തിരുവനന്തപുരം കരിക്കകത്ത് സി.പി.എംബി.ജെ.പി സംഘര്‍ഷം. സംഘര്‍ഷത്തില്‍ രണ്ട് സി.പി.എം പ്രവര്‍ത്തകര്‍ക്ക് വെട്ടേറ്റു. സി.പി.എം ജില്ല കമ്മിറ്റി ഓഫീസിനുനേരെ കല്ലേറുണ്ടായി.

തിരുവനന്തപുരം മേയര്‍ വി.കെ പ്രശാന്തിനെ കഴിഞ്ഞ ദിവസം ആക്രമിച്ചതില്‍ പ്രതിഷേധിച്ച് കരിക്കകത്ത് സി.പി.എം പ്രവര്‍ത്തകര്‍ പ്രകടനം നടത്തിയിരുന്നു. പ്രകടനം കഴിഞ്ഞ് മടങ്ങിയ സി.പി.എം പ്രവര്‍ത്തകര്‍ ബി.ജെ.പിയുടെ കൊടിമരം തകര്‍ക്കാന്‍ ശ്രമിച്ചുവെന്ന് ആരോപിച്ച് ബി.ജെ.പി പ്രവര്‍ത്തകര്‍ രംഗത്തെത്തി.

ഇതേത്തുടര്‍ന്നുണ്ടായ സംഘര്‍ഷത്തിനിടെയാണ് രണ്ട് സി.പി.എം പ്രവര്‍ത്തകര്‍ക്ക് വെട്ടേറ്റത്. ഇവരെ തിരുവനന്തപുരം ജനറല്‍ ആശുപത്രിയില്‍ പ്രവേശിപ്പിച്ചു. കരിക്കകത്ത് സംഘര്‍ഷാവസ്ഥ നിലനില്‍ക്കുന്നതിനാല്‍ പോലീസ് സംഘം ക്യാമ്പ് ചെയ്യുന്നുണ്ട്.

മേയറെ കരുതിക്കൂട്ടി ആക്രമിച്ചുവെന്നാണ് മുഖ്യമന്ത്രിയും വിഎസ് അച്യുതാനന്ദനും പറയുന്നത്. നഗരസഭയിലുണ്ടായ സംഘര്‍ഷത്തെ തുടര്‍ന്ന് സാരമായി പരുക്കേറ്റ് മെഡിക്കല്‍ കോളേജ് ആശുപത്രിയില്‍ ചികിത്സയില്‍ കഴിയുന്ന മേയര്‍ അഡ്വ. വി.കെ. പ്രശാന്തിനെ മുഖ്യമന്ത്രി പിണറായി വിജയന്‍ സന്ദര്‍ശിച്ചു. മെഡിക്കല്‍ കോളേജ് ആശുപത്രി സൂപ്രണ്ട് ഡോ. എം.എസ്. ഷര്‍മ്മദ്, യൂണിറ്റ് മേധാവി ഡോ. രാജേന്ദ്രന്‍ എന്നിവര്‍ മുഖ്യമന്ത്രിയോടൊപ്പമുണ്ടായിരുന്നു. മേയറുടെ ആരോഗ്യനില മുഖ്യമന്ത്രി ഇവരുമായി ചര്‍ച്ച ചെയ്തു.

ആരോഗ്യനില മെച്ചപ്പെട്ടതിനെ തുടര്‍ന്ന് മേയറെ ക്രിട്ടിക്കല്‍ കെയര്‍ യൂണിറ്റില്‍ നിന്ന് പ്രത്യേക മുറിയിലേക്ക് മാറ്റി. വേദന സംഹാരികള്‍ കൊടുക്കുന്നുണ്ടെങ്കിലും കലശലായ വേദന മേയര്‍ക്കനുഭവപ്പെടുന്നുണ്ട്.

വി.എസ്. അച്യുതാനന്ദനും മേയറെ സന്ദര്‍ശിച്ച് ആരോഗ്യനില ചോദിച്ചറിഞ്ഞു.