ശ്രീകൃഷ്ണ ജയന്തിയോടനുബന്ധിച്ച് നടന്ന ഘോഷയാത്രയില്‍ ആലിലയില്‍ കിടക്കുന്ന കൃഷ്ണനാക്കാന്‍ പിഞ്ചുകുഞ്ഞിനെ കെട്ടിയിട്ട സംഭവം പുറത്തറിയിച്ച യുവാവിന് ഭീഷണി. കാസര്‍ഗോഡ് സ്വദേശിയായ ശ്രീകാന്ത് പ്രഭാകരന്‍ എന്ന യുവാവിന് നേരെയാണ് ഭീഷണി ഉയര്‍ന്നിരിക്കുന്നത്.

സംഭവത്തെക്കുറിച്ചുള്ള യുവാവിന്റെ ഫേസ്ബുക്ക് പോസ്റ്റ് വൈറലായതോടെയാണ് വിഷയം ദേശീയ മാധ്യമങ്ങളടക്കം റിപ്പോര്‍ട്ട് ചെയ്തത്. ഇതിന് പിന്നാലെയാണ് ഭീഷണി മുഴക്കിയുള്ള ഫോണ്‍സന്ദേശം ലഭിച്ചിരിക്കുന്നത്.
ഇന്നലെ രാത്രി എട്ടിന് ശേഷമാണ് 31ല്‍ തുടങ്ങിയ ആറക്ക നമ്പറുകളില്‍ നിന്നാണ് ഫോണ്‍ കോള്‍ വന്നതെന്ന് ശ്രീകാന്ത് തന്റെ ഫേസ്ബുക്ക് പോസ്റ്റില്‍ പറയുന്നു. അതിന് ശേഷം നിരവധി കോളുകള്‍ വന്നു. പലരും പച്ചക്ക് തെറി വിളിച്ചു. കുട്ടിയുടെ അച്ഛനും അമ്മയ്ക്കുമില്ലാത്ത വിഷയം നിനക്കെന്തിനാണെന്നും പുറത്തിറക്കില്ലെന്ന് ഭീഷണിപ്പെടുത്തിയതായും യുവാവ് പറഞ്ഞു.
ശ്രീകൃഷ്ണ ജയന്തി ദിനത്തില്‍ പയ്യന്നൂരില്‍ നടന്ന ഘോഷയാത്രയില്‍ ആലിലയില്‍ ഉറങ്ങുന്ന കൃഷ്ണനാക്കാന്‍ കുഞ്ഞിനെ മണിക്കൂറുകളോളം കെട്ടിയിട്ട നിലയില്‍ വെയിലത്ത് കൊണ്ടുനടന്നത് ശ്രദ്ധയില്‍പെട്ട ശ്രീകാന്ത് സംഭവത്തെക്കുറിച്ച് ഫോട്ടോ സഹിതം ഫേസ്ബുക്കില്‍ പോസ്റ്റ് ചെയ്യുകയായിരുന്നു. ഉടന്‍ ചൈല്‍ഡ് ലൈന്‍ അധികൃതരെ വിവരമറിയിച്ചെങ്കിലും നടപടിയുണ്ടായില്ല. ഈ രാജ്യത്ത് എക്കാലത്തും ഇരട്ട നീതിയാണ് നിലനിന്നു പോന്നിട്ടുള്ളതെന്നും ശ്രീകാന്ത് പ്രതികരിച്ചു