ചിറയിന്കീഴില് അറുപത്തിമൂന്നുകാരന് തീപൊള്ളലേറ്റ് മരിച്ചു
സഹോദരിയുടെ വീടിന് സമീപം അര്ദ്ധരാത്രി അറുപത്തിമൂന്നുകാരന് ശരീരത്തില് തീപടര്ന്ന് മരിച്ചു. ചിറയിന്കീഴ് പണ്ടകശാല പൂട്ടുംവാതുക്കല് പാട്ടത്തില് വീട്ടില് മോഹനനാണ് മരിച്ചത്. ശരീരം പൂര്ണമായും കത്തിക്കരിഞ്ഞു. അര്ദ്ധരാത്രി 12.20 നായിരുന്നു സംഭവം നടന്നത്.
അവിവാഹിതനായ ഇയാള് വസ്തുക്കളും മറ്റും പലര്ക്കായി വിറ്റശേഷം പുതുക്കരി മുക്കാലുവട്ടം ക്ഷേത്ര പരിസരത്താണ് ഏറെനാളായി കഴിഞ്ഞുവന്നത്. വല്ലപ്പോഴും പണ്ടകശാലയിലുള്ള സഹോദരി തങ്കമണിയുടെ വീട്ടില് കുളിക്കാനും ആഹാരം കഴിക്കാനും എത്താറുണ്ടെന്ന് നാട്ടുകാര് പൊലീസിനോട് പറഞ്ഞു. തങ്കമണിയും ഭര്ത്താവ് രവിയും മകളുമാണ് ഇവിടെ താമസം.
അര്ദ്ധരാത്രി വീടിന്റെ പരിസരത്ത് അലര്ച്ചയും വിളിയും കേട്ട് ഉറക്കമുണര്ന്ന ഇവര് പുറത്തിറങ്ങിയപ്പോള് ശരീരത്ത് തീ പടര്ന്ന നിലയില് മോഹനനെ കണ്ടെത്തുകയായിരുന്നു. വസ്ത്രങ്ങളിലും മറ്റും പടര്ന്ന തീ ശരീരമാകെ വ്യാപിച്ചതോടെ മരണവെപ്രാളം കാട്ടിയ ഇയാള് വീട്ടിലേക്കുള്ള വഴിയിലൂടെ റോഡിലേക്ക് ഓടാന് ശ്രമിച്ചെങ്കിലും വീട്ടുമുറ്റത്ത് വീണു. ഇത് കണ്ട് ഭയന്ന തങ്കമണിയുടെയും മകളുടെയും നിലവിളി കേട്ട് അയല്ക്കാര് ഓടിയെത്തി വെളളമൊഴിച്ച് തീകെടുത്തി.
ഇതിനിടെ നാട്ടുകാര് അറിയിച്ചതനുസരിച്ച് ചിറയിന്കീഴ് പൊലീസും സ്ഥലത്തെത്തി. മോഹനന് മരിച്ചതായി ഉറപ്പാക്കിയ പൊലീസ് സ്ഥലത്ത് കാവലേര്പ്പെടുത്തി. മൃതദേഹം കാണപ്പെട്ട സ്ഥലത്തുനിന്ന് സിഗററ്റ് ലൈറ്റര് കണ്ടെത്തിയിട്ടുണ്ട്. മണ്ണെണ്ണയാണോ പെട്രോളാണോ തീകത്താനുപയോഗിച്ചതെന്ന് വ്യക്തമായിട്ടില്ല.
സംഭവത്തില് കൂടുതല് വ്യക്തത വരുത്താനായി ഫോറന്സിക് വിദഗ്ധരുടെ സഹായം പൊലീസ് തേടിയിട്ടുണ്ട്. ഫോറന്സിക് വിദഗ്ധരെത്തി തെളിവുകള് ശേഖരിച്ചശേഷം മൃതദേഹം പോസ്റ്റുമോര്ട്ടത്തിനായി മെഡിക്കല് കോളേജ് ആശുപത്രിയിലേക്ക് മാറ്റുമെന്ന് പൊലീസ് അറിയിച്ചു. വിവരമറിഞ്ഞ് ആറ്റിങ്ങല് എ.എസ്.പി ആദിത്യ, സി.ഐ എം. അനില്കുമാര് തുടങ്ങിയവര് സ്ഥലത്തെത്തി അന്വേഷണം നടത്തി.
https://www.facebook.com/Malayalivartha
