ശബരിമലയില് വന് തീര്ത്ഥാടന തിരക്ക് പമ്പയില് നിയന്ത്രണം ഏര്പ്പെടുത്തി
മണ്ഡലമകരവിളക്കുത്സവത്തിന് നട തുറന്ന് പത്തുനാള് പിന്നിട്ടതോടെ ശബരിമലയില് വന് തീര്ഥാടകത്തിരക്ക്. നാലു മുതല് ആറു മണിക്കൂര് വരെ കാത്തുനിന്നശേഷമാണ്പലര്ക്കും ദര്ശനം സാധ്യമായത്. വെള്ളിയാഴ്ച രാത്രി പത്തരയ്ക്കുശേഷമാണ് സന്നിധാനത്ത് വന്തിരക്ക് അനുഭവപ്പെട്ടത്. തീര്ഥാടനകാലം ആരംഭിച്ച് ഇതാദ്യമായാണ് ഇത്രയും തിരക്ക്. ശനിയാഴ്ച പുലര്ച്ചെ സന്നിധാനം മുതല് മരക്കൂട്ടം വരെ തീര്ഥാടകരുടെ നീണ്ട നിര രൂപപ്പെട്ടു.
തിരക്ക് കണക്കിലെടുത്ത് സുരക്ഷാ ക്രമീകരണം ശക്തമാക്കി.വെള്ളിയാഴ്ച രാത്രി അത്താഴ പൂജയ്ക്കുശേഷമാണ് ദര്ശനത്തിനായി കൂട്ടത്തോടെ തീര്ഥാടകര് എത്തിയത്. പരമ്പരാഗത കാനനപാതകളായ എരുമേലി, പുല്ലുമേട് വഴിയും വരുന്നവരുടെ എണ്ണം കൂടി ഇരട്ടിയായതോടെ വലിയ നടപ്പന്തലും വടക്കേ നടപ്പന്തലും മറ്റും നിറഞ്ഞുകവിഞ്ഞു. വെര്ച്വല്ക്യൂ വഴിയും നല്ല തിരക്കായിരുന്നു. പലയിടങ്ങളിലും ബാരിക്കേഡുകള് തീര്ത്ത് പ്രത്യേകം സംഘങ്ങളാക്കിയാണ് തീര്ഥാടകരെ കടത്തിവിട്ടത്.
ഇതര സംസ്ഥാനങ്ങളില്നിന്നുള്ളവരായിരുന്നു ഇതില് ഏറെയും. ഇരുപതും മുപ്പതും പേരടങ്ങുന്ന സംഘങ്ങള് എത്തിയതോടെ തീര്ഥാടകരുടെ നിര ശബരിപീഠവും പിന്നിട്ട് മരക്കൂട്ടം വരെ നീണ്ടു. ഇതോടെ പമ്പയില്നിന്ന് മല കയറാന് പൊലീസ് നിയന്ത്രണം ഏര്പ്പെടുത്തി. ശനിയാഴ്ച പുലര്ച്ചെ മൂന്നിന് നട തുറന്നപ്പോള് വലിയ നടപ്പന്തല്, വടക്കേനട, യുടേണ് എന്നിവിടങ്ങളിലെല്ലാം തീര്ഥാടകര് തിക്കിത്തിരക്കി. പുലര്ച്ചെ രണ്ടരയോടെ മല ചവിട്ടിയവര്ക്ക് രാവിലെ എട്ടിനാണ് ദര്ശനം നടത്താനായത്. പാലാ, രാമപുരം, നെയ്യാറ്റിന്കര എന്നിവിടങ്ങളില്നിന്നും വന്ന തീര്ഥാടകസംഘത്തിന് അഞ്ചര മണിക്കൂറിലേറെ കാത്തുനില്ക്കേണ്ടിവന്നു.
നെയ്യഭിഷേകത്തിനുള്ളവരും കൂടിയായതോടെയാണ് വടക്കേ നട, മാളികപ്പുറം നടപ്പന്തല് എന്നിവിടങ്ങളില് നീണ്ട നിര രൂപപ്പെട്ടത്. ശനിയാഴ്ച ഉച്ചയ്ക്കുശേഷം മലയാളികള് അടക്കമുള്ളവര് സംഘമായി എത്തി. പരമ്പരാഗത കാനനപാത വഴി മല ചവിട്ടിയവരായിരുന്നു ഏറെയും. ഇവരും കൂടിയായതോടെ പുതുതായി നിര്മിക്കുന്ന ഭണ്ഡാരത്തിനടുത്തും മാളികപ്പുറത്തെ പടിക്കെട്ടിലും വന് തിക്കും തിരക്കമുണ്ടായി. തിരക്ക് നിയന്ത്രണാതീതമായതോടെ കേന്ദ്ര സേനാംഗങ്ങളും കൂടുതല് പൊലീസും സ്ഥലത്തെത്തി.
തിരക്ക് കണക്കിലെടുത്ത് പമ്പ, മരക്കൂട്ടം, ശബരിപീഠം, യുടേണ്, വലിയ നടപ്പന്തല്, വടക്കേനട, മാളികപ്പുറം നടപ്പന്തല് എന്നിവിടങ്ങളില് കൂടുതല് സുരക്ഷാസൈനികരെ നിയോഗിച്ചു. വരും ദിവസങ്ങള് തിരക്ക് വര്ധിക്കുമെന്നതിനാല് സുരക്ഷാസംവിധാനം കൂടുതല് ശക്തമാക്കുമെന്ന് പൊലീസ് അറിയിച്ചു.
https://www.facebook.com/Malayalivartha
