ഗവര്‍ണര്‍മാര്‍ കസേരയില്‍ അള്ളി പിടിക്കുമ്പോള്‍ ആന്റണി ശ്രദ്ധേയനാവുന്നു ; തനിക്ക്‌ പോലീസും പട്ടാളവും വേണ്ട
കോണ്‍ഗ്രസ്‌ നിയമിച്ച ഗവര്‍ണര്‍മാര്‍ സ്ഥാനമൊഴിയാതെ മോഡിയെ പ്രതിസന്ധിയിലാക്കുമ്പോള്‍ മുന്‍ കേന്ദ്രമന്ത്രി എ.കെ. ആന്റണി തനിക്കുള്ള സുരക്ഷ പിന്‍വലിക്കണമെന്ന മാതൃകാപരമായ നിര്‍ദ്ദേശവുമായി രംഗത്തെത്തി. ഇസഡ്‌ പ്ലസ്‌ കാറ്റഗറി സുരക്ഷയാണ്‌ ആന്റണിക്ക്‌ നല്‍കുന്നത്‌. മന്ത്രി പദവി ഒഴിഞ്ഞെങ്കിലും ആന്റണിയുടെ സുരക്ഷ പിന്‍വലിക്കേണ്ടതില്ലെന്നായിരുന്നു കേന്ദ്ര ആഭ്യന്തര മന്ത്രാലയത്തിന്റെ തീരുമാനം. അകമ്പടിയും പോലീസ് സുരക്ഷയും ആന്റണിക്കുണ്ട്‌. ഇതിനിടെ തനിക്ക്‌ ഇത്തരം സുരക്ഷകളൊന്നും വേണ്ടെന്ന്‌ ആവശ്യപ്പെട്ട് കേന്ദ്രമന്ത്രി രാജ്‌നാഥ്‌സിംഗിന്‌ ആന്റണി കത്തെഴുതി.
സുരക്ഷ വര്‍ദ്ധിപ്പിക്കണമെന്നാവശ്യപ്പെട്ട്‌ തനിക്ക്‌ നേതാക്കളുടെ കത്തുകള്‍ നിരന്തരമായി ലഭിക്കുമ്പോള്‍ സുരക്ഷ വേണ്ടെന്ന്‌ ഒരാള്‍ ആവശ്യപ്പെടുന്നത്‌ രാജ്‌സാഥ്‌സിംഗിനെ അത്ഭുതപ്പെടുത്തി. അദ്ദേഹം ആന്റണിയുമായി ഫോണില്‍ സംസാരിച്ചെന്നാണ്‌ സൂചന. തന്നോടുള്ള സ്‌നേഹത്തില്‍ നന്ദിയുണ്ടെന്നും എന്നാല്‍ രാജ്യത്ത്‌ തനിക്കാരുടെയും ഭീഷണിയില്ലെന്നും ആന്റണി അറിയിച്ചതായാണ്‌ വിവരം. ഔദ്യോഗിക പദവികളൊന്നും ഇല്ലാത്ത തനിക്ക്‌ അതീവ സുരക്ഷ ബുദ്ധിമുട്ട്‌ ഉണ്ടാക്കുന്നുവെന്നാണ്‌ ആന്റണിയുടെ കണ്ടെത്തല്‍. നിയമപ്രകാരം സുരക്ഷ നല്‍കണമെന്നുണ്ടെങ്കില്‍ ഏറ്റവും ചുരുങ്ങിയ സുരക്ഷ മാത്രം മതിയെന്ന്‌ അദ്ദേഹം ആഭ്യന്തരമന്ത്രാലയത്തെ അറിയിച്ചു. ആന്റണിയുടെ സ്ഥാനത്ത്‌ വക്കം പുരുഷോത്തമനായിരുന്നെങ്കില്‍ എന്തു സംഭവിക്കുമായിരുന്നു എന്നാണ്‌ കേരളത്തിലെ കോണ്‍ഗ്രസ്‌ നേതാക്കള്‍ ചോദിക്കുന്നത്‌.
ഏതായാലും ആന്റണിക്ക്‌ നിലവില്‍ നല്‍കുന്ന സുരക്ഷ തുടരാനാണ്‌ ആഭ്യന്തരമന്ത്രാലയം തീരുമാനിച്ചിച്ചുള്ളത്‌. സെക്യൂരിറ്റി റിവ്യൂ കമ്മിറ്റിയില്‍ ആന്റണിയുടെ കത്ത്‌ ചര്‍ച്ച ചെയ്യാമെന്നും അവര്‍ തീരുമാനം എടുക്കട്ടെ എന്നുമാണ്‌ ആഭ്യന്തര മന്ത്രാലയത്തിന്റെ നിലപാട്‌. യുപിഎ സര്‍ക്കാര്‍ അധികാരമൊഴിഞ്ഞയുടനെ കൃഷ്‌ണമേനോന്‍ മാര്‍ഗിലെ വലിയവീട്ടില്‍ നിന്നും ഒഴിയാന്‍ ആന്റണി തീരുമാനിച്ചിരുന്നു. എന്നാല്‍ ചെറിയ ബംഗ്‌ളാവ്‌ സര്‍ക്കാര്‍ അദ്ദേഹത്തിന്‌ അനുവദിച്ചിട്ടില്ല. ഇതിനുവേണ്ടിയും ആന്റണി സമ്മര്‍ദ്ദം തുടരുന്നു.
ഉത്തരേന്ത്യയിലെ നേതാക്കള്‍ക്കെല്ലാം ആന്റണി കൗതുകമായി മാറിയിരിക്കുകയാണ്‌. രാജ്‌നാഥ്‌സിംഗ്‌ ആന്റണിയുടെ ആവശ്യം നരേന്ദ്രമോഡിയെ അറിയിച്ചതായാണ്‌ വിവരം. എന്നാല്‍ സെക്യൂരിറ്റി റിവ്യൂ കമ്മിറ്റി തീരുമാനിക്കുന്നതുവരെ ആന്റണിക്ക്‌ നല്‍കി വരുന്ന സുരക്ഷ പിന്‍വലിക്കേണ്ടതില്ലെന്നാണ്‌ മോഡിയും ഉപദേശിച്ചത്‌. ഇത്തരം കാര്യങ്ങളില്‍ ആഭ്യന്തരമന്ത്രാലയം കൈകടത്തേണ്ടതില്ലെന്നും മോഡി പറഞ്ഞത്രേ. ആന്റണിയുമായി മോഡിക്കും അടുത്ത ബന്ധമുണ്ട്‌. പ്രമുഖ നേതാക്കള്‍ക്കൊന്നും തങ്ങളുടെ ഭാഗത്ത്‌ നിന്നും യാതൊരു ബുദ്ധിമുട്ടും ഉണ്ടാകരുതെന്നാണ്‌ കേന്ദ്രസര്‍ക്കാരിന്റെ നിലപാട്‌. കോണ്‍ഗ്രസ്‌ നിയമിച്ച ഗവര്‍ണര്‍മാര്‍ രാജിവയ്‌ക്കണമെന്നു തന്നെയാണ്‌ ആന്റണിയുടെയും നിലപാട്‌.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
