ആര്.എസ്.എസ് നടത്തുന്ന ശാഖയില് പങ്കെടുക്കാന് വിസമ്മതിച്ച വിദ്യാര്ത്ഥിയെ എ.ബി.വി.പി പ്രവര്ത്തകര് മര്ദ്ദിച്ചതായി പരാതി
ആര്.എസ്.എസ് നടത്തുന്ന ശാഖയില് പങ്കെടുക്കാന് വിസമ്മതിച്ച വിദ്യാര്ത്ഥിയെ എ.ബി.വി.പി പ്രവര്ത്തകര് മര്ദ്ദിച്ചതായി പരാതി. തിരുവന്തപുരം ധനുവച്ചപുരം വി.ടി.എം. എന്.എസ്.എസ് കോളേജിലെ അഭിജിത്ത് എന്ന വിദ്യാര്ത്ഥിയെയാണ് എ.ബി.വി.പി പ്രവര്ത്തകര് ക്യാമ്പസില് വച്ച് വിവസ്ത്രനാക്കി മര്ദ്ദിച്ചത്.
എസ്.എഫ്ഐക്കാരനാണ് അഭിജിത്തെന്നും കോളേജില് എസ്.എഫ്ഐയുടെ യൂണിറ്റ് രൂപീകരിക്കുമെന്നും ആരോപിച്ചായിരുന്നു മര്ദ്ദനം. നിലവില് കോളേജില് എ.ബി.വി.പിക്ക് മാത്രമാണ് യൂണിറ്റുള്ളത്. കാന്റീനിലേക്ക് ഭക്ഷണം കഴിക്കാന് പോകുന്നതിനിടെ എ.ബി.വി.പി പ്രവര്ത്തര് തന്നെ തടഞ്ഞുനിറുത്തി. ആഴ്ചയിലൊരിക്കല് കോളേജില് നടക്കുന്ന ആര്.എസ്.എസ് ശാഖയില് പങ്കെടുക്കണമെന്നും ആവശ്യപ്പെട്ടു. അതിനുശേഷം വസ്ത്രങ്ങള് വലിച്ചൂരിയ ശേഷം മര്ദ്ദിക്കുകയായിരുന്നെന്ന് അഭിജിത്ത് പറഞ്ഞു.
തന്റെ ബാഗില് ഡി.വൈ.എഫ്ഐയുടെ മെമ്പര്ഷിപ്പ് കാര്ഡ് കണ്ടെത്തിയ വിവരം സഹപാഠി എ.ബി.വി.പി നേതൃത്വത്തെ അറിയിച്ചിരുന്നുവെന്നും അഭിജിത്ത് പറഞ്ഞു. സംഭവത്തെക്കുറിച്ച് നേമം പൊലീസില് പരാതി നല്കിയതായി അഭിജിത്ത് വ്യക്തമാക്കി. അതേസമയം, തങ്ങള്ക്ക് വിദ്യാര്ത്ഥിയില് നിന്ന് പരാതിയൊന്നും കിട്ടിയിട്ടില്ലെന്ന് കോളേജ് അധികൃതര് പറഞ്ഞു.
https://www.facebook.com/Malayalivartha
