ഭിക്ഷക്കാരെ ഒഴിപ്പിച്ചപ്പോഴാണ് ആ ഞെട്ടിക്കുന്ന സത്യം ലോകമറിയുന്നത്
നഗരത്തിലെ യാചകരില് ചിലരുടെ ആസ്തി കണ്ട് പോലീസുകാരും ഞെട്ടിപ്പോയി. നഗരത്തില് യാചകരെ നിരോധിച്ചപ്പോള് ഇങ്ങനെ ഒരു ക്ളൈമാക്സ് ആരും പ്രതീക്ഷിച്ചില്ല. പുനരധിവാസ കേന്ദ്രത്തിലേക്കു പോലീസ് പിടിച്ചു കൊണ്ടു വന്നവരില് രണ്ടു സ്ത്രീകള് കോടീശ്വരും പ്രവാസികളായ വിദ്യാ സമ്പന്നരും. ഒരാള്ക്ക് അമേരിക്കന് ഗ്രീന്കാര്ഡുമുണ്ട്. ഇതിനുപുറമെ, നഗരത്തില് സമ്പന്നര് വസിക്കുന്നിടത്ത് അപ്പാര്ട്ടുമെന്റുകളും മറ്റു വസ്തു വകകളുമേറെ.
അമേരിക്കന് പ്രസിഡന്റ് ഡൊണള്ഡ് ട്രംപിന്റെ മകള് ഇവാന്ക ട്രംപിന്റെ സന്ദര്ശനത്തിനു മുന്നോടിയായി ഭിക്ഷാടകരെ പുനരധിവസിപ്പിക്കാന് പുറപ്പെട്ടപ്പോഴാണു പോലീസ് പുലിവാലു പിടിച്ചത്. മുസ്ലിം തീര്ഥാടനകേന്ദ്രമായ ലങ്കാര് ഹൗസില് നിന്ന് ചെര്ലാപള്ളി ജയിലിലെ ആനന്ദാശ്രമത്തില് എത്തിച്ച 133 സ്ത്രീകളില് ഇവരുമുണ്ടായിരുന്നു. ഇവാന്കയുടെ മൂന്നു ദിവസത്തെ സന്ദര്ശനം പ്രമാണിച്ച് ആകെ ആയിരത്തോളം ഭിക്ഷാടകരെയാണ് പുനരധിവസിപ്പിച്ചത്. ജയിലിനോടു ചേര്ന്നുള്ള കേന്ദ്രത്തില് രണ്ടുപേര് നിര്ത്താതെ ഇംഗ്ലീഷില് ജീവനക്കാരോടു തട്ടിക്കയറുന്നത് പോലീസിന്റെ ശ്രദ്ധയില്പ്പെട്ടു. ഇവരുടെ പെരുമാറ്റത്തിലും സംസാരത്തിലും പ്രത്യേകതയുമുണ്ടായിരുന്നു.
തുടര്ന്നു വിവരം ആരാഞ്ഞ പോലീസിന്റെ കണ്ണുതള്ളി. ഇതില് ഒരാളായ ഫര്സാന(50) എം.ബി.എ. ബിരുദധാരിയാണ്. ലണ്ടനില് അക്കൗണ്ടന്റായിരുന്നു. ഭര്ത്താവിനൊപ്പം ഏതാനും വര്ഷം മുമ്പാണു നാട്ടില് തിരിച്ചെത്തിയത്. അടുത്തകാലത്തു ഭര്ത്താവ് മരിച്ചതോടെ മാനസികാസ്വാസ്ഥ്യമുണ്ടായി. അമീര്പേട്ടില് ലക്ഷ്വറി അപാര്ട്ട്മെന്റുള്ള ഫര്സാന, ആള്െദെവത്തിന്റെ വാക്കുകേട്ടാണു പള്ളിഅങ്കണത്തില് ഭിക്ഷ യാചിക്കാനെത്തിയത്. ഇവരുടെ മകന് അമേരിക്കയില് വാസ്തുശില്പ്പിയാണ്. കഴിഞ്ഞദിവസം നാട്ടിലെത്തിയ ഇയാള് അമ്മയെ അന്വേഷിച്ച് അലഞ്ഞിരുന്നു. ഇതിനിടെയാണ് അധികൃതര് സന്തോഷവാര്ത്ത മകനെ അറിയിച്ചത്. ഇയാള് അമ്മയെ വീട്ടിലേക്ക് കൊണ്ടുപോയി.
സമാനമായ അനുഭവമാണു റാബിയ ബസീറ(44)യ്ക്കുമുണ്ടായത്. അമേരിക്കന് ഗ്രീന്കാര്ഡുള്ള ഇവര്ക്കു െഹെദരാബാദില് ഇട്ടുമൂടാന് മാത്രം സ്വത്തുണ്ട്. റാബിയയുടെ സ്വത്തിനായി സഹോദരങ്ങള് കടിപിടി കൂടി. ഏറെക്കുറെ അവര് സ്വത്ത് തട്ടിയെടുത്തതോടെ മനസമാധാനം തകര്ന്നു. അതിനാല് ചിലരുടെ ഉപദേശം കേട്ടു മനോസുഖം വീണ്ടെടുക്കാന് പള്ളിയില് ഭിക്ഷാടനത്തിനു തീരുമാനിക്കുകയായിരുന്നു. ഒരുദിവസം പുനരധിവാസകേന്ദ്രത്തില് തങ്ങിയ റാബിയയെയും ബന്ധുക്കള് തിരിച്ചുകൊണ്ടു പോയി.
https://www.facebook.com/Malayalivartha
