17 കാരിയായ പെണ്‍കുട്ടിയെ ബന്ധുവിന്റെ വീടിന് സമീപം മരിച്ച നിലയില്‍ കണ്ടെത്തി. ഞായാറാഴ്ച രാവിലെയോടെയാണ് പെണ്‍കുട്ടിയുടെ മൃതദേഹം കണ്ടെത്തിയത്. മൃതദേഹത്തിന്റെ സാഹചര്യം കണക്കിലെടുത്ത് പെണ്‍കുട്ടി ബലാത്സംഗത്തിന് ഇരയായിട്ടുണ്ടെന്നാണ് പൊലീസിന്റെ പ്രാഥമിക നിഗമനം. പശ്ചിമ ബംഗാളിലെ നോര്‍ത്ത് 24 പര്‍ഗാനാസ് ജില്ലയിലാണ് സംഭവം. സംഭവവുമായി ബന്ധപ്പെട്ട് ബന്ധുവിനെ പൊലീസ് കസ്റ്റഡിയിലെടുത്ത് ചോദ്യം ചെയ്യുകയാണ്.

ശനിയാഴ്ച രാത്രി വീടിനടുത്തുള്ള സംഗീതപരിപാടിയില്‍ പങ്കെടുക്കാന്‍ പെണ്‍കുട്ടി കുടുംബാംഗങ്ങള്‍ക്കും സുഹൃത്തുക്കള്‍ക്കുമൊപ്പം പോയിരുന്നു. പരിപാടി നടന്നുകൊണ്ടിരിക്കെ മൊബൈല്‍ ഫോണിലേക്ക് ഒരു കോള്‍ വന്നു. തുടര്‍ന്ന് പെണ്‍കുട്ടി വേദിയില്‍നിന്ന് പോയെന്നാണ് ബന്ധുക്കള്‍ പറയുന്നത്. പിന്നീട് തിരികെ എത്താതായതോടെ കുടുംബാംഗങ്ങള്‍ തിരച്ചില്‍ നടത്തിയെങ്കിലും കണ്ടെത്താനായില്ല. ഞായറാഴ്ച രാവിലെയാണ് ബന്ധുവീടിന് പിന്നില്‍ മൃതദേഹം കണ്ടെത്തിയത്.

പരിപാടിക്കിടെ പെണ്‍കുട്ടിയെ കണ്ടിരുന്നുവെന്ന് മാതൃസഹോദരിയും പറഞ്ഞു. രാത്രി എട്ടുമണിയോടെ പരിപാടിക്കായി വീട്ടില്‍നിന്ന് ഇറങ്ങിയപ്പോള്‍ വഴിയില്‍വച്ച് പെണ്‍കുട്ടിയെ കണ്ടിരുന്നു. സുഹൃത്തിനൊപ്പം പരിപാടിക്കെത്തിയതാണെന്ന് പറഞ്ഞതിനെത്തുടര്‍ന്ന് തങ്ങള്‍ മുന്നോട്ടുപോയി. പരിപാടി കഴിഞ്ഞ് വീട്ടിലെത്തിയപ്പോഴാണ് പെണ്‍കുട്ടി തിരിച്ചെത്തിയിട്ടില്ലെന്ന വിവരം അറിഞ്ഞത്. ഫോണില്‍ വിളിച്ചെങ്കിലും മറുപടി ലഭിച്ചില്ല. നെറ്റ്‌വര്‍ക്ക് പ്രശ്‌നമാണെന്ന് കരുതി ഉറങ്ങുകയായിരുന്നുവെന്നും പുലര്‍ച്ചെയാണ് സംഭവത്തെക്കുറിച്ച് അറിഞ്ഞതെന്നും മാതൃസഹോദരി വ്യക്തമാക്കി.