അഞ്ചരക്കണ്ടി ഡെന്റല് കോളേജിലെ വിദ്യാര്ത്ഥി പ്രതിഷേധത്തെ തുടര്ന്ന് അധ്യാപകര് കൂട്ടരാജി നല്കി
അഞ്ചരക്കണ്ടി ഡെന്റല് കോളേജിലെ വിദ്യാര്ത്ഥി നിതിന് രാജിന്റെ മരണത്തെത്തുടര്ന്ന് കോളേജില് ഉടലെടുത്ത വിദ്യാര്ത്ഥി പ്രതിഷേധത്തെ തുടര്ന്ന് ഓര്ത്തോഡോന്റിക് വിഭാഗത്തിലെ അധ്യാപകര് ഉള്പ്പെടെയുള്ള മുഴുവന് ജീവനക്കാരും രാജിവെച്ചു. വകുപ്പിലെ ഏഴ് ജീവനക്കാരാണ് ഒന്നിച്ച് മാനേജ്മെന്റിന് രാജിക്കത്ത് കൈമാറിയത്. എന്നാല്, നിലവിലെ പ്രത്യേക സാഹചര്യം കണക്കിലെടുത്ത് മാനേജ്മെന്റ് ഈ രാജിക്കത്തുകള് ഇതുവരെ അംഗീകരിച്ചിട്ടില്ലെന്നാണ് റിപ്പോര്ട്ടുകള്.
കഴിഞ്ഞ കുറച്ചു ദിവസങ്ങളായി കോളേജില് തുടരുന്ന ശക്തമായ വിദ്യാര്ത്ഥി പ്രതിഷേധമാണ് ഈ കൂട്ടരാജിക്ക് പിന്നിലെന്നാണ് സൂചന. നിതിന് രാജിന്റെ മരണത്തിന് ഉത്തരവാദികളായ അധ്യാപകര്ക്കും ജീവനക്കാര്ക്കുമെതിരെ നടപടി വേണമെന്നാവശ്യപ്പെട്ട് സോഷ്യല് മീഡിയയിലടക്കം വലിയ രീതിയിലുള്ള ക്യാമ്പയിനുകള് നടന്നിരുന്നു. ജീവനക്കാര് മാനസികമായി പീഡിപ്പിച്ചതാണ് വിദ്യാര്ത്ഥിയുടെ മരണത്തിന് കാരണമെന്ന ഗുരുതര ആരോപണമാണ് സഹപാഠികള് ഉന്നയിക്കുന്നത്.
വിദ്യാര്ത്ഥി സംഘടനകളുടെയും സഹപാഠികളുടെയും ഭാഗത്തുനിന്നുണ്ടായ കടുത്ത പ്രതിഷേധങ്ങളും കുറ്റാരോപിതരായ അധ്യാപകര്ക്കെതിരെ ഉയരുന്ന ജനരോഷവുമാണ് ജീവനക്കാരെ ഇത്തരമൊരു തീരുമാനത്തിലേക്ക് നയിച്ചതെന്ന് കരുതപ്പെടുന്നു.
https://www.facebook.com/Malayalivartha
