വ്യാജ രേഖയുണ്ടാക്കി സിം എടുത്ത് ഫോണിലൂടെ സ്ത്രികളെ അസഭ്യം പറഞ്ഞിരുന്ന വിരുതന് കുടുങ്ങി
മൊബൈല് ഫോണിലൂടെയും വാട്സാപ്പിലൂടെയും സോഷ്യല് മീഡിയയിലൂടെയും സ്ത്രികളെ ഭീഷണിപ്പെടുത്തുകയും അസഭ്യം പറയുകയും അശ്ലീല സംഭാഷണം നടത്തുകയും ചെയ്തു വന്ന പ്രതി പൊലീസിന്റെ പിടിയിലായി. പൂഴിക്കുന്ന് കീഴമ്മാകം പ്ലാഞ്ചേരി വീട്ടില് അനില്കുമാര് (44) ആണ് പിടിയിലായത്. പുവാര് സ്വദേശിയായ വിനോദ് എന്ന യുവാവിന്റെ ഡ്രൈവിങ് ലൈസന്സിന്റെ കോപ്പിയും ഫോട്ടോയും മോഷ്ടിച്ച് ആ പേരില് സിംകാര്ഡ് എടുത്താണ് പ്രതി ഫോണ് ഉപയോഗിച്ച് വന്നിരുന്നത്.
വ്യാജമായി എടുത്ത 7025122815 എന്ന ഫോണ് നമ്പരില് നിന്ന് സ്ത്രികളെ വിളിച്ച് ഇയാള് ശല്യം ചെയ്യുന്നതായി, കഴിഞ്ഞ ഒരു വര്ഷമായി വിവിധ ജില്ലകളിലെ പൊലീസ് സ്റ്റേഷനുകളില് പരാതികള് ലഭിച്ചിരുന്നു. പരാതികളിലെ അന്വേഷണം സിം കാര്ഡിന്റെ അഡ്രസ് ഉടമയായ വിനോദില് എത്തുകയായിരുന്നു. വിനോദിനെ അന്വേഷിച്ചെത്തുന്ന പൊലീസുകാര് നിരപരാധിത്വം മനസിലാക്കി പരാതി അവസാനിപ്പിക്കുകയായിരുന്നു പതിവ്.
ഇത്തരത്തില് പല തവണ വിവിധ പൊലീസ് സ്റ്റേഷനുകളില് നിന്ന് വിനോദിനെ അന്വേഷിച്ച് പൊലീസ് എത്തിയതോടെ തന്റെ വിലാസത്തില് മറ്റാരോ വ്യാജ സിംകാര്ഡ് ഉപയോഗിക്കുന്നതായി കാണിച്ച് വിനോദ് തിരുവനന്തപുരം റൂറല് എസ്.പിയ്ക്ക് പരാതി നല്കുകയായിരുന്നു. ഇതേതുടര്ന്ന് പരാതി സൈബര് സെല്ലിന്റെയും ഷാഡോ ടീമിന്റെയും ചുമതലയുളള ഡി.വൈ.എസ്.പി പരാതിയിലെ അന്വേഷണം ഷാഡോ ടീമിനേയും പുവാര് പൊലീസിനേയും ഏല്പ്പിക്കുകയായിരുന്നു. അന്വേഷണത്തില് 7025122815 എന്ന നമ്പരില് നിന്നും സംസ്ഥാന ത്തെ പല ജില്ലകളിലേയും പെണ്കുട്ടികള്ക്ക് അശ്ലീല സന്ദേശങ്ങളും കോളുകളും വന്നതായി പൊലീസ് മനസിലാക്കുകയും വിവരങ്ങള് ശേഖരിക്കുകയും ചെയ്തു.
അനില്കുമാര് സ്ത്രികളെ ഫോണില് വിളിച്ച് സൈബര് സെല്ലിലെ പൊലീസുകാരന് ശ്രീഹരി ആണെന്ന് പറഞ്ഞാണ് പരിചയപ്പെടുന്നത്. പിന്നീട് പരിചയപ്പെടന്ന സ്ത്രീകള്ക്ക് ക്രിമിനലുകളുമായി ബന്ധമുണ്ടെന്ന് ഫേസ് ബുക്കിലൂടെ കണ്ടെത്തിയെന്ന് ഭീഷണിപ്പെടുത്തും. കേസെടുത്ത് ജയിലില് അടക്കുമെന്നും അല്ലെങ്കില് നഗ്ന ഫോട്ടോകള് നല്കണമെന്നും ആവശ്യപ്പെട്ടാതായും അന്വേഷണസംഘം കണ്ടെത്തി.
തുടര്ന്ന് പ്രതി ഉപയോഗിച്ച ഫോണിന്റെ വിവരങ്ങള് മനസിലാക്കി ശാസ്ത്രീയമായി അന്വേഷിച്ച്, പ്രതിയെ തിരിച്ചറിഞ്ഞ് അറസ്റ്റ് ചെയ്യുകയായിരുന്നു. ഇയാള് ഫേസ്ബുക്കില് ഗായത്രി എസ്.ഹര്ഷന് എന്ന പേരില് വ്യാജ പ്രെഫൈല് ഉണ്ടാക്കി നഴ്സാണെന്ന വ്യാജേന സ്ത്രീകളുമായി ചങ്ങാത്തം കൂടിയിട്ടുണ്ട്. റൂറല് എസ്.പി അശോക്കുമാറിന്റെ നിര്ദ്ദേശ പ്രകാരം ഷാഡോ പൊലീസ് ഡി.വൈ.എസ്.പി അശോകന് , നെയ്യാറ്റിന്കര ഡി.വൈ.എസ്.പി ഹരികുമാര് , സി.ഐമാരായ സുരേഷ് , എസ്.എം.പ്രദീപ്കുമാര് , പുവാര് എസ്.ഐ സുജിത് എന്നിവരാണ് അന്വേഷണ സംഘത്തിലുണ്ടായിരുന്നത്.
https://www.facebook.com/Malayalivartha
