ദൃശ്യമാധ്യമങ്ങള്‍ക്ക് സെക്രട്ടറിയേറ്റില്‍ കഴിഞ്ഞദിവസം ഏര്‍പ്പെടുത്തിയ നിയന്ത്രണത്തില്‍ നിന്ന് പിണറായി വിജയന്‍ സര്‍ക്കാര്‍ പിന്‍വാങ്ങി. മന്ത്രിസഭായ യോഗത്തിന് ശേഷം വാര്‍ത്താസമ്മേളനത്തില്‍ മുഖ്യമന്ത്രി ഇക്കാര്യം വ്യക്തമാക്കി. ഭരണപക്ഷത്ത് നിന്ന് ഉള്‍പ്പെടെ വിമര്‍ശനങ്ങള്‍ ഉയര്‍ന്ന പശചാത്തലത്തിലാണ് പുതിയതീരുമാനം. അതേസമയം ഔചിത്യബോധമില്ലാത്ത ചാനല്‍ പ്രവര്‍ത്തകരുടെ നടപടികള്‍ക്ക് താക്കീത് നല്‍കാനാണ് ഇന്നലത്തേക്ക് മാത്രം വിലക്ക് ഏര്‍പ്പെടുത്തിയതെന്ന് അറിയുന്നു. ഇതിന് മുന്നോടിയായാണ് മുഖ്യമന്ത്രിക്ക് ഭീഷണിയുണ്ടെന്ന് വരുത്തിത്തീര്‍ക്കാന്‍ ഇന്റലിജന്‍സ് റിപ്പോര്‍ട്ടെന്ന പേരില്‍ വ്യാജവാര്‍ത്തകള്‍ പുറത്ത് വിട്ടത്. ഫോണ്‍ കെണിയില്‍ പെട്ട എ.കെ ശശീന്ദ്രനെതിരെ ജസ്റ്റിസ് പി.എസ് ആന്റണി കമ്മിഷന്‍ റിപ്പോര്‍ട്ട് സമര്‍പ്പിക്കാനെത്തിയപ്പോഴായിരുന്നു മാധ്യമങ്ങള്‍ക്ക് വിലക്ക് ഏര്‍പ്പെടുത്തിയത്. 

തുടര്‍ന്ന് മുഖ്യമന്ത്രിയുടെ സ്‌പെഷ്യല്‍ പ്രൈവറ്റ് സെക്രട്ടറി എം.വി ജയരാജനെ ഉള്‍പ്പെടെ ബന്ധപ്പെട്ടെങ്കിലും ഫലമുണ്ടായില്ല. മുഖ്യമന്ത്രി പങ്കെടുക്കുന്ന പരിപാടികളില്‍ ഉള്‍പ്പെടെ മാധ്യമപ്രവര്‍ത്തകര്‍ മൈക്കും ക്യാമറയുമായി തള്ളിക്കയറുന്നത് പതിവാണ്. പലപ്പോഴും സുരക്ഷാ ഉദ്യോഗസ്ഥര്‍ക്ക് മാധ്യമങ്ങളെ നിയന്ത്രിക്കാനും കഴിയുന്നില്ലെന്ന പരാതിയുണ്ട്. ഇതേ തുടര്‍ന്ന് കഴിഞ്ഞ ആഴ്ച കൊച്ചിയില്‍ വെച്ച് മുഖ്യമന്ത്രി സുരക്ഷാ ചുമതലയുണ്ടായിരുന്ന എസ്.ഐയോട് ദേഷ്യപ്പെട്ടിരുന്നു. സര്‍ക്കാരിനെതിരെ ചാനലുകള്‍ സംഘടിതമായി വാര്‍ത്തകള്‍ നല്‍കുന്നെന്ന് മുഖ്യമന്ത്രി അടക്കമുള്ളവര്‍ക്ക് പരാതിയുണ്ട്. തോമസ് ചാണ്ടിയെ രാജിവയ്പ്പിക്കാന്‍ ചാനലുകള്‍ പതിനെട്ട് അടവും പയറ്റിയിരുന്നു.

മാധ്യമപ്രവര്‍ത്തകരെ നിയന്ത്രിക്കരുതെന്ന് പ്രതിപക്ഷനേതാവ് രമേശ് ചെന്നിത്തലയും സി.പി.ഐ സംസ്ഥാന സെക്രട്ടറി കാനം രാജേന്ദ്രനും പന്ന്യന്‍ രവീന്ദ്രനും ആവശ്യപ്പെട്ടിരുന്നു. കാനവും പന്ന്യനും രൂക്ഷവിമര്‍ശനമാണ് നടത്തിയത്. തോമസ ്ചാണ്ടി അടക്കമുള്ള പല വിഷയങ്ങളിലും സി.പി.ഐ പരസ്യനിലപാട് സ്വീകരിക്കുകയും അതൊക്കെ വിവാദമാവുകയും ചെയ്തിട്ടുണ്ട്. അതൊക്കെ സര്‍ക്കാരിന്റെ ക്ഷേമപ്രവര്‍ത്തനങ്ങളുടെ നിറം കെടുത്തിയിട്ടുണ്ട്. അതിനാല്‍ കൂടുതല്‍ ചര്‍ച്ചകളും വിവാദങ്ങളും ഉണ്ടാകാതിരിക്കാനാണ് മുഖ്യമന്ത്രി നൈസായിട്ട് വിഷയം അവസാനിപ്പിച്ച് ഊരിപ്പോയത്.