ആലപ്പുഴ ജില്ലാ കളക്ടര്‍ക്ക് പിന്നാലെ കോഴിക്കോട് കളക്ടറും സര്‍ക്കാരിനെ വെട്ടിലാക്കി! ഇടത്പക്ഷത്തിന്റെ സ്വതന്ത്ര എം.എല്‍.എ പി.വി അന്‍വര്‍ കൂടരഞ്ഞി വില്ലേജില്‍ വാട്ടര്‍ തീം പാര്‍ക്ക് നിര്‍മിച്ചത് പരിസ്ഥിതി ദുര്‍ബല പ്രദേശത്താണെന്ന് കോഴിക്കോട് കളക്ടറുടെ റിപ്പോര്‍ട്ട്. 20 ഡിഗ്രി ചരിഞ്ഞ പ്രദേശത്ത് മഴക്കുഴി പോലും എടുക്കരുതെന്ന് ദുരന്തനിവാരണ അതോറിട്ടി മുന്നറിയിപ്പ് നല്‍കിയിട്ടുള്ള പ്രദേശത്ത് പാര്‍ക്കിനായി തടയണ കെട്ടിയിട്ടുണ്ട്. എന്നീ കാര്യങ്ങളും റിപ്പോര്‍ട്ടില്‍ പറയുന്നു. എന്നാല്‍ സര്‍ക്കാരിന് നല്‍കിയ റിപ്പോര്‍ട്ടില്‍ ഇക്കാര്യങ്ങള്‍ കളക്ടര്‍ പറഞ്ഞിട്ടില്ല. നിര്‍മാണം ചോദ്യം ചെയ്യാന്‍ ജില്ലാ ദുരന്തനിവാരണ അതോറിട്ടിയും തയ്യാറായിട്ടില്ല. 

പാര്‍ക്ക് പൂട്ടണോ വേണ്ടയോ എന്ന് കൂടരഞ്ഞി പഞ്ചായത്ത് അധികൃതരാണ് തീരുമാനിക്കേണ്ടതെന്നും റിപ്പോര്‍ട്ടില്‍ പറയുന്നു. കോണ്‍ഗ്രസ് നേതൃത്വത്തിലുള്ള ഭരണസമിതി എം.എല്‍.എയ്ക്ക് ഒപ്പമാണെന്ന് നേരത്തെ ആരോപണം ഉയര്‍ന്നിരുന്നു. കെ.പി.സി.സിയുടെ എതിര്‍പ്പ് മറികടന്നും പ്രദേശിക നേതാക്കള്‍ പാര്‍ക്കിന് പിന്തുണ നല്‍കിയിരുന്നു. ലൈസന്‍സോ മറ്റ് അനുമതികളോ ഇല്ലാതെയാണ് പാര്‍ക്ക് ആരംഭിച്ചത്. ഇതിനെതിരെ മലിനീകരണനിയന്ത്രണ ബോര്‍ഡ് ആദ്യം റിപ്പോര്‍ട്ട് നല്‍കിയിരുന്നു. എന്നിട്ടും എം.എല്‍.എയെ സംരക്ഷിക്കുന്ന നിലപാടാണ് സര്‍ക്കാരും മുഖ്യമന്ത്രിയും നിയമസഭയില്‍ സ്വീകരിച്ചത്. ഇതിനിടെ എം.എല്‍.എ അനധികൃതമായി 188 ഏക്കര്‍ കൈവശം വച്ചിരിക്കുന്നെന്ന തെളിവുകളും പുറത്തുവന്നു. ഇതോടെ സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ നയിച്ച ജനജാഗ്രതാ യാത്രയില്‍ നിന്ന് പി.വി. അന്‍വറിനെ ഒഴിവാക്കിയിരുന്നു.

മന്ത്രി തോമസ് ചാണ്ടി മാര്‍ത്താണ്ഡം കായല്‍ കയ്യേറി റോഡും പാര്‍ക്കിംഗ് ഗ്രൗണ്ടും നിര്‍മിച്ചെന്ന് ആലപ്പുഴ ജില്ലാ കളക്ടര്‍ സര്‍ക്കാറിന് റിപ്പോര്‍ട്ട് നല്‍കിയിരുന്നു. ഇതിന്‍മേല്‍ സര്‍ക്കാര്‍ നിയമോപദേശം തേടിയിരിക്കുകയാണ്. മൂന്ന് മുതല്‍ അഞ്ച് വര്‍ഷം വരെ തടവ് ലഭിക്കാവുന്ന നിയമലംഘനമാണ് ഗതാഗതമന്ത്രി നടത്തിയതെന്നും കളക് ടറുടെ റിപ്പോര്‍ട്ട് വ്യക്തമാക്കുന്നു. ഇതോടെ സര്‍ക്കാര്‍ കൂടുതല്‍ രാഷ്ട്രീയ പ്രതിസന്ധിയി. അതിനിടെയിലാണ് കോഴിക്കോട് കളക്ടറുടെ റിപ്പോര്‍ട്ടും പുറത്ത് വന്നത്.