ചേരാനല്ലൂര്‍ വാഹനാപകടക്കേസില്‍ പ്രതിയായ ജഡ്ജിയുടെ മകന്‍ 17കാരനെ സ്‌റ്റേഷന്‍ ജാമ്യം നല്‍കി വിട്ടയച്ചതില്‍ അടിയന്തര നടപടിക്ക് മന്ത്രി രമേശ് ചെന്നിത്തല ഡി.ജി.പിക്ക് നിര്‍ദ്ദേശം നല്‍കി. അപകടവുമായി ബന്ധപ്പെട്ട് പൊലീസിന് വീഴ്ചയുണ്ടായെന്ന ആരോപണത്തില്‍ ക്രമസമാധാന ചുമതലയുള്ള എ.ഡി.ജി.പി നേരിട്ട് അന്വേഷണം നടത്തും. കൊച്ചി സിറ്റി പൊലീസ് കമ്മിഷണര്‍ കാളിരാജ് മഹേശ്വറിന് കാരണം കാണിക്കല്‍ നോട്ടീസ് നല്‍കും.

ഞായര്‍ പുലര്‍ച്ചെ മൂന്നുമണിയോടെയാണ് 17കാരന്‍ ഓടിച്ച കാര്‍ ഇടിച്ച് മാഞ്ഞാലി സ്വദേശി ജയബാലകൃഷ്ണന്‍ (56) മരിച്ചത്. ആലുവയിലെ ഫ്‌ളാറ്റില്‍നിന്നാണ് വീട്ടുകാര്‍ അറിയാതെ ജഡ്ജിയുടെ മകന്‍ കാറുമായി പുറത്തുപോയത്. ചിറ്റൂരിനടുത്ത് ഒരു തട്ടുകട നടത്തുന്നയാളാണ് ജയബാലകൃഷ്ണന്‍. രാത്രി കട അടച്ച് വീട്ടിലേക്ക് വരുന്ന വഴിയില്‍ ജയബാലകൃഷ്ണന്‍ സഞ്ചരിച്ച സ്‌കൂട്ടറിന് പിന്നില്‍ അമിതവേഗത്തിലെത്തിയ ബെന്‍സ് കാര്‍ ഇടിക്കുകയായിരുന്നു. ഇടിയുടെ ആഘാതത്തില്‍ സ്‌കൂട്ടര്‍ പൂര്‍ണമായും തകരുകയും ജയബാലകൃഷ്ണന്‍ റോഡിലേക്ക് തെറിച്ചുവീഴുകയും ചെയ്തു. അപകടത്തിന് പിന്നാലെ 17കാരനെതിരെ കേസെടുത്തെങ്കിലും വൈകിട്ടോടെ സ്‌റ്റേഷന്‍ ജാമ്യത്തില്‍ വിട്ടയച്ചിരുന്നു. ഇത് വിവാദമായതോടെയാണ് മന്ത്രി രമേശ് ചെന്നിത്തല അടിയന്തര നടപടിക്ക് നിര്‍ദ്ദേശം നല്‍കിയത്.

അതിനിടെ കാറോടിച്ച 17കാരനെതിരെ മനഃപൂര്‍വമുള്ള നരഹത്യാ കുറ്റം ചുമത്തി. നേരത്തെ അശ്രദ്ധ മൂലമുള്ള മരണത്തിനായിരുന്നു കേസെടുത്തിരുന്നത്. അപകടത്തില്‍ 17കാരന്റെ പിതാവും കാറുടമയുമായ അഡിഷണല്‍ സെഷന്‍സ് ജഡ്ജിക്കെതിരെയും കേസെടുത്തേക്കും. മോട്ടോര്‍ വെഹിക്കിള്‍ നിയമ പ്രകാരവും ബി.എന്‍.എസ് പ്രകാരവുമുള്ള കുറ്റങ്ങളാകും ചുമത്തുക. ഇക്കാര്യം പരിശോധിക്കാന്‍ നിര്‍ദ്ദേശിച്ചതായി എ.ഡി.ജി.പിയുടെ ഓഫീസ് അറിയിച്ചു.