അയ്യപ്പന്റെ ഉറക്കുപാട്ടിലെ തെറ്റുകള് തിരുത്തി വീണ്ടും ആലപിക്കാനൊരുങ്ങി യേശുദാസ്
ശബരിമലയിലെ ഭക്തിസാന്ദ്രമായ രാവുകളില് അയ്യപ്പസ്വാമിയെ യോഗനിദ്രയിലാഴ്ത്തുന്ന ഉറക്കുപാട്ടായ ഹരിവരാസനം ശബരീശഭക്തനായ യേശുദാസ് പിഴവുകള് തീര്ത്ത് വീണ്ടും ആലപിക്കും. ശബരിമലയില് ദിവസവും അത്താഴപൂജയ്ക്കു ശേഷം നട അടയ്ക്കുന്നതിനു മുമ്പ് ഉടുക്കുകൊട്ടി ആലപിക്കുന്ന കീര്ത്തനമാണ് ഹരിവരാസനം . ഹരിവരാസനം പാടിത്തീരുമ്പോഴേക്കും പരികര്മ്മികള് നടയിറങ്ങും. പിന്നീട് ഒന്നൊഴിയാതെ ഓരോ നിലവിളക്കും അണച്ച് മേല്ശാന്തി നട അടയ്ക്കുകയാണ് പതിവ്.
ഹരിവരാസനത്തിലെ ഈണത്തില് മാറ്റം വരുത്താതെ, പാട്ടില് അറിയാതെ വന്നുപോയ ഒരു പിഴവ് തിരുത്തിയും മൂലരൂപത്തിലെ സ്വാമി എന്ന പദം കൂട്ടിച്ചേര്ത്തുമായിരിക്കും വീണ്ടും ഗാനഗന്ധര്വന് ആലപിക്കുക. കറതീര്ത്ത ഹരിവരാസനം ഈ മണ്ഡലകാലത്തു തന്നെ സന്നിധാനത്ത് നിന്ന് ഭക്തരുടെ കാതുകളിലെത്തും. ഹരിവരാസനം ട്രസ്റ്റാണ് ഈ തീരുമാനം എടുത്തത്.
1923ല് ശാസ്താംകോട്ട കോന്നകത്ത് ജാനകി അമ്മ അഷ്ടക രൂപത്തില് രചിച്ച കീര്ത്തനമാണ് ഹരിവരാസനം. ഇതില് ഓരോ വരിയിലും സ്വാമി എന്ന വാക്ക് ആവര്ത്തിച്ചിരുന്നു. 1975ല് മെറിലാന്ഡ് സുബ്രഹ്മണ്യം നിര്മ്മിച്ച് ശ്രീകുമാരന് തമ്പി സംവിധാനം ചെയ്ത സ്വാമി അയ്യപ്പന് എന്ന സിനിമയ്ക്കുവേണ്ടി കീര്ത്തനം ജി.ദേവരാജന് ചിട്ടപ്പെടുത്തി. ആലാപനം അനായാസമാക്കാന് സംഗീത സംവിധായകന്റെ സ്വാതന്ത്ര്യം ഉപയോഗിച്ച് ദേവരാജന് മാഷ് ഓരോ വരിയിലെയും സ്വാമി' വേണ്ടെന്നുവച്ചു. കൂടാതെ രണ്ട്
വാക്കുകള് ചേര്ത്തപ്പോള് അര്ത്ഥത്തിലും ഒരു പിഴ വന്നുകൂടി. അരി ( ശത്രു ), വിമര്ദ്ദനം (നിഗ്രഹം ) എന്നീ പദങ്ങള് പിരിച്ച് ഉച്ചരിക്കേണ്ടതിനു പകരം അരിവിമര്ദ്ദനം' എന്ന് ചേര്ത്താണ് പാടിയത്. യേശുദാസിന്റെ വിശ്വമോഹനമായ ശബ്ദത്തില് ഇന്നും നമ്മള് കേള്ക്കുന്ന ഹരിവരാസനത്തില് ഈ തെറ്റുണ്ട്. ഇതാണ് ഇപ്പോള് തിരുത്തുന്നത്.
ഹരിവരാസനത്തില് അരിവിമര്ദ്ദനം എന്നല്ല. അരി, വിമര്ദ്ദനം എന്നു പിരിച്ചാണ് പാടേണ്ടത്. അയ്യപ്പന്റെ നിയോഗത്താല് ഹരിവരാസനം വീണ്ടും പാടാന് അവസരം ലഭിച്ചാല് തിരുത്താന് പോകുന്നത് ഈ വാക്കാണ്. യേശുദാസ് തന്നെ അടുത്തിടെ ഒരു അഭിമുഖത്തില് ഇങ്ങനെ പറഞ്ഞിരുന്നു.
ഇപ്പോള് അമേരിക്കയിലുള്ള യേശുദാസ് ഈ മാസം 30 ന് കേരളത്തിലെത്തുമ്പോള് ഹരിവരാസനം വീണ്ടും ആലപിച്ച് റെക്കാഡ് ചെയ്യുമെന്ന് തിരുവിതാംകൂര് ദേവസ്വം ബോര്ഡ് പ്രസിഡന്റ് എ.പത്മകുമാര് പറഞ്ഞു. പാട്ടിലെ തെറ്റ് തിരുത്തുന്നതിനെപ്പറ്റി തന്റെ അമ്മയുടെ അപ്പച്ചി കൂടിയായ ജാനകി അമ്മയുടെ കുടുംബാംഗങ്ങളും ഹരിവരാസനം ട്രസ്റ്റും യേശുദാസിനോട് ആലോചിച്ചിരുന്നു. അദ്ദേഹം പൂര്ണ്ണമനസ്സോടെ സമ്മതിച്ചെന്നും പത്മകുമാര് പറഞ്ഞു.
https://www.facebook.com/Malayalivartha
