കേരളത്തില്‍ പിണറായി വിജയന്റെ നേതൃത്വത്തില്‍ ഇടതുപക്ഷ സര്‍ക്കാര്‍ അധികാരത്തിലേറിയിട്ട് ഒന്നര വര്‍ഷം തികയാന്‍ പോകുന്നു. പല മന്ത്രിമാരും കാര്യക്ഷമമായി പ്രവര്‍ത്തിച്ചുവെങ്കിലും ചിവ വകുപ്പുകളില്‍ ഭരണം ഇല്ലെന്ന അവസ്ഥയാണ് ഉള്ളത്. ജനങ്ങളെ ബാധിക്കുന്ന പ്രശ്‌നങ്ങളില്‍ അടിന്തിരമായി ഇടപെടാനൊരുങ്ങുകയാണ് പിണറായി.

ഓരോ വകുപ്പിന്റെയും പ്രവര്‍ത്തനം ഇതാദ്യമായി മുഖ്യമന്ത്രി നേരിട്ട് വിലയിരുത്താന്‍ പോകുകയാണ്. ഇതിനായി 9, 10 തീയതികളില്‍ ഘടകകക്ഷി മന്ത്രിമാര്‍ ഉള്‍പ്പെടെ മുഴുവന്‍ മന്ത്രിമാരുടെയും വകുപ്പ് സെക്രട്ടറിമാരുടെയും യോഗം മുഖ്യമന്ത്രി പിണറായി വിജയന്‍ വിളിച്ചുചേര്‍ത്തു. രണ്ട് ദിവസവും മുഖ്യമന്ത്രി മുഴുവന്‍ സമയവും യോഗത്തില്‍ സന്നിഹിതനായിരിക്കും. ചീഫ് സെക്രട്ടറിയും പങ്കെടുക്കും. ഓരോ വകുപ്പിലും മൂന്ന് മെഗാ പ്രോജക്ടുകള്‍ വീതം സമര്‍പ്പിക്കാന്‍ ഓരോ വകുപ്പിനോടും മുഖ്യമന്ത്രിയുടെ ഓഫീസ് നിര്‍ദ്ദേശിച്ചിട്ടുണ്ട്. മുഖ്യമന്ത്രിയുടെ വകുപ്പുകളിലെയും മൂന്ന് മെഗാ പ്രോജക്ടുകള്‍ തയ്യാറാക്കാന്‍ നിര്‍ദ്ദേശം നല്‍കിയിട്ടുണ്ട്.

വകുപ്പുകളുടെയും മന്ത്രിമാരുടെയും പ്രവര്‍ത്തന മികവ് പരിശോധിക്കുക, മന്ത്രിമാരുടെ ഓരോ രംഗത്തെയും മികവുകളും പോരായ്മകളും നേരിട്ട് ബോദ്ധ്യപ്പെടുക എന്നീ ലക്ഷ്യങ്ങളാണ് രണ്ട് ദിവസത്തെ യോഗത്തിനുള്ളത്. ഇതിനകം വിവിധ വകുപ്പുകള്‍ ഏറ്റെടുത്ത് ആരംഭിച്ചിട്ടുള്ള വികസന പദ്ധതികളുടെ അവലോകനവും ഈ യോഗങ്ങളിലുണ്ടാകും. ഓരോ മന്ത്രിയും വകുപ്പുദ്യോഗസ്ഥരും രണ്ട് ദിവസത്തെ യോഗത്തിനായുള്ള തയ്യാറെടുപ്പ് ആരംഭിച്ചു കഴിഞ്ഞിട്ടുണ്ട്. ഓരോ വകുപ്പിനും ഓരോ സമയക്രമം അനുവദിച്ചാണ് മുഖ്യമന്ത്രി അവലോകനം ചെയ്യുക

കണ്ണൂര്‍ വിമാനത്താവളം, ഗെയ്ല്‍ പാചകവാതക പൈപ്പ് ലൈന്‍, ഇടമണ്‍ കൊച്ചി വൈദ്യുതി ലൈന്‍ എന്നിവയാണ് ഇപ്പോള്‍ മുഖ്യമന്ത്രിയുടെ നേരിട്ടുള്ള നിരീക്ഷണത്തില്‍ പുരോഗമിക്കുന്ന മെഗാ പദ്ധതികള്‍. ഇവ മൂന്നും 2018ല്‍ പൂര്‍ത്തിയാക്കും. കണ്ണൂര്‍ വിമാനത്താവളം 2018 സെപ്തംബറിലും ഗെയ്‌ലും ഇടമണ്‍ കൊച്ചി വൈദ്യുതിലൈന്‍ പദ്ധതിയും 2018 ഡിസംബറിലും പൂര്‍ത്തിയാകും.

ഗെയ്ല്‍ വാതക ലൈന്‍ ക്രമീകരണവുമായി ബന്ധപ്പെട്ട് കണ്ണൂര്‍ ജില്ലയിലെ തളിപ്പറമ്പില്‍ പ്രാദേശിക സി.പി.എം പ്രവര്‍ത്തകര്‍ ഉള്‍പ്പെടെ ഉയര്‍ത്തിയ പ്രതിഷേധം മുഖ്യമന്ത്രിയുടെ നേരിട്ടുള്ള ഇടപെടലിനെ തുടര്‍ന്നാണ് മാറിയത്. മുഖ്യമന്ത്രി നല്‍കിയ ഉറപ്പില്‍ നാട്ടുകാര്‍ വിശ്വാസം രേഖപ്പെടുത്തി പിന്മാറുകയായിരുന്നു.

കൊച്ചി ഇടമണ്‍ ലൈനിന്റെ കാര്യത്തില്‍ പുതുപ്പള്ളി മുതല്‍ കൊച്ചി വരെയുള്ള പ്രദേശവാസികളുടെ എതിര്‍പ്പ് കാലങ്ങളായി മാറ്റമില്ലാതെ തുടരുകയായിരുന്നു. ഇതാണിപ്പോള്‍ പരിഹൃതമാകുന്നത്. മുഴുവന്‍ ഭാഗത്തെയും സര്‍വേ പൂര്‍ത്തിയായിക്കഴിഞ്ഞു. ഇനി പണി പൂര്‍ത്തിയാകേണ്ട കാലതാമസം മാത്രം.