര്‍ക്ക്‌ മുന്നറിയിപ്പ് നല്‍കി.
ടി പി ചന്ദ്രശേഖരന്‍ വധക്കേസിലെ മൂന്ന്‌ പ്രതികളെ തിരുവനന്തപുരത്തേക്ക്‌ മാറ്റാന്‍ സെന്‍കുമാര്‍ തീരുമാനിച്ചത്‌ ഇവര്‍ക്ക്‌ ഉദ്യോഗസ്ഥരില്‍ നിന്നും നിര്‍ലോഭം സഹകരണം ലഭിക്കുന്ന പശ്ചാത്തലത്തിലാണ്‌. ജയില്‍പുള്ളികള്‍ക്ക്‌ സെല്‍ഫോണ്‍ ഉപയോഗിക്കാന്‍ അവസരം നല്‍കുന്നത്‌ ഉദ്യോഗസ്ഥര്‍ തന്നെയാണ്‌. ജയില്‍പുള്ളികളെ ഉദ്യോഗസ്ഥര്‍ സഹായിച്ചാല്‍ അവര്‍ക്കെതിരെ ക്രിമിനല്‍ കേസ്‌ ചാര്‍ജ്‌ ചെയ്യണമെന്നും സെന്‍കുമാര്‍ സര്‍ക്കാരിനെ അറിയിച്ചു.
നേരത്തേ ചില ഉദ്യോഗസ്ഥര്‍ നല്‍കിയ തെറ്റായ വിവരങ്ങളുടെ അടിസ്ഥാനത്തില്‍ പരസ്യപ്രസ്‌താവന നടത്തിയതിനെ തുടര്‍ന്നാണ്‌ ജയില്‍ ഡി ജി പിയായിരുന്ന ഡോ അലക്‌സാണ്ടര്‍ ജേക്കബ്‌ സ്ഥാനത്ത്‌ നിന്നും നീക്കം ചെയ്യപ്പെട്ടത്‌. അന്നത്തെ ജയില്‍ മേധാവിയെ ഉദ്യോഗസ്ഥര്‍ വഴിതെറ്റിച്ച കാര്യം അറിയാവുന്ന സെന്‍കുമാര്‍ ജയിലിന്റെ തലപ്പത്തെത്തിയതോടെ ഉദ്യോഗസ്ഥരെ വിശ്വസിക്കാതെയായി. അവര്‍ നല്‍കുന്ന റിപ്പോര്‍ട്ടുകള്‍ അവഗണിച്ചു. പകരം തനിക്ക്‌ കൃത്യമായ വിവരങ്ങള്‍ നല്‍കാന്‍ വിശ്യസ്‌തരായ ഉദ്യോഗസ്ഥരെ ചട്ടംകെട്ടി.
ട്രൗസര്‍ മനോജ്‌, വാഴപ്പള്ളി റഫീഖ്‌, കണ്ണന്‍ സിജിത്ത്‌ എന്നിവരെയാണ്‌ തിരുവനന്തപുരത്തേക്ക്‌ മാറ്റിയത്‌. ഇവര്‍ക്ക്‌ സെല്‍ഫോണും മറ്റ്‌ സഹായ സഹകരണങ്ങളും ജയിലില്‍ നിന്നും നിര്‍ലോഭം ലഭിച്ചിരുന്നു. മറ്റ്‌ ചില പ്രതികള്‍ക്ക്‌ മാഹിയില്‍ നിന്നും മദ്യം വാങ്ങി നല്‍കാനും ഉദ്യോഗസ്ഥര്‍ സഹായിച്ചു. ഇവരെ നാട്ടുകാര്‍ പിടിച്ച്‌ പോലീസില്‍ ഏല്‍പ്പിച്ചു. ജയില്‍ മാറ്റിയ പ്രതികളെ മലബാറിലെ കോടതികളിലുള്ള സിറ്റിങ്ങുകളില്‍ ഹാജരാക്കേണ്ടതില്ലെന്ന്‌ ജയില്‍ അധികൃതര്‍ തീരുമാനിച്ചു. കണ്ണൂരില്‍ നിന്നും സുരക്ഷാ കാരണങ്ങളാല്‍ നേരത്തെ 9 പ്രതികളെ വിയ്യൂരിലേക്ക്‌ മാറ്റിയിരുന്നു. എന്നാല്‍ വിയ്യൂരിലും കണ്ണൂര്‍ ആവര്‍ത്തിക്കുകയായിരുന്നു.
ഇടതുപക്ഷ സഹയാത്രികരായ തടവുകാര്‍ക്ക്‌ ജയിലില്‍ വന്‍ ആദരവ്‌ ലഭിക്കുന്നുണ്ടെന്ന്‌ സെന്‍കുമാറിന്‌ രഹസ്യസന്ദേശം ലഭിച്ചിരുന്നു. മാത്രമല്ല തടവുകാരോട്‌ മറ്റുള്ളവര്‍ ബഹുമാനത്തോടെയാണത്രേ പെരുമാറുന്നത്‌. ഇങ്ങനെയാണെങ്കില്‍ ജയിലില്‍ തടവുകാരുടെ യൂണിയനുണ്ടാകുന്ന കാലം വിദൂരത്തിലല്ലെന്നും പറയപ്പെടുന്നു. ടി പി കേസ്‌ ഉള്‍പ്പെടെയുള്ള പ്രതികള്‍ ജയിലില്‍ ഹീറോമാരാണെന്നും രഹസ്യ സന്ദേശമുണ്ട്‌.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
