കോണ്‍ഗ്രസ്സിനെതിരെ രൂക്ഷവിമര്‍ശനവുമായി ചീഫ് വിപ്പ് പി.സി.ജോര്‍ജ് വീണ്ടും. എമേര്‍ജിങ് ഫൈറ്റ് എന്ന തന്റെ ബ്ലോഗിലെഴുതിയ കുറിപ്പിലാണ് അദ്ദേഹം കോണ്‍ഗ്രസ്സിനെതിരെ ആഞ്ഞടിച്ചിരിക്കുന്നത്. കോണ്‍ഗ്രസ്സുകാരെ ഭസ്മാസുരന്മാരോട് ജോര്‍ജ്ജ് ഉപമിച്ചിരിക്കുന്നു. കോണ്‍ഗ്രസ്സിനെതിരെയുള്ള പ്രസ്താവനായുദ്ധം പുതിയൊരു തലത്തിലേക്ക് കൊണ്ടുപോകുകയാണ് ‘മനുഷ്യകുലത്തിനുള്ള മഹാസന്ദേശം’ എന്ന കുറിപ്പിലൂടെ പി.സി.ജോര്‍ജ് ചെയ്യുന്നത്.

ലോക്‌സഭാ തിരഞ്ഞെടുപ്പില്‍ കോണ്‍ഗ്രസ്സിനു നേരിട്ട ദയനീയ പരാജയത്തിന്റെ കാരണങ്ങള്‍ വിലയിരുത്തുന്നതാണ് ഈ കുറിപ്പിന്റെ ഉള്ളടക്കം.’സ്രഷ്ടാവിന്റെ മുമ്പില്‍ പാപം ചെയ്യുന്നവന് വൈദ്യസഹായം വേണ്ടിവരും’ എന്ന തലക്കെട്ടിലെഴുതിയ കുറിപ്പില്‍ സര്‍ക്കാരിനു നേതൃത്വം നല്‍കുന്ന കക്ഷിയെ ജോര്‍ജ് കണക്കിന് കളിയാക്കിയിട്ടുണ്ട്. ജനങ്ങള്‍ യജമാനന്മാരാണെന്ന വസ്തുത കോണ്‍ഗ്രസ് മറന്നുവെന്നാണ് ജോര്‍ജ്ജിന്റെ പക്ഷം. ‘എന്റെ ജീവിതമാണ് എന്റെ സന്ദേശം’ എന്നു പറയാന്‍ ധൈര്യം കാട്ടിയ ഒരാള്‍ മാത്രമേ മഹാപ്രസ്ഥാനമായ കോണ്‍ഗ്രസ്സിലുണ്ടായിട്ടുള്ളൂ. ആ മഹാത്മാവിന്റെ രക്തസാക്ഷിത്വത്തിന് കാരണമായ വിശ്വാസസംഹിത ഉയര്‍ത്തുന്ന ബി.ജെ.പിക്ക് രാജ്യാധികാരം ലഭിക്കാന്‍ കാരണം ഇന്നത്തെ കോണ്‍ഗ്രസ്സുകാരുടെ അധികാര ദുര്‍വിനിയോഗമാണ്.

ജനങ്ങള്‍ നല്‍കിയ അധികാരം കോണ്‍ഗ്രസ്സുകാര്‍ കൈയാളിയത് ഭസ്മാസുരന് വരം കിട്ടിയ പ്രതീതിയിലാണെന്ന് ജോര്‍ജ്ജ് കുറ്റപ്പെടുത്തുന്നു. വ്യക്തികള്‍ക്ക് ചുറ്റും അപ്പക്കഷണങ്ങള്‍ കാംക്ഷിച്ച് കൂട്ടം കൂടിയവരാണ് കോണ്‍ഗ്രസ്സുകാര്‍. വ്യക്ത്യാധിഷ്ഠിത അജണ്ടകള്‍ക്കുവേണ്ടി പൊതുജീവിതം സമര്‍പ്പിച്ചപ്പോള്‍ യജമാനന്മാരായ ജനങ്ങളെ അവര്‍ മറന്നു. തന്നെപ്പോലുള്ള വിമര്‍ശകര്‍ക്കെതിരെ വാളോങ്ങുന്ന യൂത്ത് കോണ്‍ഗ്രസ്സുകാര്‍ അടക്കമുള്ളവര്‍ക്ക് മുന്നറിയിപ്പ് നല്‍കിക്കൊണ്ടാണ് ജോര്‍ജ് കുറിപ്പ് അവസാനിപ്പിച്ചിരിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha