ചെറിയ തുകയുടെ ക്രമക്കേടായാലും അഴിമതി നിരോധന നിയമപ്രകാരമുള്ള ഏതു കുറ്റവും അന്വേഷിക്കാന്‍ വിജിലന്‍സിന് അധികാരമുണ്ടെന്ന് ഹൈകോടതി. ഈ അധികാരം നിയന്ത്രിക്കാനോ നിഷേധിക്കാനോ സര്‍ക്കാറിന് കഴിയില്ല. സാമ്പത്തിക ക്രമക്കേട് ആരോപിച്ച് തൃശൂര്‍ വിജിലന്‍സ് കോടതിയില്‍ രജിസ്റ്റര്‍ ചെയ്ത കേസ് റദ്ദാക്കണമെന്നാവശ്യപ്പെട്ട് വിയ്യൂര്‍ സ്വദേശി വി.സി. ജോണി, അളഗപ്പനഗര്‍ സ്വദേശി എം.ഡി വിന്‍സെന്റ് എന്നിവര്‍ നല്‍കിയ ഹര്‍ജി തള്ളിയാണ് സിംഗിള്‍ ബെഞ്ചിന്റെ ഉത്തരവ്.

50,000 രൂപയില്‍ കുറവുള്ള ക്രമക്കേട് കേസുകള്‍ വിജിലന്‍സ് അന്വേഷിക്കേണ്ടെന്ന, 1997 ഏപ്രില്‍ അഞ്ചിലെ സര്‍ക്കാര്‍ ഉത്തരവ് ചൂണ്ടിക്കാട്ടിയാണ് കേസ് റദ്ദാക്കാന്‍ ഇവര്‍ ഹര്‍ജി നല്‍കിയത്. 20,615 രൂപയുടെ ക്രമക്കേടു മാത്രമാണ് തങ്ങളുടെ പേരിലുള്ളതെന്നായിരുന്നു ഇവരുടെ വാദം.

എന്നാല്‍, ക്രിമിനല്‍ നടപടി ചട്ടവും അഴിമതി നിരോധന നിയമവും അടിസ്ഥാനമാക്കി പ്രവര്‍ത്തിക്കുന്ന അന്വേഷണ ഏജന്‍സികളെ നിയന്ത്രിക്കാനോ തടയാനോ സര്‍ക്കാറിന് കഴിയില്ലെന്ന് കോടതി വ്യക്തമാക്കി. കേരള പൊലീസിന്റെ ഭാഗമായ വിജിലന്‍സിന് അഴിമതി നിരോധന നിയമപ്രകാരമുള്ള ഏതു കേസും അന്വേഷിക്കാം. വിജിലന്‍സിനുള്ളിലെ അധികാര ക്രമീകരണത്തിന്റെ ഭാഗമായാണ് 1997ലെ സര്‍ക്കാര്‍ ഉത്തരവെന്നും കോടതി വ്യക്തമാക്കി.