നടിയെ ആക്രമിച്ച് കേസില്‍ ദിലീപിനെതിരായ കുറ്റപത്രം വൈകുമെന്ന് ഡിജിപി ലോക്‌നാഥ് ബെഹ്‌റ. പ്രോസിക്യൂഷന്റെ വീഴ്ചകൊണ്ടല്ല ദിലീപിനു ജാമ്യം ലഭിച്ചത്. ദിലീപിന് ജാമ്യം നല്‍കിയത് കോടതിയാണ്. അത് അംഗീകരിക്കുന്നു. അന്വേഷണം നടക്കുകയാണെന്നും ഡിജിപി വ്യക്തമാക്കി.

85 ദിവസത്തെ ജയില്‍വാസത്തിനു ശേഷം ചൊവ്വാഴ്ചയാണ് ദിലീപിനു ജാമ്യം ലഭിച്ചത്. അന്വേഷണത്തില്‍ കാര്യമായ പുരോഗതിയുണ്ടെന്നു വിലയിരുത്തിയ കോടതി, ദിലീപിനു ക്രിമിനല്‍ പശ്ചാത്തലമില്ലെന്ന വാദം പരിഗണിച്ചാണ് ജാമ്യം നല്‍കിയത്. 

ജാമ്യത്തിനായി മൂന്നാം തവണ ഹൈക്കോടതിയെ സമീപിച്ച ദിലീപിന് അനുകൂലമായി ഉത്തരവുണ്ടായി. മുമ്പ് രണ്ടു തവണ വീതം ഹൈക്കോടതിയും അങ്കമാലി മജിസ്‌ട്രേട്ട് കോടതിയും ജാമ്യാപേക്ഷ തള്ളിയിരുന്നു.
ഈയാഴ്ചതന്നെ കുറ്റപത്രം സമര്‍പ്പിക്കാനാണ് അന്വേഷണ ഉദ്യോഗസ്ഥരുടെ നീക്കമെന്ന് നേരത്തേ റിപ്പോര്‍ട്ടുണ്ടാായിരുന്നു. 

ജയിലില്‍ 85 ദിവസം പൂര്‍ത്തിയാക്കിയ ദിലീപിനു കര്‍ശന ഉപാധികളോടെ കോടതി ജാമ്യം അനുവദിച്ചത്.
കുറ്റകൃത്യം ആസൂത്രണം ചെയ്തു എന്നതുള്‍പ്പെടെ പ്രോസിക്യൂഷന്റെ ആരോപണങ്ങള്‍ ഗുരുതരമാണെങ്കിലും ലൈംഗികാതിക്രമത്തില്‍ ദിലീപ് പങ്കെടുത്തിട്ടില്ലെന്ന് ഹൈഹെക്കോടതി വിലയിരുത്തിയിരുന്നു. 

മുന്‍വിവാഹം തകര്‍ന്നതിനു പിന്നില്‍ ഉപദ്രവിക്കപ്പെട്ട നടിയാണെന്ന സംശയത്തില്‍ ദിലീപ് ഒന്നരക്കോടി രൂപയ്ക്കു സുനില്‍കുമാറിനു (പള്‍സര്‍ സുനി) ക്വട്ടേഷന്‍ നല്‍കിയെന്നും 10,000 രൂപ അഡ്വാന്‍സ് നല്‍കിയെന്നുമാണു പ്രോസിക്യൂഷന്‍ കേസ്.

ഗൂഢാലോചനയെ തുടര്‍ന്നു 2017 ഫെബ്രുവരി 17നു കൃത്യം നടത്തിയപ്പോള്‍ സുനില്‍ നടിയെ ക്രൂരമായി ഉപദ്രവിച്ചെന്നും ആരോപണമുണ്ട്. അശ്ലീല ചിത്രങ്ങള്‍ പകര്‍ത്താന്‍ സുനിലിനെ നിയോഗിച്ചു എന്നതു മാത്രമാണു ദിലീപിനെതിരെ ആരോപിക്കപ്പെട്ടതെന്നും കൂട്ടമാനഭംഗ കേസ് നിലനില്‍ക്കില്ലെന്നും 60 ദിവസം പൂര്‍ത്തിയായാല്‍ അവകാശജാമ്യത്തിന് അര്‍ഹതയുണ്ടെന്നും ഹര്‍ജിഭാഗം വാദിച്ചു.