ചേരാനല്ലൂരില്‍ 17കാരന്‍ ഓടിച്ച വാഹനം ഇടിച്ച് 55കാരന്‍ മരിച്ച സംഭവത്തില്‍ 17കാരനെ സ്‌റ്റേഷന്‍ ജാമ്യത്തില്‍ വിട്ടയച്ചതില്‍ പ്രതിഷേധിച്ച് മരിച്ച ജയബാലകൃഷ്ണന്റെ കുടുംബം ചേരാനല്ലൂര്‍ പൊലീസ് സ്‌റ്റേഷനു മുന്നില്‍ കുത്തിയിരിപ്പ് സമരം നടത്തി. അഡീഷണല്‍ ജില്ലാ ജഡ്ജിയുടെ മകനായതുകൊണ്ടാണോ പ്രതിക്ക് പ്രത്യേക പരിഗണന നല്‍കിയതെന്ന് കുടുംബാംഗങ്ങള്‍ ചോദിച്ചു. 17കാരനെ അറസ്റ്റ് ചെയ്യുന്നതുവരെ പ്രതിഷേധം അവസാനിപ്പിക്കില്ലെന്നും ഇവര്‍ വ്യക്തമാക്കി.

അപകടസമയത്ത് കാര്‍ അമിതവേഗത്തിലായിരുന്നുവെന്ന് പൊലീസ് കണ്ടെത്തിയതായാണ് വിവരം. മണിക്കൂറില്‍ 104 കിലോമീറ്റര്‍ വേഗത്തിലാണ് വാഹനം ഓടിച്ചിരുന്നതെന്ന് സൂചിപ്പിക്കുന്ന ദൃശ്യങ്ങള്‍ 17കാരന്റെ മൊബൈല്‍ ഫോണില്‍നിന്ന് ലഭിച്ചതായും റിപ്പോര്‍ട്ടുണ്ട്. അപകടത്തിനുപിന്നാലെ 17കാരനെ പൊലീസ് സ്‌റ്റേഷനിലെത്തിച്ചെങ്കിലും സ്‌റ്റേഷന്‍ ജാമ്യത്തില്‍ വിട്ടയച്ച നടപടിയാണ് കുടുംബത്തെ പ്രകോപിപ്പിച്ചത്.

ആദ്യം ചുമത്തിയ കേസിലെ വകുപ്പുകള്‍ ദുര്‍ബലമാണെന്നും കുടുംബം ആരോപിക്കുന്നു. വാഹനം ഓടിച്ചിരുന്ന 17കാരനെതിരെ കര്‍ശന നടപടി സ്വീകരിക്കണമെന്നും കാര്‍ ഉടമയ്‌ക്കെതിരെയും കേസെടുക്കണമെന്നും ആവശ്യപ്പെട്ടാണ് പ്രതിഷേധം. അപകടത്തിന്റെ ഗൗരവം കണക്കിലെടുക്കാതെ പ്രതിയെ വിട്ടയച്ചത് എന്തിനാണെന്ന് കുടുംബാംഗങ്ങള്‍ ചോദിച്ചു. സംഭവത്തില്‍ നീതി ലഭിക്കണമെന്നാവശ്യപ്പെട്ട് കുടുംബം റോഡിലിരുന്നും പ്രതിഷേധിച്ചു.