മാനന്തവാടി: വയനാട് ജില്ലാ ആശുപത്രിയിലെ ശിശുവാര്‍ഡിന്റെ അനാസ്ഥ വളരെ ദയനീയമാണ്‌. 26 കുട്ടികളെ കിടത്തി ചികിത്സിക്കാനുള്ള വാര്‍ഡില്‍ നൂറിലേറെ കുട്ടികളാണുള്ളത്. രോഗികളുടെ കൂട്ടിരിപ്പുകാര്‍ അടക്കം വാര്‍ഡില്‍ കഴിയുന്നത് അഞ്ഞൂറോളം പേരാണ്. ഗുരുതര രോഗം ബാധിച്ച കുട്ടികളടക്കമുള്ളവരെയാണ് ഒന്നിച്ച് ഒരു വാര്‍ഡിലാക്കിയിരിക്കുന്നത്. 12 വയസ്സു വരെയുള്ള കുട്ടികളാണുള്ളത്. ഗുരതര അലംഭാവത്തെ തുടര്‍ന്ന് ജില്ലാ ശിശുക്ഷേമ സമിതി കേസെടുത്തു. ഒരു ബെഡ്ഡില്‍ പല രോഗം ബാധിച്ച കുട്ടികളാണുള്ളത്. ഇവിടെ തന്നെയാണ് ഭക്ഷണം കഴിക്കുന്നതും കിടക്കുന്നതുമെല്ലാം.

രണ്ട് കക്കൂസുകള്‍ ഉണ്ടെങ്കിലും ഒരെണ്ണം മാത്രമാണ് ഉപയോഗയോഗ്യമായത്. രണ്ടുംമൂന്നും കുട്ടികളെ ഒന്നിച്ചാണ് ടോയ്‌ലറ്റില്‍ കൊണ്ടുപോകുന്നത്. ദുര്‍ഗന്ധം കാരണം മൂക്കുപൊത്തി മാത്രമേ ഇവിടേക്ക് പോകാന്‍ കഴിയൂ എന്നത് മറ്റൊരു വസ്തുത.

വായുവിലൂടെയും വെള്ളത്തിലൂടെയും പകര്‍ന്ന രോഗങ്ങളുമായി എത്തിയ കുട്ടികളാണ് ഒന്നിച്ച് കഴിയുന്നത്. 26 ബെഡ്ഡുകളുള്ള വാര്‍ഡില്‍ കഴിഞ്ഞ ദിവസം മാത്രം അഡ്മിറ്റ് ചെയ്തത് 108 കുട്ടികളെയാണ്. ദിനംപ്രതി ആയിരക്കണക്കിന് രോഗികളെത്തുന്ന മാനന്തവാടി ജില്ലാ ആശുപത്രിയില്‍ 274 രോഗികളെ കിടത്താനുള്ള സൗകര്യം മാത്രമാണുളളത്.