തിരുവനന്തപുരം മരായമുട്ടത്തെ ക്വാറി അപകടത്തിന് പിന്നില്‍ മറ്റൊരു വിവാദം. പ്രമുഖ നേതാവിന്റെ തണലിലായിരുന്നു ഇവിടെ അനധികൃതമായി ക്വാറി പ്രവര്‍ത്തിച്ചത്. ആര്‍ക്കും ഇടപെടാന്‍ പറ്റാത്തവണ്ണം പാറമട ലോബി ഈ മേഖലയില്‍ തഴച്ചു വളര്‍ന്നു. സുരക്ഷയൊന്നുമൊരുക്കാതെയുള്ള പ്രവര്‍ത്തനം ജീവനെടുത്തത് രണ്ട് പേരുടേയാണ്. ഇതോടെ സ്ഥലം എംഎല്‍എ റോള്‍ ഏറ്റെടുത്തു സുരേഷ് ഗോപി ചിത്രം പോലെ ഉദ്യോഗസ്ഥര്‍ക്കു നേരെ തട്ടിക്കയറി. 

മാരായമുട്ടത്ത് വനിത ഉദ്യോഗസ്ഥയ്ക്ക് നേരേ സി.പി.എം എംഎല്‍എയുടെ അസഭ്യവര്‍ഷം അങ്ങനെ വൈറലാവുകയാണ്. ഡെപ്യൂട്ടി കളക്ടര്‍ എസ് ജെ വിജയക്ക് നേരേയാണ് പാറശ്ശാല എംഎല്‍എ സികെ ഹരീന്ദ്രന്‍ അസഭ്യം പറഞ്ഞത് . എന്നെ നിനക്ക് അറിയില്ല , നിന്നെ ആരാടീ ഇവിടെ എടുത്തോണ്ടുവന്നത് എന്നൊക്കെ ചോദിച്ചായിരുന്നു എം എല്‍ എയുടെ അസഭ്യവര്‍ഷം. മാരായമുട്ടത്ത് ക്വാറി അപകടത്തില്‍ മരണപ്പെട്ടവര്‍ക്കുള്ള ദുരിതാശ്വാസം നല്‍കുന്നത് സംബന്ധിച്ചുള്ള പ്രഖ്യാപനത്തിനിടയിലായിരുന്നു എം.എല്‍.എ ഡെപ്യൂട്ടി കളക്ടറോട് കയര്‍ത്തത് . കൊല്ലപ്പെട്ടവരുടെ കുടുംബങ്ങള്‍ക്ക് 25 ലക്ഷം രൂപ നല്‍കും എന്ന് പറയണമെന്ന് എംഎല്‍എ ആവശ്യപ്പെട്ടിരുന്നു. എന്നാല്‍ കളക്ടറുടെ മീറ്റിംഗില്‍ തീരുമാനിച്ചതേ തനിക്ക് പറയാന്‍ കഴിയൂ എന്ന് ഉദ്യോഗസ്ഥ നിലപാടെടുത്തു.

കളക്ടറുടെ മീറ്റിംഗില്‍ ഒരു ലക്ഷം രൂപ വീതം അടിയന്തര ധനസഹായം നല്‍കാനാണ് തീരുമാനിച്ചതെന്ന് എസ് ജെ വിജയ പറഞ്ഞു. തനിക്ക് അതു മാത്രമേ പറയാന്‍ കഴിയൂ എന്ന് എംഎല്‍എ യോട് വ്യക്തമാക്കിയിരുന്നു . എന്നാല്‍ എംഎല്‍എ വളരെ മോശമായി തന്നോട് പെരുമാറുകയായിരുന്നെന്നും അതില്‍ തനിക്ക് ദു:ഖമുണ്ടെന്നും വിജയ പറഞ്ഞു. മാരായമുട്ടം പാറമട ദുരന്തം സ്വാഭാവികമായുണ്ടായതല്ലെന്നും വരുത്തിവച്ചതാണെന്നും അതുകൊണ്ട് തന്നെ ദുരന്ത ദുരിതാശ്വാസത്തില്‍ ഉള്‍പ്പെടുത്താന്‍ കഴിയില്ലെന്നും ഡെപ്യൂട്ടി കളക്ടര്‍ ചൂണ്ടിക്കാട്ടുന്നു . എംഎല്‍എയുടെ അസഭ്യവര്‍ഷം എന്തിനായിരുന്നെന്ന് തനിക്ക് ഇതുവരെ മനസിലായില്ലെന്നും അവര്‍ പ്രതികരിച്ചു.

പരിക്കേറ്റ ഏഴു പേരില്‍ മൂന്നു പേരെ തിരുവനന്തപുരം മെഡിക്കല്‍ കോളജ് ആശുപത്രിലും നാലുപേരെ നെയ്യാറ്റിന്‍കര ജനറല്‍ ആശുപത്രിയിലും പ്രവേശിപ്പിച്ചു. മരായമുട്ടം, കോട്ടക്കല്‍, ശാസ്താംപാറ ക്വാറിയില്‍ വെള്ളിയാഴ്ച രാവിലെ ഒമ്പതോടെയാണ് അപകടമുണ്ടായത്. ഒരാഴ്ച മുമ്പ് 160 മീറ്റര്‍ ഉയരത്തില്‍ പാറ പൊട്ടിച്ചിരുന്നു. കല്ലിന്റെ ഒരു ഭാഗം വീണെങ്കിലും കുറച്ചഭാഗം ഇളകിയിരുന്നു. നിലത്തുകിടന്ന പാറക്കല്ലുകള്‍ എക്‌സ്‌കവേറ്റര്‍ ഉപയോഗിച്ച് നീക്കുന്നതിനിടെയാണ് ഉയരമുള്ള ക്വാറിയുടെ മുകളില്‍നിന്ന് അപകടാവസ്ഥയിലായ പാറക്കല്ല് അടര്‍ന്ന് എക്‌സ്‌കവേറ്ററിന്റെ മുകളിലും ക്വാറിയില്‍ ജോലി ചെയ്തിരുന്നവരുടെ ശരീരത്തിലും വീണത്. മുപ്പതിലേറെ പേര്‍ ജോലി ചെയ്തിരുന്ന ക്വാറിയില്‍നിന്ന് പാറ വീഴുന്നത് കണ്ട പലരും ഓടി മാറിയതാണ് ദുരന്തത്തിന്റെ വ്യാപ്തി കുറച്ചത്.