അവയവദാനത്തില് വാണിജ്യ താത്പര്യമില്ലെന്ന് ഉറപ്പാക്കണമെന്ന് ഹൈക്കോടതി
ജീവിച്ചിരിക്കുന്നവരുടെ അവയവദാനത്തില് വാണിജ്യ താത്പര്യമില്ലെന്ന് ഉറപ്പാക്കാന് സര്ക്കാര് പുതിയ മാര്ഗനിര്ദ്ദേശങ്ങള് കൊണ്ടുവരണമെന്നും അതുവരെ നടപടികളുടെ മേല്നോട്ടം മൃതസഞ്ജീവനിയെ (കേരള നെറ്റ്വര്ക്ക് ഫോര് ഓര്ഗന് ഷെയറിംഗ്) ഏല്പിക്കണമെന്നും ഹൈക്കോടതി നിര്ദ്ദേശിച്ചു.
വൃക്ക ആവശ്യമുണ്ടെന്ന് പത്രങ്ങളില് പരസ്യം ചെയ്യുന്നത് വിലക്കി 2016 ഡിസം. 30ന് സര്ക്കാര് പുറത്തിറക്കിയ സര്ക്കുലറിനെതിരെ തൃശൂര് വരവൂര് സ്വദേശി ഇ.എം. മൊയതീനുള്പ്പെടെ 16 പേര് നല്കിയ ഹര്ജിയിലാണ് സിംഗിള് ബെഞ്ച് വിധി പറഞ്ഞത്. ഇത്തരം പരസ്യങ്ങള് നല്കുന്നത് അനുവദിക്കാനാവില്ലെന്നും വിധിന്യായത്തില് പറയുന്നു.
നിലവിലുള്ള ഉപദേശക സമിതിയുമായി കൂടിയാലോചിച്ച് മാര്ഗനിര്ദ്ദേശം കൊണ്ടുവരണം. ഇതിനായി ചീഫ് സെക്രട്ടറി ഉടന് നടപടി എടുക്കണം. ജീവിച്ചിരിക്കുന്നവരില് നിന്ന് അവയവം സ്വീകരിക്കുമ്പോള് ദാതാവിന്റെയും സ്വീകര്ത്താവിന്റെയും വിവരങ്ങള് വെളിപ്പെടുത്തരുത്. കച്ചവടതാത്പര്യങ്ങള് ഒഴിവാക്കാന് ഇത് അനിവാര്യമാണ്. സ്വീകര്ത്താവ് മൃതസഞ്ജീവനിയില് പേര് രജിസ്റ്റര് ചെയ്യണം. മൃതസഞ്ജീവനി അധികൃതര് കൃത്യമായ ഇടവേളകളില് അവയവങ്ങള് ആവശ്യമുണ്ടെന്ന് പത്രക്കുറിപ്പ് ഇറക്കണം. ഇതിന് സന്നദ്ധനായി എത്തുന്നവരുടെ രക്തം ക്രോസ് മാച്ച് ചെയ്ത് രജിസ്റ്റര് ചെയ്ത രോഗികളില് ആര്ക്കാണ് കൂടുതല് അനുയോജ്യമെന്ന് കണ്ടെത്തി അവയവദാനത്തിന് അനുമതി നല്കണം. പരിശോധനാച്ചെലവുകള് സ്വീകര്ത്താവില് നിന്ന് ഈടാക്കാം.
അവയവദാതാവിന്റെയും സ്വീകര്ത്താവിന്റെയും തുടര് ആരോഗ്യ സ്ഥിതിയെക്കുറിച്ച് സര്ക്കാരിന് ധാരണയുണ്ടാകണം. ദാതാവിനെ സഹായിക്കാന് സംവിധാനം വേണം. മനുഷ്യത്വത്തിന്റെ പേരില് അവയവദാനം ചെയ്യുന്നവരെ സഹായിക്കാനായി ഒരു ഫണ്ടിന് രൂപം നല്കണം. ജനങ്ങളില് നിന്നും കോര്പറേറ്റുകളുടെ സാമൂഹ്യ ഉത്തരവാദിത്വ സംവിധാനങ്ങളില് നിന്നും ഇതിലേക്ക് പണം സ്വീകരിക്കാം.<യൃ
വൃക്ക ആവശ്യമുണ്ടെന്ന് പത്ര പരസ്യം നല്കുന്നത് തടഞ്ഞ നടപടി അവയവക്കച്ചവടം ഒഴിവാക്കാനാണെന്ന സര്ക്കാര് വാദത്തോട് കോടതി യോജിച്ചു. പത്രങ്ങളില് പരസ്യം നല്കാന് അനുവദിക്കരുതെന്നും പാവപ്പെട്ടവര് പ്രലോഭനങ്ങള്ക്ക് ഇരയാകുമെന്നും മൃതസഞ്ജീവനി വാദിച്ചു. നന്മയുടെയും മനുഷ്യത്വത്തിന്റെയും പേരിലല്ലാതെ കച്ചവട താത്പര്യത്തോടെയുള്ള അവയവദാനം പരിഷ്കൃത സമൂഹത്തിന് വിരുദ്ധമാണെന്ന് കോടതി വ്യക്തമാക്കി. വൃക്ക ആവശ്യമുണ്ടെന്ന പരസ്യത്തില് പ്രകടമായ സാമ്പത്തികവാഗ്ദാനം ഇല്ലെങ്കിലും ഇത്തരം ധാരണകളുണ്ടാവാം. മനുഷ്യത്വവും നന്മയും ഇത്തരം പരസ്യങ്ങളിലൂടെ ഉണ്ടാവില്ല. പരസ്യം അനുവദിച്ചാല് വിലപേശലിന് സാഹചര്യം ഒരുങ്ങും.
https://www.facebook.com/Malayalivartha
